ބޭންކް އޮފް މޯލްޑިވްސް (ބީއެމްއެލް)އަށް މި އަހަރުގެ ފުރަތަމަ ނުވަ މަސްދުވަހުގެ ތެރޭގައި 1.93 ބިލިއަން ރުފިޔާގެ ސާފު ފައިދާއެއް ލިބިއްޖެ އެވެ. ބޭންކުގެ ތާރީހުގައި މި މުއްދަތެއްގައި ލިބުނު އެންމެ ބޮޑު ފައިދާ ކަމަށްވާ މި އަދަދަކީ، މިދިޔަ އަހަރުގެ އެ މުއްދަތުގައި ލިބުނު 1.53 ބިލިއަން ރުފިޔާއަށް ވުރެ %26 އިތުރު އަދަދެކެވެ.
މިއަދު އާންމުކުރި މާލީ ހިސާބުތަކުން ދައްކާ ގޮތުގައި، ތިންވަނަ ކުއާޓަރުގައި ބޭންކަށް ލިބުނު ސާފު ފައިދާ 647.2 މިލިއަން ރުފިޔާ އަށް އަރާފައިވާއިރު، މިއީ %36ގެ ކުރިއެރުމެކެވެ. މި މުއްދަތުގައި އިންޓަރެސްޓުން ލިބުނު އާމްދަނީ 874.8 މިލިއަން ރުފިޔާއަށް އިތުރުވެފައިވާއިރު، އެހެނިހެން ވަސީލަތްތަކުން ލިބުނު އާމްދަނީ 377.5 މިލިއަން ރުފިޔާއަށް އުފުލިފައިވެ އެވެ.
ލޯނު ދޫކުރުން އިތުރުވުމާއި، ޖަމާކުރާ ފައިސާ ގިނަވުމާއި، ޑިޖިޓަލް މުއާމަލާތު ކުރިއެރުމާއި، ހަރަދު ހަރުދަނާކޮށް ބެލެހެއްޓުމަކީ މި ނަތީޖާގެ މައިގަނޑު ސަބަބުތަކެއް ކަމަށް ބޭންކުން ބުނެ އެވެ. ސެޕްޓެމްބަރު ނިމުނުއިރު ބޭންކުގެ އެސެޓް 65.6 ބިލިއަން ރުފިޔާއަށް އަރާފައިވާއިރު، ދޫކޮށްފައިވާ ލޯނު 32.9 ބިލިއަނަށާއި، ކަސްޓަމަރުންގެ ޖަމާ 42.4 ބިލިއަނަށް އިތުރުވެފައިވެ އެވެ. އަނބުރާ ނުލިބިދާނެ ކަމަށް ބެލެވޭ ލޯނުގެ ނިސްބަތް %4.8 އަށް ދަށްވެފައިވާއިރު، ބޭންކުގެ ކެޕިޓަލް އެޑިކުއެސީ ރޭޝިއޯ ހުރީ މަރުކަޒީ ބޭންކުގެ %12 ގެ މިންގަނޑަށް ވުރެ ވަރަށް މަތީގައި، %38 ގަ އެވެ.
ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ، މި އަހަރަކީ ބޭންކުގެ ތާރީހުގައި މާލީ ގޮތުން އެންމެ ވަރުގަދަ އަހަރަށް ވެގެންދާނެ ކަމަށެވެ. މިދިޔަ އަހަރު 2.47 ބިލިއަން ރުފިޔާގެ ފައިދާ ލިބުނު ބީއެމްއެލް އިން ލަފާކުރަނީ، މި އަހަރު ނިމޭއިރު އޭގެ ވުރެ ބޮޑު ފައިދާއެއް ލިބޭނެ ކަމަށެވެ.
ކޮމެންޓު ފޮނުވާ