ރާއްޖޭގެ ރައްޔިތުންނަށް އެންމެ ފައިދާހުރި ނިޒާމަކީ ރިޔާސީ ނިޒާމު ކަމުގައި ޖުމްހޫރީ ޕާޓީގެ ލީޑަރު، އަދި ސަރުކާރު ކޯލިޝަން ލީޑަރު ޤާސިމް އިބްރާހިމް ވިދާޅުވެއްޖެއެވެ.

ދޮޅު އަހަރަށްފަހު މިރޭ ޖުމްހޫރީ ޕާޓީއާއި މެމްބަރުން ގުޅުމަށް މިރޭ ބޭއްވި ޚާއްސަ ޖަލްސާގައި ވާހަކަ ދައްކަވަމުން ޤާސިމް ވިދާޅުވީ ވެރިކަން މެދު ނުޖެހެނީސް ބަރުލަމާނީ ނިޒާމު ގެންނަން އުޅެނީ ކޮން ބަޔަކު ކަމާއި، ކޮން މަގުސަދަކުކަން އެގޭކަމަށެވެ. އެއީ އޮޅޭ ކަމެއް ނޫންކަމަށާއި، ނަމަވެސް ރައްޔިތުންނަށް އެންނެ ފައިދާހުރި ނިޒާމީ ރިޔާސީ ނިޒާމުކަމަށް ޤާސިމް ވިދާޅުވިއެވެ.

ރާއްޖޭގައި އޮންނަން ފެންނަ ނިޒާމަކީ ރިޔާސީ ނިޒާމުކަން އޮތީ ނިންމާފަ. ރައްޔިތުން މަތީ އައުލަބިއްޔަތުން އެކަން ނިންމީ. ދައުރުގެ މެދު ތެރެއާއި ހަމައަށް ނާންނަނީސް ބަރުލަމާނީ ނިޒާމުގެ ވާހަކަ މާގަދަޔަށް ދައްކަނީ ކޮން ކަމެއްކައިކަން އެގޭ. ރައްޔިތުންނަށް އެންމެ ފައިދާހުރި ނިޒާމަކީ، އަޅުގަނޑު ކަށަވަރުކަމާއިއެކު ދަންނަވާނީ ރިޔާސީ ނިޒާމޭ. ކޮންމެ ނިޒާމެއް އޮތަސް، ވެރިކަމަށް އަންނަ މީހެއްގެ ގާބިލްކަމާއި، ތަޖުރިބާގެ މައްޗަށް ކަންކަން ކުރެވިގެންދާނީ.

– ޤާސިމް ވިދާޅުވިއެވެ.

ޤާސިމް ވިދާޅުވީ ރިޔާސީ ނިޒާމަކީ ރައްޔިތުންގެ ގާތަށް ވެރިމީހާއާއި، ވަޒީރުންނާއި، ޕާޓީތަކުން ގޮސްގެން ޚިދުމަތްކޮށްދޭ ނިޒާމުކަމަށެވެ. ނަމަވެސް ބަރުލަމާނީ ނިޒާމަކީ އެންމެ ކުޑަ އަބާދީންވެސް ވެރިކަމަށް އާދެވޭ ނިޒާމުކަމަށެވެ. ބަރުލަމާނީ ނިޒާމަކީ މުޅި އޮޑީގައި ހަސަނުގެ ދެފައި އޮންނަހެން އެކުލެވޭ ނިޒާމެއްކަމަސް ޤާސިމް ވިދާޅުވިއެވެ. އޭނާ ވިދާޅުވީ މީގެ އެތައް އަހަރެއް ކުރިން ރައްޔިތުން ނިންމާފައި ނިންމުން ބަދަލުކޮށް އުޅުމަކީ ކުރެވޭނެ ކަމެއް ނޫންކަމަށެވެ.

ޤާސިމްވަނީ އަވަށްޓެރި ޤައުމުތަކުގައި ވެރިކަމުގެ ނިޒާމު ހިންގާ ގޮތްތަކުން މިސާލު ނަންގަވައި އެކަންކަން ހިއްސާ ކުރައްވާފައެވެ. ޚާއްސަކޮށް އިންޑިއާއާއި، އެނޫން ގައުމުތަކުގައި ބަރުލަމާނީ ހިނގާގޮތް ގާސިމްވަނީ ކިޔާދީފައެވެ.

ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.

ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.