ބެލުންތެރިންގެ ބޮޑު ތަރުހީބެއް ލިބިގެން ދިއަ ފިލްމް "ފިޒާ"ގެ ޕްރޮޑިއުސަރ ޕްރަދީޕް ގުހާ މަރުވެއްޖެއެވެ.
އޭނާ މަރުވެފައި ވަނީ ލިވާ ކެންސަރާއި ހަނގުރާމަ ކުރަމުން ދަނިކޮށެވެ.
ހޮނިހިރު ދުވަހު އޭނާ މަރުވީ، މުމްބާއީގެ ކޮކިލާ ބެން އަންބާނީ ހޮސްޕިޓަލިގައި އެޑްމިޓްކޮށްގެން ފަރުވާ ދެމުންދަނިކޮށެވެ. އުމުރުން 69 އަހަރުގެ ޕްރަދީޕް ފަރުވާ ހޯދަމުންދިޔައީ ލިވާ ކެންސަރުގެ ފަހުސްޓޭޖަށެވެ. އަދި އޭނާއަށް ފަރުވާ ދެމުން ދިއައީ ވެންޓިލޭޓަރުގައެވެ.
ޕްރަދީޕް ގެ އަންހެނުން ޕަޕިއާ ގުހާ އަދި ދަރިފުޅު ސަންކިތް ގުހާ ވަނީ ޕްރަދީޕްގެ މަރުގެ ހަބަރު ކަށަވަރު ކޮށްދީފައެވެ.
ޕްރަދީޕް އަކީ ދަ ޓައިމްސް އޮފް އިންޑިއާ ގްރޫޕްގެ ކުރީގެ ޕްރެޒިޑެންޓެވެ. 2005 ވަނަ އަހަރު އޭނާ ވަނީ ޒީ ޓެލެ ފިލްމްސްގެ ސީއީއޯ ކަން ވެސް ކޮށްފައެވެ. އެންމެ ފަހުން އޭނާ މަސައްކަތް ކުރީ ނައިން އެކްސް މީޑިއާގެ އެމްޑީގެ ގޮތުގައެވެ.
"ފިޒާ" ގެ އިތުރުން ޕްރަދީޕް ވަނީ 2003 ވަނަ އަހަރުގެ ފިލްމު "ތެހެޒީބް" އަދި 2008 ވަނަ އަހަރުގެ ފިލްމް "ފިރް ކަބީ" ވެސް ޕްރޮޑިއުސް ކޮށްފައިއެވެ.
