ޗެލްސީއަށް ކުޅެމުން އައި އިންގްލެންޑުގެ ޒުވާން ފޯވާޑް ޓެމީ އަބްރަހަމް އިޓަލީގެ ރޯމާއަށް ބަދަލުވެއްޖެއެވެ.
އުމުރުން 23 އަހަރުގެ އަބްރަހަމް ރޯމާއަށް ބަދަލުވީ 40 މިލިޔަން ޔޫރޯގެ ފީއަކަށެވެ. އޭނާ ވަނީ ރޯމާއާއެކު ފަސް އަހަރުގެ އެއްބަސްވުމެއް ހަދާފައެވެ.
މިދިޔަ ސީޒަންގައި ޗެލްސީއަށް އެންމެ ގިނަ ލަނޑު ޖަހާދިން ދެކުޅުންތެރިންގެ ތެރޭގައި ހިމެނޭ އަބްރަހަމް ރޯމާއަށް ސޮއިކޮށްފައިވަނީ 40 މިލިއަން ޔޫރޯގެ އަގަކަށެވެ. ރޯމާއަކީ ޗެލްސީއަށް ކުރިން ކޯޗް ކޮށްދީފައިވާ ތަޖްރިބާކާރު ކޯޗު ޖޯސޭ މޮރީނިއޯ މިހާރު ކޯޗް ކޮށްދޭ ކްލަބެވެ. ދެކްލަބުން ވީ އެއްބަސްވުމުގެ ދަށުން އަބްރަހަމް ޗެލްސީއިން ބޭނުންވެއްޖެނަމަ 68 މިލިއަން ޕައުންޑަށް ގަނެވުމުގެ ފުރުސަތު ހުޅުވާލާފައިވެއެވެ. އަބްރަހަމް ހާމަކުރިގޮތުގައި ކްލަބަކުން ކުޅުންތެރިޔަކު ވަރަށް ބޭނުންވުމުން އެކަން އެކުޅުންތެރިޔަކަށްވެސް އިހްސާސް ކުރެވޭނެ ކަމަށާއި އެގޮތުން ރޯމާގެ ފަރާތުން އެކަން ކޮށްފައިވާކަމަށެވެ.
އިންގްލެންޑުގެ ގައުމީ ފުޓްބޯޅަ ޓީމުން އަބްރަހަމް ޖާގަ ހޯދާފައިވަނީ 2019 ވަނަ އަހަރުގެ ތެރޭގައެވެ. އޭގެ ފަހުން މިހާތަނަށް އިންގްލެންޑުގެ ގައުމީ ޓީމަށް އަބްރަހަމް ހަ މެޗު ކުޅެދީފައިވާއިރު، އޭނާ ވަނީ އެއް ލަނޑު ކާމިޔާބުކޮށްފައެވެ.
ރޯމާއިން އަބްރަހަމުގެ ސޮއި ހޯދިއިރު، އެ ޓީމު ކުޅެމުން އައި ބޮސްނިއާގެ ފޯވާޑް އެޑިން ޒެކޯ ދާދި ފަހުން ވަނީ އިޓަލީގެ ޗެމްޕިއަން އިންޓަ މިލާނަށް ބަދަލުވެފައެވެ. މި ސީޒަނަށް ރޯމާ ނުކުންނާނީ ޗެލްސީގެ ކުރީގެ ކޯޗު ޖޯސޭ މޮރީނިއޯގެ އިރުޝާދުގެ ދަށުންނެވެ.
އަބްރަހަމް ޗެލްސީގައި ހޭދަކުރި ދުވަސްތަކުގައި 82 މެޗް ކުޅެދީ 30 ލަނޑު ޖަހާދީފައިވެއެވެ. އަބްރަހަމް ޗެލްސީގައި އެންމެ ބޮޑަށް ބޭނުންކުރިތަން ފެނިގެންދިޔައީ އެކްލަބްގެ ކޯޗަކަށް ފްރޭންކް ލެމްޕާޑ ހުރިއިރުއެވެ.
