ވެރިކަން ކުރާ އެމްޑީޕީގެ މެމްބަރުކަމުން ވަކިކޮށްފައިވާ އެޕާޓީގެ ކުރީގެ ނާިއބް ރައީސް އަލްހާން ފަހުމީގެ މެމްބަރޝިޕް އަލުން އިޔާދަ ކޮށްދެއްވުމަށް އޭނާ އެދިއްޖެއެވެ.
އަލްހާންގެ މެމްބަރޝިޕް އަލުން އިޔާދަކޮށްދެއްވުމަށް އެދި އޭނާ ވަނީ އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކިބައިން އެދިފައެވެ. އަލްހާން ވަނީ އޭނާ 2016 ވަނަ އަހަރު ޕާޓީން ވަކިކޮށްފައިވަނީ އުސޫލުން ބޭރުންކަމަށްބުނެ މައްސަލަ ބަލައި އަލުން މެމްބަރޝިޕް އިޔާދަ ކޮށްދެއްވުމަށް އެދިވަޑައިގެންފައެވެ. ނަމަވެސް އެފުރުސަތު އެމްޑީޕީން އޭރު ދީފައިނުވެއެވެ. އަލްހާން ވަނީ އޭރު އޭނާ އެމްޑީޕީ އޮފީހަށް ފޮނުވި ސިޓީވެސް ޓުވިޓާގައި ހިއްސާ ކުރައްވާފައެވެ.
އެމްޑީޕީ @MDPSecretariat ގެ އިސް ލީޑަރ ރައީސް @ibusolih އަށް ،
ވެދުން ސަލާމަށްފަހު ދަންނަވަމެވެ!
މިމައްސަލަ ބައްލަވައިދެއްވާ އަޅުގަނޑުގެ މެމްބަރޝިޕް އިޢާދަކޮށްދެއްވުމަށް އެދި ދަންނަވަމެވެ.
އިޙްތިރާމް ޤަބޫލުކުރެއްވުން އެދެމެވެ! @HassanLatheef @MohamedNasheed pic.twitter.com/fAeM93u61k— ????? ????? – ?? (@AlhanFahmy) August 17, 2021
އެމްޑީޕީގެ ކުރީގެ ނައިބު ރައީސް އަލްހާން ފަހުމީ، އެ ޕާޓީން ވަކިކުރުމަށް އެޕާޓީގެ ފިޔަވަޅު އަޅާ ކޮމިޓީން ނިންމައިވަނީ 2016 ވަނަ އަހަރުގެ އޮކްޓޯބަރު މަހުގެ ތެރޭގައެވެ. އަލްހާން ފަހުމީ ޕާޓީން ވަކިކޮށްދިނުމަށް އެދި އެ ޕާޓީގެ ގައުމީ މަޖިލީހުގެ 50 މެމްބަރުންގެ ސޮއިއާ އެކު ޕެޓިޝަނެއް، ފިޔަވަޅު އަޅާ ކޮމިޓީއަށް ފޮނުވީ އޭނާ އެމްޑީޕީގެ އަސާސީ ގަވައިދާ ޚިލާފަށް، އެޕާޓީގެ މަސްލަހަތުތައް ގެއްލޭނެ ފަދަ ގޮތަކަށް އަމަލުތަކެއް ހިންގާފައިވާ ކަމަށް ބުނެއެވެ.
އަލްހާން ވަކިކުރުމަށް އޭރު ނިންމި ނިންމުމުގައި ވަނީ ވަރުގަދަ ޝަރުތުތަކެއްވެސް ކަނޑައަޅާފައެވެ. އެގޮތުން އަލްހާނަށް އަލުން ޕާޓީގެ މެމްބަރުކަން ލިބިއްޖެ ނަމަ، އެ ތާރީޚަކުން ފެށިގެން ތިން އަހަރު ދުވަހުގެ ނިޔަލަށް އެޕާޓީގެ އެތެރޭގެ އެއްވެސް މަގާމަކަށް ކުރިމަތިނުލެވޭނެ ކަމަށާއި، ޕަޓީގެ އެއްވެސް ޕްރައިމަރީއެއްގައި އޭނާއަށް ވާދަ ނުކުރެވޭނެ ކަމަށްވެސް އޭރުވަނީ ނިންމާފައެވެ. އޭރު އެގޮތަށް ނިންމާފައިވަނީ އަލްހާން 2018 ވަނަ އަހަރުގ ރިޔާސީ އިންތިޚާބުގައި ކުިރމަތިލައްވާނެކަމަށް ވިދާޅުވަމުން ދިއުމުންކަމަށް ބެލެވެއެވެ.
އަލްހާން ފަހުމީ ވިދާޅުވަމުން ގޮސްފައިވަނީ އޭނާ ޕާޓީން ކަނޑާލީ އިންސާފުން ބޭރުން ވަކި މީހަކު ބޭނުންވާ ގޮތަކަށް ކަންކަން ކުރުމަށް ކަމަށެވެ.
