ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީއަށް އެމްޑީޕީގެ ޕާލަމަންޓްރީ ގްރޫޕްގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް އާއި ހުޅުދޫ ދާއިރާގެ މެމްބަރު އިލިޔާސް ލަބީބް އަލުން ހަމަޖައްސައިފިއެވެ.
ރައްޔިތުންގެ މަޖިލީހުގެ މިއަހަރުގެ ފަހު ދައުރުގެ ޖަލްސާތައް މިއަދު ފަށާފައިވާއިރު، މަޖިލީހުގެ ދަފްތަރަށާއި، ކޮމިޓީތަކަށް އައިސްފައިވާ ބަދަލުތައް މަޖިލީހުން ހާމަކުރައްވައިފިއެވެ.
މަޖިލިސް ކޮމެޓީ ތަކުގެ ތެރެއިން ސަލާމަތީ ޚިދުމަތްތަކާއި ބެހޭ ކޮމިޓީއަށްވެސް ވަނީ ބަދަލުތަކެއް ގެނެސްފައެވެ. ސަލާމަތީ ޚިދުމަތްތަކައި ބެހޭ ކޮމެޓީ (241 ކޮމެޓީ) ގައި ހިމެނޭ އެމްޑީޕީގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީގެ ބަދަލުގައި އެކޮމެޓީއަށް އަލުން އަނބުރައި އެކޮމެޓީއަށް ހުޅުދޫ ދާއިރާގެ މެމްބަރު އިލްޔާސް ލަބީބު، އަދި އެކޮމިޓީގައި ހިމެނި ވަޑައިގަންނަވާ ތުޅާދޫ ދާއިރާގެ މެމްބަރު ހިސާން ހުސެއިންގެ ބަލުގައި އަލުން އަނބުރައި މެދު ހެންވޭރު ދާއިރާގެ މެމްބަރު އަލީ އާޒިމް ވަނީ ހަމަޖައްސަވާފައެވެ.
ސަލާމަތީ ޚިދުމަތްތަކާއި ބެހޭ ކޮމިޓީން އިލްޔާސް އާއި އާޒިމް އެކަހެރިވެފައިވަނީ ރައީސް ނަޝީދުގެ ސެކިއުރިޓީ ބްރީޗްވީ ގޮތާ ގުޅޭގޮތުން މަޖިލީހުން އެކުލަވާލި އިންކުއަރީގެ މަސައްކަތް ކުރިއަށް ގެންދިއުމުގައި ޖާގަ ދެއްވުމުގެ ގޮތުންނެވެ.
އެމްޑީޕީ ޕީޖީ ގުރޫޕުން ނިންމީ ރައީސް ނަޝީދަށް ހަމަލާ ދިނުމުގެ ކުރިން އެފަދަ ހަމަލާއެއް ދޭން އުޅޭކަމުގެ މައުލޫމާތު އިލްޔާސްއަށް ލިބިވަޑައިގެންނެވި ކަމަށާއި އަދި އެކަން ޑިފެންސް މިނިސްޓަރު މާރިޔާ އަހުމަދު ދީދީގެ ސަމާލުކަމަށް ގެންނެވި ކަމަށް އިލިޔާސް ވިދާލުވުމުން އިންކުއަރީން އެކަން ބަލަން ބޭނުންވުމުންނެވެ. ނަމަވެސް ފުލުހުން ފަހުން ބުނީ އިލިޔާސް ދިން މައުލޫމާތާއި ރައީސް ނަޝީދަށް ދިން ހަމަލާއާ ގުޅުމެއް ނެތް ކަމަށެވެ. އަލީ އާޒިމް ކޮމިޓީން ވަކިކުރީ އިންކުއަރީގެ ބޭނުމަށް އެމްޑީޕީގެ ޕީޖީގެ ތެރެއިން ގާނޫނީ ބޭފުޅަކު ކޮމިޓީއަށް ލުުމަށް ބޭނުންވުމުންނެވެ.
