ގޭގެއިން ކުނި ނެގުމުގެ އުސޫލަށް ބަދަކު ގެންނަން ބޭނުންވަނީ މާލެ ސިޓީގައި ދިރިއުޅޭ ރައްޔިތުން ކަމަށާއި، މާލެ ސިޓީ ކައުންސިލުން ރައްޔިތުންގެ މަޝްވަރާއާއިއެކު އެކަން ކުރަން އުޅުމުން ވެމްކޯއިން އެކަމާއި ދެކޮޅު ހެދުމަކީ މާލެ ސިޓީގައި ދިރިއުޅޭ ރައްޔިތުންނަށް ކުރެވޭ ޖެއްސުމެއް ކަމުގައި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާ ވިދާޅުވެއްޖެއެވެ.
ކޯވިޑް-19 އާ ގުޅިގެން ރައްކާތެރި ކަމުގެ ފިޔަވަަޅެއްގެ ގޮތުން ގޭގެއިން ބޭރަށް ކުނި ނެރެން އެންގި އެންގުން ނިމުމަކަށް ގެނައުމަށް ނިންމާފައިވާ ކަމަށް މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވި ނަމަވެސް އެފަދަ ނިންމުމެއް އަދި ނިންމަފައިނުވާ ކަަމަށް ވެމްކޯއިން ވަނީ ބުނެފައެވެ. ވެމްކޯއިން ރޭ ނެރުނު ބަޔާނާއި ގުޅިގެން ޝުޖާ ވިދާޅުވީ މާލޭގައި ކުނި މަގުތަކަށް ނެރެފައިވާ ބެހެއްޓުމުން އުދަނގޫވެގެން އެކަމުގެ ކަންބޮޑުވުން ފާޅު ކުރީ މާލޭގައި ދިރިއުޅޭ ރައްޔިތުން ކަމަށެވެ. އެއީ މާލެ ސިޓީ ކައުންސިލްގެ މޭޔަރު ބޭނުންވެގެން އެކަނި ކުރާ ކަމެއް ނޫންކަމަށެވެ.
ބަލަ މޭއަރ މުއިއްޒު އެއްނޫނޭ އެދެނީ ރޭގަނޑު 11:00ގެ ފަހުން ކުނި ނެގޭނެ ގޮތް ހެދުމަށް. މާލެ އާއި މާލޭގައި ދިރިއުޅޭ ރައްޔިތުން ގެ އެދުމެކޭ އެއީ! ޖެއްސުން ތިޔަ ކުރައްވަނީ މާލެ ރައްޔިތުންނަށް އިގޭތޯ! ވިސްނާ.
– ޝުޖާ ވިދާޅުވިއެވެ
ވެމްކޯއިން މިރޭ ނެރެފައިވާ ނޫސްބަޔާނެއްގައި ބުނެފައިވަނީ ކޮވިޑް-19 އިން ރައްކާތެރިވުމަށް އެޅި ހާއްސަ ފިޔަވަޅެއްގެ ގޮތުން އޭޕްރީލް 16، 2020 އިން ފެށިގެން މާލެ ސަރަހައްދުގައި ކުނި ނަގާ އުސޫލު ބަދަލުކޮށްފައިވާއިރު މި މަހުގެ 21 ވަނަ ދުވަހުން ފެށިގެން ކުނި ނަގާ އުސޫލަށް ބަދަލު ގެންނާނެ ކަމަށް ބުނެ ދެކެވޭ ވާހަކަތަކަކީ ސައްހަ ވާހަކަތަކެއް ނޫން ކަމަށެވެ.
މާލެ ސަރަހައްދުގެ އާންމު ހާލަތު ރަނގަޅުވަމުން ދިއުމާއި ގުޅިގެން މިކަމަށް ރިއާޔަތްކޮށް މި ކޯޕަރޭޝަނުން ގޭބީސީތަކަށް ފޯރުކޮށްދެމުންދާ ހިދުމަތްތަކަށް ބަދަލު ގެނައުމަށް އެޗްޕީއޭ އާއި ސަރުކާރުގެ ކަމާއިބެހޭ އިދާރާތަކާއި މަޝްވަރާކޮށް މި ކޯޕަރޭޝަނުން ގޮތެއް ނިންމުމަށް ފަހު އެކަން އިއުލާނު ކުރެވޭނެ ވާހަކަ ދަންނަވަމެވެ.
– މުއިއްޒުގެ ވާހަކަތަކަށް އިޝާރާތްކޮށް ވެމްކޯއިން ނެރުނު ބަޔާނުގައިވެއެވެ.
One Response
ށޫޖާ ތިވިދާޅުވީ ވަރަށރަނގަޅުވާހަކައެއް.