އެމްޑީޕީއަށާއި، ރާއްޖެއަށް ފައިދާހުރި އެންމެ ރަނގަޅު ގޮތަކީ ރައީސް އިބްރާހިމް މުހައްމަދު ޞާލިހާއި، ރައީސް ނަޝީދު އެކީގައި ތިބުންކަމަށް ރައީސް ޞާލިހުގެ ކޮއްކޯފުޅު ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދާއި ރައީސް އިބްރާހިމް މުހައްމަދު ސޯލިހާ ދެމެދު އުފެދިފައިވާ ހިޔާލުތަފާތުވުންތައް އެއްފަރާތްކޮށް، އެކުގައި އަލުން މަސައްކަތް ކުރެވޭނެ ގޮތެއް ހޯދައިދޭން އެ ޕާޓީގެ ޗެއާޕާސަން ހަސަން ލަތީފް އިސްނަންގަވައިގެން ފެށި މަސައްކަތާއި ގުޅިގެން ނިޔާޒު ވިދާޅުވީ ޚިޔާލު ތަފާތުވުންތަކެއް ހުރިނަމަވެސް އެކީގައި މަސައްކަތް ކުރެވޭނެ މަގެއް ހޯދަން ޖެހޭކަމަށެވެ.
ރައީސް ޔާމީންގެ ވެރިކަމުގައި އެމްޑީޕީ އިދިކޮޅުގައި އޮތްއިރުވެސް ޚިޔާލު ތަފާތުވުން ބޮޑު ކަންތައްތަކެއް ފެނުނު ކަމަށާއި، ނަމަވެސް މަޝްވަރާކޮށްގެން އެކަންކަން ހައްލު ކުރެވުނުކަމަށެވެ. އެމްޑީޕީއަށް ކުރިއަށް އޮތް ތަނުގައިވެސް ފައިދާވާނީ ދެ ރައީސުން އެކީގައިކަމަށް އަލީ ނިޔާޒު ވިދާޅުވިއެވެ.
އިދިކޮޅޮގައި އުނދަގޫ ދުވަސް ތަކެއް ހޭދަކުރި އިރު ވެސް ޚިޔާލު ތަފާތުވޭ. ހައްލުކުރެވެނީ މަޝްވަރާ ކުރެވިގެން. މަޝްވަރާާއިން ޙައްލު ނުކުރެވޭނެ ކަމެއް ނެތް. އެމް.ޑީ.ޕީ އަށް ފައިދާ އޮތީމަޝްވަރާކޮށް ހައްލު ހޯދުން. ދެ ރައީސުން އެކިގާ ތިބުން މުހިއްމު.
– އަލީ ނިޔާޒު ވިދާޅުވިއެވެ.
ދެ ރައީސުންގެ ހިޔާލުތަފާތުވުން ފިނިކުރަން ޗެއާޕާސަން އިސް ނެންގެވިއިރު، ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް ވަނީ ޕާޓީގެ ތެރޭގައި އުފެދިފައިވާ ބައިބައިވުމަކީ މުޅި ޕާޓީއަށް އޮތް ދެރައެއް ކަމަށް ދޭހަވާ ގޮތަށް ވާހަކަ ދައްކަވައިފައެވެ. އެކަމުގައި، އެމަނިކުފާނު ބައްލަވަނީ މަސްލަހަތަށް ކަމަށާއި ކުރިއަށް ވަޑައިގަންނަވާނީ އެ މަގުން ކަމަށް ވާހަކަފުޅު ދެއްކެވިއެވެ.
ޕާޓީގެ ނިންމުންތަކުުގެ ތެރެއިން ރައީސް ނަޝީދު ބޭނުންފުޅުވި ބައެއް ކަންކަމާ ސީދާ ދެކޮޅު ކަން ވެސް ހާމަކުރެއްވިއެވެ. އޭގެތެރޭގައި އިދިކޮޅު ޕީޕީއެމާއި ގުޅިގެން އެމްޑީޕީން މަސައްކަތް ކުރުމާއި ކުއްލި ހާލަތު އިއުލާންކުރުން ހިމެނެއެވެ.
