ކުރީގެ ރައީސް އަދި ރައްޔިތުން މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލަން މޭމަހުގެ 6 ވަނަ ދުވަހުގެ ރޭ ދިން ހަމަލާގެ ތަހުގީގުގެ ފުރަތަމަ ބައި ނިމިއްޖެ ކަމަށާއި، ފުލުހުން ދެން އަމާޒު ހިފަންވީ މިކަމުގެ އަޑީގައި ތިބި މީހުންނާއި ހަމަލާއަށް ފައިސާ ހަރަދުކުރި ގޮތް ތަހުގީގު ކުރަން ކަމަށް، މި މައްސަލައިގެ ތަހުގީގު ކުރިއަށް ދާގޮތް ބެލުމަށް ރައީސުލްޖުމްހޫރިއްޔާ އައްޔަން ކުރެއްވި މަންދޫބު އައްބާސް ފާއިޒް ވިދާޅުވެއްޖެއެވެ.
ކޮމިޝަނަރ އޮފް ޕޮލިސް މުޙައްމަދު ހަމީދު ޓެގް ކުރައްވައި ކުރެއްވި ޓުވީޓެއްގައި، އައްބާސް ވިދާޅުވީ، ފުލުހުން ތަހުގީގު ފުރިހަމައަށް ނިންމާލީތީ މަރުހަބާ ދަންނަވާ ކަމަށާއި ނަމަވެސް މިއީ ތަހުގީގުގެ ފުރަތަމަ ބައި ކަމަށެވެ. އަދި ތަހުގީގުގެ ދެވަނަބައިގައި ހަމަލާގެ ފަހަތުގައި ވާ މީހުނާއި ފައިސާ ހަރަދުކޮށްފައި ވާގޮތް ވަރަށް އަވަހަށް ހޯދި އެކަމުގެ ތަހުގީގުވެސް ފުރިހަމައަށް ކުރިއަށްދާނެ ކަމަށް އުންމީދު ކުރައްވާކަމަށް އައްބާސް ވިދާޅުވިއެވެ. މީގެ އިތުރުން ހަމަލާ ދިނުމުގައި އަމަލީގޮތުން ބައިވެރިވި 4 މީހުންގެ މައްޗަށް ދައުވާކުރަން ޕީޖީ ނިންމާފައި ވުމުން އެކަންވެސް އައްބާސް ފާހަގަކުރައްވާފައި ވެއެވެ.
2021 ވަނަ އަހަރުގެ މޭ މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށްގެން ދީފައިވާ ޓެރަރިސްޓް ޙަމަލާއާ ގުޅިގެން، ކުރިޔަށްދާ ތަޙުޤީޤާއި އެންމެހާ ކޯޓު މަރުޙަލާތައް ގާތުން ބެއްލެވުމަށްޓަކައި ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ގޮތުން އިނގިރޭސިވިލާތުގެ ރައްޔިތެއްކަމަށްވާ އައްބާސް ފާއިޒް ހަމަޖައްސަވާފައި ވަނީ 2021 މެއި 19 ވަނަ ދުވަހުގައެވެ.
މޭ މަހުގެ 6 ވަނަ ދުވަހުގެ ޙަމަލާޔާގުޅޭ އެންމެހައި ތަޙުޤީޤެއްގައި ރައީސުލްޖުމްހޫރިއްޔާގެ ޚާއްޞަ މަންދޫބުގެ ހައިސިއްޔަތުން ޕްރޮސެކިއުޓަރ ޖެނެރަލް ކަނޑައަޅުއްވާ ޙުދޫދުގެ ތެރެއިން އައްބާސް ފާއިޒް ބައިވެރިވެވަޑައިގަންނަވާނެއެވެ. އަދި، މި މައްސަލައިގައި އިންސާފު ޤާއިމުކުރެވެންދެން ބޭނުންވާ ޙާލަތްތަކުގައި ކަމާގުޅޭ ލަފަޔާއި އިރުޝާދު ދެއްވައި، ތައްޔާރުކުރައްވަން ޖެހިވަޑައިގަންނަވާ އެންމެހާ ރިޕޯޓެއް ވެސް އޭނާ ތައްޔާރުކުރައްވާނެއެވެ.
އައްބާސް ފާއިޒަކީ ވަރަށް ގިނަ ދުވަސްތަކެއްވަންދެން އެމްނެސްޓީ އިންޓަރނޭޝަނަލްގެ ދެކުނު އޭޝިޔާ ބައްރުގެ އިޖްތިމާޢީ، ސަޤާފީ އަދި ސިޔާސީ މައްސަލަތައް ދިރާސާކުރެއްވި ކަމާ ގުޅޭ ޚާއްޞަ މާހިރެކެވެ. އަދި، ދެކުނު އޭޝިޔާ ބައްރުގެ ޤައުމުތަކުގެ އިންސާނީ ޙައްޤުތައް ކަށަވަރުކުރުމުގެ މަސައްކަތުގައި 30 އަހަރަށް ވުރެ ދިގު މުއްދަތަށް ޚިދުމަތްކުރައްވައި، ކަމުގެ ތަޖުރިބާ ލިބިވަޑައިގެން ހުންނެވި ޤާބިލް ބޭފުޅެކެވެ.
މީގެ އިތުރުން އޭނާއަކީ އިނގިރޭސިވިލާތުގެ ޔުނިވަރސިޓީ އޮފް އެސެކްސްގައި ފާއިތުވި 3 އަހަރު ޤާނޫނީ ލެކްޗަރަރއެއްގެ ގޮތުގައި ވެސް މަސައްކަތް ކުރައްވަމުން ގެންދަވާ ބޭފުޅެކެވެ.
