މިމަހު ރާއްޖޭގައި ބާއްވާ އޭއެފްސީ ކަޕް ފުޓްބޯޅަ މުބާރާތައް ތައްޔާރުވުމަށް ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނުން ސައުދީ އަރަބީއްޔާގައި މިހާރު ހަދަމުންދާ ޓްރެއިނިން ކޭމްޕްގައި ކުޅުނު ދެވަނަ މެޗު އެއްވަރުވެއްޖެއެވެ.
ސައުދީގެ ޕްރޯ ލީގުގެ ކްލަބް އަލް ވަހްދާއާ ދެކޮޅަށް ކުޅުނު މި މެޗު ނިމުނީ 0-0 ގެ ނަތީޖާއަކުންނެވެ.
މި މެޗުގެ ކުރިން ސައުދީގައި މާޒިޔާއިން ކުޅުނު ފުރަތަމަ މެޗުގައި އަލް އިއްތިހާދުގެ 19 އަހަރުން ދަށުގެ ޓީމު ވަނީ 0-2 ގެ ނަތީޖާއަކުން ބަލިކޮށްފައެވެ. މި މެޗުގައި މާޒިޔާގެ ލަނޑުތައް ކާމިޔާބުކޮށްދިނީ، ކޮނޭލިއަސް ސްޓެވާޓް (ކޯނޭ) އާއި ނާއިޒު ހަސަން (ދާދު) އެވެ.
މާޒިޔާއިން ކުރިއަށް އޮތް ތަނުގައި ވެސް އެކުވެރިކަމުގެ މެޗެއް ކުޅޭނެއެވެ. ފަހު މެޗުގައި މި މަހުގެ 12 ވަނަ ދުވަހު ބައްދަލުކުރާނީ ޖިއްދާ ކުލަބާއެވެ. މިއީވެސް ސައުދީގެ ދެ ވަނަ ފަންތީގެ ޓީމެކެވެ.
މާޒިޔާއިން ސައުދީގައި ކުރާ ކޭމްޕަށް ނިންމާލުމަށްފަހު އެނބުރި ރާއްޖެ އައުމަށް ހަމަޖެހިފައިވަނީ މި މަހުގެ 14 ވަނަ ދުވަހުއެވެ. އޭއެފްސީ ކަޕުގެ ގްރޫޕް ޑީ ގެ މެޗުތަކަށް ތައްޔާރުވުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހޯދައިދިން ފުރުސަތެކެވެ.
އޭއެފްސީ ކަޕުގެ ގްރޫޕް ސްޓޭޖުގައި މާޒިޔާ ހިމެނެނީ އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ބަޝުންދުރަ ކިންގްސް އާއި އެއް ގްރޫޕެއްގައެވެ. މި ގްރޫޕުގެ ހަތަރު ވަނަ ޖާގަ ލިބޭނީ ޕްލޭއޮފް މެޗުގައި ކްލަބް އީގަލްސް އާއި އިންޑިއާގެ ބެންގަލޫރް އެފްސީ ވާދަކުރާ މެޗުން މޮޅުވާ ޓީމަކަށެވެ.
ކުލަބު އީގަލްސް އާއި އިންޑިއާގެ ބެންގަލޫރު އެފްސީ ބައްދަލުކުރާ ޕްލޭއޮފް މެޗު ކުޅޭނީ މި މަހުގެ 15 ވަނަ ދުވަހު މާލޭގައެވެ. އަދި އެއަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ މި މަހުގެ 18، 21 އަދި 24 ވަނަ ދުވަހުއެވެ.
ކޮމެންޓު ފޮނުވާ