އިސްރާއީލުގެ ކުންފުންޏަކުން އޮޕަރޭޓް ކުރަމުންއައި، ތެޔޮ އުފުލާ އާގުބޯޓަަކަށް ދީފައިވާ ޑްރޯން ހަމަލާއާއި ގުޅިގެން، ބަދަލު ހިފުމުގެ ގޮތުން އިސްރާއީލުން އޮތީ އިރާނަށް ހަމަލާ ދިނުމަށް ތައްޔާރަށްކަމަށް ވިދާޅުވެ، އިސްރާއީލުގެ ޑިފެންސް މިނިސްޓަރ ބެނީ ގާންޒް އިރާނަށް އިންޒާރު ދީފިއެވެ.
އިސްރާއީލުގެ ޑިފެންސް މިނިސްޓަރ އިރާނަށް އިންޒާރު ދީފައި މިވަނީ، އޮމާންގެ ބޭރުން އަރަބިއަން ކަނޑުގައި ދަތުރު ކުރަމުން ދަނިކޮށް، މި އޮއިލް ޓޭކަރަށް ދިން ޑްރޯން ހަމަލާގައި އޮއިލް ޓޭންކަރުގައި މަސައްކަތް ކުރަމުންދިޔަ ދެ މުވައްޒިފަކު މަރުވެފައިވާ މިހާދިސާއާއި ގުޅިގެން، އިސްރާއީލުން އެގައުމުގެ އެކުވެރިގައުމުތަކަށް ލޮބީ ކޮށްގެން ޔޫއެން މެދުވެރިކޮށް އިރާނާ ދެކޮޅަށް ފިޔަވަޅު އެޅުމަށް މަސައްކަތް ކުރަމުންދާ ދަޑިވަޅެއްގައެވެ.
މާރކަރ ސްޓްރީޓް ނަމަކަށް ކިޔާ މި އޮއިލް ޓޭންކަރއަކީ، އިސްރާއީލުގެ ބިލިއަނަރއެއްގެ ކުންފުންޏަކަށް ނިސްބަތްވާ ޓޭންކަރ އެކެވެ.
އިސްރާއީލެކޭ އެއްފަދައިން އެމެރިކާ އަދި އިގިރޭސިވިލާތުންވެސް ވަނީ، މިހަމަލާގެ ޒިންމާ އިރާނުން ނަގަން ޖެހޭނެ ކަމަށް ބުނެފައެވެ. އެހެންނަމަވެސް، މިއިން އެއްވެސް ގައުމަކުމަކުން، މި ތުހުމަތުތަކާ ގުޅޭ އެއްވެސް ހެއްކެއް ނުވަތަ އިންޓެލިޖެންސް މައުލޫމާތެއްވެސް އާންމު ކޮށްފައެއް ނުވެއެވެ.
އިރާނުން ފާއިތުވެދިޔަ ތަނުގައި، އެގައުމުން ތާއީދުކުރާ ހަގުރާމަވެރި ޖަމާއަތްތައް މެދުވެރިކޮށް ޑްރޯން ހަމަލާތައް ދީފައިވި ނަމަވެސް، މި ހަމަލާގައި އެއްވެސް ބައިވެރިވުމެއް ނޯންނާނެ ކަމަށްވަނީ ބުނެފައެވެ.
އިސްރާއީލުގެ ކުންފުންޏެއް ކަމުގައިވާ ޒޮއިޑިއަކް މެރިޓައިމް އިން އޮޕަރޭޓް ކުރާ ތެޔޮ އުފުލާ އާގު ބޯޓެއްކަމުގައިވާ މާރކާރ ސްޓްރީޓް އަށް ދިން މި ޑްރޯން ހަމަލާގައި ބޯޓުގެ ދެފަޅުވެރިޔަކު ވަނީ މަރުވެފައެވެ. މަރުވެފައިވަނީ، ބޯޓުގައި މަސައްކަތް ކުރަމުންދިޔަ ރޫމޭނިއާ މީހަކާއި އިގިރޭސިވިލާތުގެ މީހެކެވެ.
އިގިރޭސިވިލާތުގެ ލަންޑަރުގައި ހުންނަ ޒޮއިޑިއަކް އޮފީހުގެ ވެބްސައިޓުގައި ބުނެފައިވަނީ، އަރަބިއަން ކަޑުގައި ދަތުރު ކުރަމުން ދަނިކޮށް، ލައިބީރާގެ ދިދަ ޖަހާފައިވާ، ޖަޕާނު މީހެއްގެ މި އާގުބޯޓަށް ދީފައިވާ މިހަމަލާ އަދިވެސް ދަނީ ތަހުގީގު ކުރަމުންނެވެ.
ރެފިނިޓިވް ޝިޕް ޓްރެކިންއިން ދައްކާ ގޮތުގައި، މެދު މިނުގެ ސައިޒުގެ ތެޔޮ އުފުލާ އާގު ބޯޓެއް ކަމުގައިވާ މާރކަރ ސްޓްރީޓް ދަތުރު ކުރަމުން ދިޔައި، ޓެންޒޭނިއާގެ ދާރުއްސަލާމްއިން، ޔުނައިޓެޑް އަރަބް އެމިރޭޓްސްގެ އޮއިލް ޓާމިނަލް އަދި ބަންކަރިންގ ޕޯޓެއް ކަމުގައިވާ ފުޖައިރާ އަށެވެ.
ކޮމެންޓު ފޮނުވާ