ރާއްޖޭގައި ބާއްވާ އޭއެފްސީ ކަޕްގެ ދެކުނު އޭޝިއާގެ ގްރޫޕުގެ މެޗުތަކަށް ތައްޔާރުވުމުުގެ ގޮތުގައި ސައުދީ އަރަބިއްޔާގައި މިހާރު ކޭމްޕުކުރަމުން އަންނަ މާޒިޔާއިން އެ ގައުމުގެ އަލް އިއްތިހާދުގެ 19 އަހަރުން ދަށުގެ ޓީމު ބަލިކޮށްފިއެވެ.
މި މެޗު މާޒިޔާއިން ކާމިޔާބުކުރީ ފަހަތުން އަރައި 2-1 ގެ ނަތީޖާއަކުންނެވެ. މި މެޗުގައި މާޒިޔާގެ ލަނޑުތައް ޖަހައިދިނީ ފޯވާޑް ކޮނޭލިއަސް ސްޓެވާޓް (ކޯނޭ) އާއި ނާއިޒު ހަސަން (ދާދު) އެވެ. މިއީ ސައުދީގައި މިހާރު ޓްރެއިނިން ކޭމްޕް ފުރިހަމަ ކުރަމުންދާ މާޒިޔާއިން އެޤައުމުގައި ކުޅުނު ފުރަތަމަ މެޗެއެވެ.
މާޒިޔާއިން ސައުދީގައި ކުރާ ކޭމްޕަށް ހަފުތާއެއް ވެފައިވާއިރު އެ ޓީމު އެނބުރި ރާއްޖެ އައުމަށް ހަމަޖެހިފައިވަނީ މި މަހުގެ 14 ވަނަ ދުވަހުއެވެ. އޭއެފްސީ ކަޕުގެ ގްރޫޕް ޑީ ގެ މެޗުތަކަށް ތައްޔާރުވުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ހޯދައިދިން ފުރުސަތެކެވެ.
އޭއެފްސީ ކަޕުގެ ގްރޫޕް ސްޓޭޖުގައި މި ވަގުތު އޮތީ މާޒިޔާގެ އިތުރުން އިންޑިއާގެ މޯހަން ބަގާން އާއި ބަންގްލަދޭޝްގެ ބަޝުންދަރާ ކިންގްސްއެވެ. މި މުބާރަތަށް ތައްޔާރުވުމުގެ ގޮތުން މާޒިޔާއިން ސައުދީގައި ތަމްރީނުތައް ހަދަމުން އަންނައިރު، މިދިޔަ މަހުގެ 10 ވަނަ ދުވަހު އެ ޓީމުން ވަނީ މާލޭގައި ތަމްރީނުތައް ފަށާފައެވެ.
އޭއެފްސީ ކަޕުގެ ގްރޫޕް ސްޓޭޖުގައި މާޒިޔާ ހިމެނެނީ އިންޑިއާގެ އޭޓީކޭ މޯހަން ބަގާން އާއި ބަންގްލަދޭޝްގެ ބަޝުންދުރަ ކިންގްސް އާއި އެއް ގްރޫޕެއްގައެވެ. މި ގްރޫޕުގެ ހަތަރުވަނަ ޖާގަ ލިބޭ ޓީމެއް ޔަގީންވާނީ މާލޭގައި ކުޅޭ ޕްލޭއޮފް މެޗަށްފަހު އެވެ. މި މެޗުގައި ބައްދަލުކުރަނީ ރާއްޖޭގެ ކުލަބް އީގަލްސް އާއި އިންޑިއާގެ ބެންގަލޫރު ސިޓީ އެފްސީއެވެ. މި މެޗުން މޮޅުވާ ޓީމަކަށް ގްރޫޕްސްޓޭޖުން ޖާގަ ލިބޭނެއެވެ.
އޭއެފްސީން މިހާރު ނިންމާފައިވާ ގޮތުން ރާއްޖޭގެ ކުލަބު އީގަލްސް އާއި އިންޑިއާގެ ބެންގަލޫރު އެފްސީ ބައްދަލުކުރާ ޕްލޭއޮފް މެޗު ކުޅޭނީ މި މަހުގެ 15 ވަނަ ދުވަހުއެވެ. އަދި އެއަށްފަހު ގްރޫޕް ސްޓޭޖުގެ މެޗުތައް ކުރިއަށްދާނީ މި މަހުގެ 18، 21 އަދި 24 ވަނަ ދުވަހުއެވެ.
ކޮމެންޓު ފޮނުވާ