ދުވަސްތަކަކު ނުފެނި ހުރުމަށް ފަހު ޓިވީ އެކްޓްރެސް ދްރަޝްތީ ދާމީ ވަރަށް ތަފާތު ޑްރާމާ އަކުން ފެނިގެން ދާނެ ކަން ޔަގީން ކޮށްދީފިއެވެ.
ސިލްސިލާ ޑްރާމާ "ގީތް: ހުއި ސަބްސޭ ޕިޔާރީ"، "ސިލްސިލާ ބަދަލްތޭ ރިޝްތޯކާ"، "އެކްތާ ރާނީ އެކްތާ ރާޖާ" އަދި "މަދުބާލަ" ފަދަ މަގުބޫލު ޑްރާމާތަކެއް ކުޅެފައިވާ ދްރަޝްތީ އެންމެ ފަހުން ފެނިގެން ގޮސްފައިވަނީ 2016 އިން 2017 އަށް ގެނެސްދީފައިވާ ޑްރާމާ "ޕަރްދޭސް މެހޭ މޭރާ ދިލް" އިންނެވެ.
ޑިޒްނީ ޕްލަސް ހޮޓްސްޓާއިން ގެނެސްދޭ "ދަ އެމްޕަޔާ" އަކީ ގަޑުވަރުތެރޭގައި ހިނގާ ތަފާތު ކަންތަށްތަކެއް ދައްކުވައިދޭ ޑްރާމާއެކެވެ. މި ޑްރާމާގައި ދްރަޝްތީ ފެނިގެން ދާނީ "ވޯރިއާ ޕްރިންސަސް" އެއްގެ ގޮތުގައެވެ. މިއީ ދްރަޝްތީ މިފަދަ ރޯލެއް ކުޅޭ ފުރަތަމަ ފަހަރެއެވެ. މީގެ އިތުރުން ޑިޖިޓަލް ޕްލެޓްފޯމްގައި އޭނާގެ ފުރަތަމަ ފެނިލުމަކީ ވެސް މިއެވެ.
View this post on Instagram
"ދަ އެމްޕަޔާ"ގެ ޑައިރެކްޓަރަކީ ނެޝެނަލް އެވޯޑް ލިބިފައިވާ ނިކިލް އަދުވާނީއެވެ. މި ރޯލާއި ބެހޭގޮތުން ވާހަކަ ދައްކަމުން ދްރަޝްތީ ބުނެފައިވަނީ އޭނާގެ ކެރިއަރުގައި ތަފާތު، ގިނަ ރޯލްތަކެއް ކުޅެވިފައި ވީ ނަމަވެސް މި ސީރީޒްގައި އޭނާ ފެނިގެންދާ ގޮތް މުޅިން ތަފާތު ކަމަށެވެ.
މި ޑްރާމާގައި އޭނާގެ ފަސްޓް ލުކް ދައްކާލައިފައި ވާއިރު އޭނާގެ ރޯޔަލްޓީ ވަރަށް ރަނގަޅަށް ވަނީ ދައްކުވައިދީފައެވެ. މި ޑްރާމާ ވަރަށް އަވަހަށް ބެލުންތެރިން ނަށް ފެނިގެން ދާނެއެވެ.
