އައްސޭރި ޖަލަށް ވަންދަން މަސައްކަތް ކުރި މަސްތުވާތަކެތި މޯލްޑިވަސް ކަރެކްޝަނަލް ސާވިސްއިސް އިން އަތުލައިގަނެފިއެވެ.
ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ކުރެއްވި ޓްވީޓެއްގައި ވިދާޅުވީ ރޭ ލިބުނު މައުލޫމާތަކައި ގުޅިގެން އައްސޭރި ޖަލުގެ އޮފިސަރުން ހިންގި އޮޕަރޭޝަނެއްގައި ޖަލަށް ވެއްދުމަށްޓަކައި އެޖަލުގައި ޕޮޓުކޮއްފައިވާ މަސްތުވާތަކެތި ޖަލުގެ އޮފިސަރުން ހޯދާފައިވާކަމަށެވެ. މިތަކެތި މިހާރު ފުލުހުންނާއި ހަވާލު ކުރެވިފައި ވާކަމަށް އަހުމަދު ވަނީ ވިދާޅުވެފައެވެ.
ރޭ ލިބުނު މައުލޫމާތަކައި ގުޅިގެން އައްސޭރި ޖަލުގެ އޮފިސަރުން ހިންގި އޮޕަރޭޝަނެއްގައި ޖަލަށް ވެއްދުމަށްޓަކައި އެޖަލުގައި ޕޮޓުކޮއްފައިވާ މަސްތުވާތަކެތި އެޖަލުގެ އޮފިސަރުން ވަނީ ހޯދާފައި. މިތަކެތި މިހާރުވަނީ ފުލުހުންނާއި ހަވާލު ކުރެވިފައި. 1/2 pic.twitter.com/ooWiUosgYg
— Ahmed Mohamed (@ahumadhumohamed) July 28, 2021
ޖަލަށް މަސްތުވާތަކެއްޗާއި ފޯނުތައް ވެއްދުމަށް ވަރަށް ގިނައިން މަސައްކަތް ކުރެއެވެ. ފުލުހުންނާއި ޖަލުގެ އޮފިސަރުން ގުޅިގެން ހިންގާ އެކި އޮޕަރޭޝަންތަކުގައި މި ފަދަ ގިނަތަކެތި ވަނީ އަތުލައިގެންފައިއެވެ.
ޖަލަށް ވެއްދުން މަނާތަކެތި ވައްދާ މައްސަލައަށް ހައްލު ހޯދުމަށް ކަރެންޝަނުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އައްސޭރި ޖަލުގެ ޖަލުގެ ވަށާފާރު އުސްކުރުމުގެ ޕްރޮޖެޓް މިހާރުވަނީ ބަޔަކާއި ހަވާލުކުރެވިފައިވާކަމަށާއި، މިމަހުގެ 29 ވަނަ ދުވަހު މިކަމުގެ އަމަލީ މަސައްކަތް ފެށިގެންދާނެކަމަށް އަހުމަދު ވިދާޅުވިއެވެ.
ގަވާއިދާއި ޚިލާފަށް އައްސޭރި ޖަލަށް ވައްދާ ތަކެތި ހުއްޓުވުމަށާއި، ފާރުމަތިން ޖަލު ތެރެއަށް ވެއްދުން މަނާތަކެތި އުކާ މައްސަލައަކަށް މިއާއިއެކު ހައްލު ލިބިގެންދާނެކަމަށް ސީޕީ އަހުމަދު ވިދާޅުވިއެވެ.
