އަންނަ މަހު ބާއްވާ އޭއެފްސީ ކަޕް ފުޓްބޯޅަ މުބާރާތައް ތައްޔާރުވާން މާޒިޔާ ސްޕޯޓްސް އެންޑް ރެކްރިއޭޝަނުން ސައުދީ އަރަބިއްޔާގައި ކޭމްޕުކޮށްފިއެވެ.
މާޒިޔާއިން މިއަދު ސައުދީގައި ކޭމްޕްކޮށްފައިވާއިރު، މިއީ ފުޓްބޯޅަ އެސޯސިއޭޝަން އޮފް މޯލްޑިވްސް އިން މާޒިޔާއަށް ހޯދައިދިން ޓްރެއިނިންގ ކޭމްޕްކެއެވެ. ކޭމްޕް ނިންމާލުމަށްފަހު މާޒިޔާ މާލެ އައުމަށް ހަމަޖެހިފައިވަނީ އަންނަ މަހުގެ 14 ވަނަ ދުވަހުއެވެ.
އޭއެފްސީ ކަޕް ފުޓްބޯޅަ މުބާރާތުގައި މާޒިޔާ ހިމެނެނީ ގްރޫޕް ޑީ ގައެވެ. މި ގްރޫޕްގެ މެޗުތައް ބާއްވާނެ ޤައުމެއް ކަނޑައެޅުމަށް ބިޑް ކުރުމަށް ހުޅުވާލި ފުރުޞަތުގައި ރާއްޖެއިން ވަނީ ބިޑްކޮށް ތިން ވަނަ ފަހަރަށް ބިޑް ކާމިޔާބުކޮށްފައެވެ. އެހެންކަމުން އަންނަ މަހު 18 އިން 24 ގެ ނިޔަލަށް މާޒިޔާ ހިމެނޭ ގްރޫޕްގެ މެޗުތައް ކުޅޭނީ މާލޭ ރަސްމީ ފުޓްބޯޅަ ދަނޑުގައެވެ.
މާޒިޔާ އާއެކު މި ގްރޫޕްގައި ދެން ހިމެނޭ ޓީމް ތަކަކީ، އިންޑިއާގެ އޭޓީކޭ މޯހަން ބަގާން، އަދި ބަންގްލަދޭޝްގެ ބޮށުންދަރާ ކިންގްސް އެވެ. ގްރޫޕްގެ ފަހު ޖާގަ ލިބޭނީ ރާއްޖޭގެ ކްލަބް އީގަލްސް ނުވަތަ އިންޑިއާގެ ބެންގަލޫރް އެފްސީއަށެވެ. މި ދެ ޓީމް ކުޅެން ޖެހޭ ޕްލޭއޮޕް މެޗު އަންނަ މަހުގެ 15 ވަނަ ދުވަހު ކުޅޭނީ މާލޭގައެވެ. މި މެޗުން މޮޅުވާ ޓީމެއް ގްރޫޕް ސްޓޭޖަށް ކޮލިފައިވާނެއެވެ.
ކޮމެންޓު ފޮނުވާ