މި ހަފްތާގެ ހޯމަދުވަހު ފަލަސްތީނުގެ ރައީސް މަހުމޫދު އައްބާސަށް ގުޅުއްވާ ދެފަރާތުގެ މެދުގައި އިތުބާރު އުފެއްދުމުގެ ގޮތުން މަޝްވަރާ ކުރައްވާފައިވާ ކަމަށް، އިސްރާއީލުގެ ޑިފެންސް މިނިސްޓްރ ބެނީ ގާންޒް ވިދާޅުވެއްޖެއެވެ.
މިއީ، އިސްރާއީލުގެ ކުރީގެ ބޮޑުވަޒީރު ނަތަންޔާހޫގެ ސަރުލާރު ބަދަލުކޮށް، ފާއިތުވެދިޔަ މަހު ވެރިކަމަށް އައި އިސްރާއީލުގެ އާ ސަރުކާރުން ފަލަސްތީނާއި އިސްރާއީލުގެ އިސް އޮފިޝަލުން ސީދާކޮށް ވާހަކަ ދައްކާފައިވާކަން އާންމު ކުރި ފުރަތަމަ ފަހަރެވެ.
އިސްރާއީލުގައި މިހާރު ވެރިކަން ކުރަމުންދަނީ، ވާތުފިޔައިގެ ޕާޓީތަކާއި، އަދި ކަނާތު ފިޔައިގެ ޕާޓީތަކާއި މެދުމިނަށް ތާޢީދުކުރާ ޕާޓީތަކުގެ އިތުރުން، އިސްރާއީލުގެ އަރަބި ޕާޓީތައްވެސް ހިމެނޭގޮތުން، ގިނަ ކަންކަމުގައި ޚިޔާލު ތަފާތުވުން ބޮޑެތި ޕާޓީތަކުން އެކުވެގެން އުފައްދާފައިވާ ކޯލިޝަނަކުންނެވެ.
ގިނަ އަޮފިޝަލުން ވިދާޅުވެފައިވާ ގޮތުގައި އިސްރާއީލުގައި އުފައްދާފައިވާ ކޯލިޝަންގެ މައިގަޑު މަގުސަދަކަށް ވެގެންދާނީ، ބައިނަލް އަގުވާމީ މަސްރަހުން ފާހަގަ ކުރެވޭ ކަންކަމުގައި ސިޔާސަތުތަކަށް ބަދަލު ގެނައުމުގެ ބަދަލުގައި، އިސްރާއީލުގެ އެތެރޭގެ ކަންކަމުގައި އިސްލާހީ ބަދަލުތައް ގެނައުމެވެ. މިގޮތުން މި ކޯލިޝަނުން، އިސްރާއީލުން ޒަމާނުއްސުރެ ގެންގުޅެމުން އަންނަ، ފަލަސްތީނާއި ގުޅުންހުރި ސިޔާސަތުތކަށް ބަދަލުތަކެއް ގެނައުމަކީ ނާދިރު ކަމެއްކަމުގައިވެސް އޮފިޝަލުން ދެކެއެވެ.
އިސްރާއީލުގެ ޑިފެންސް މިނިސްޓަރ ގާންޒް ވިދާޅުވެފައިވާ ގޮތުގައި އޭނާވަނީ، މަހުމޫދު އައްބާސަށް އަޟުހާ އީދުގެ ތަހުނިޔާ ވިދާޅުވެފައެވެ.
"ދެފަރާތަުގެ ދެމެދުގައި ދެކެވުނީ ވަރަށް އުފެއްދުންތެރި ވާހަކަތަކެއް، އަދި ދެފަރާތުންވެސް އިތުބާރު އުފެއްދުމުގެ މުހިންމު ކަން ކަމާގުޅޭގޮތުން އެއްބަސްވޭ، ސަބަބަކީ، އެއީ އިސްރާއީލާއި އަދި ފަލަސްތީން އޮތޯރިޓީއަށްވެސް އިގްތިސާދީ ގޮތުން ފައިދާހުރި، އަދި ސަލާމަތީ ގޮތުން މުޅި ސަރަހައްދަށްވެސް އެންމެ ފައިދާހުރި ގޮތް ކަމަށް ވާތީ،" ގާންޒީގެ އޮފީހުން ނެރުނު ބަޔާނެއްގައި ބުނެފައި ވެއެވެ.
މަހުމޫދު އައްބާސްގެ އޮފީހުންވެސް މިވާހަތައް ކުރިޔަށް ދިޔަކަން ޔަގީން ކޮށްދީފައި ވެއެވެ. އެހެންނަމަވެސް ވާހަކަތަކުގެ ތަފްސީލެއް އައްބާސްގެ އޮފީހުން ހާމަ ކޮށްފައެއް ނުވެއެވެ.
އިސްރާއީލުގެ އާރައީސް ވިދާޅުވެފައިވަނީ، އޭނާ ފާއިތުވެދިޔަ ހަފްތާގައި މަހުމޫދު އައްބާސްއާއ ވާހަކަ ދައްކަވާފައި ވާކަމަށެވެ. އަދި ވާހަކާގައި މަހުމޫދު އައްބާސްވަނީ އިސްރާއީލުގެ އާރައީސަށް މަރުހަބާ ވިދާޅުވެފައެވެ.
އިސްރާއީލުގެ ރައީސްގެ މަގާމަކީ ގިނަ ކަންކަމުގައި ރަމްޒީ މަގާމެކެވެ.
ކޮމެންޓު ފޮނުވާ