އިސްލާމް ދީނާއި ދެކޮޅަށް ހިންގޭ ކަންކަމާދެކޮަޅަސް އެމީހުންގެ ވަގުތުންނާއި، މުދަލުންނާއި، އީޖާދުތަކުން، އިސްލާމް ދީނަށްޓަކައި ޤުރްބާންވާން ކެރޭ މީހުންނަށް މިއަދު ބޭނުންވެފައި ވާކަމަށް އަޟަޙާ ޢީދުގެ ޚުޠުުބާގައި ވިދާޅުވެއްޖެ އެވެ.
މިއަދު މުޅިދުނިޔޭގައި ފާހަކުރަމުންގެންދާ އަޟަޙާ ޢީދުގެ، ޢީދު ނަމާދުގައި ރާއްޖޭގެ މިސްކިތްތަކުގައި ދިން ޚުޠުުބާގައި ވަނީ އަޟަޙާ ޢީދުގެ ބަރަކާތްތެރިކަމަށް އަލިއަޅުއްވާ ލައްވާފަ އެވެ. އެގޮތުން އަޟަޙާ ޢީދަކީ ޤުރުބާނީގެ ދުވަސް ކަމަށާއި މާތްﷲ ސަލާމްލެއްވި އިބްރާހީމްގެ ފާނާއި ދަރިކަލުން އިސްމާޢީލްގެ ފާނަސް ކުރިމަތި ކުރެއްވި ބޮޑު އިމްތިޙާނުން ފާސްވެވަޑައިގަތުމުން މާތް ﷲ އެދެބަފައިކަލުންނަށް ތަޢުރީފްގެ ބަސް ވަޙީކުރެއްވި ދުވަސް ކަމަށް ޚުޠުުބާގައި ވަނީ ވިދާލުވެފަ އެވެ.
"އިބްރާހީމުގެފާނުގެ މި އިމްތިޙާނުގައި، އެކަލޭގެފާނުގެ ދަރިކަލުން އިސްމާޢީލުގެފާނު ބޮޑު ދައުރެއް އަދާކުރެއްވިއެވެ. އެއީ ﷲ ގެ އަމުރުފުޅަކަށް ވާތީ، އެކަލޭގެފާނުގެ ބައްޕާފުޅަށް ކިޔަމަންވެވަޑައިގަތް ގޮތް ނިކަން ދެކެބަލާށެވެ"
– ޚުޠުުބާ
މި ޙާދިސާގައި އިސްމާޢީލުގެފާނު ދެއްކެވި ކިޔަމަންތެރިކަމުގެ ނަމޫނާ އަކީ، މިއަދުގެ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށްވެސް ޚުޠުުބާގައި ވަނީ ވިދާޅުވެފަ އެވެ. އެއީ މާތް ﷲ އަށް ކިޔަމަންގަތުމަށް ފަހު، މައިންބަފައިންގެ ބަސް އަހަން ޖެހޭނެކަމުގެ ހެޔޮ މިސާލެވެ.
އިސްލާމީ އުއްމަތް މި ޙާދިޘާ އިން ޢިބްރަތް ޙާޞިލު ކުރަން ޖެހިފައި ވީވަނަމެސް މިއަދު ފެންނަމުން ދަނީ، އިސްލާމް ދީނަށް، ފާޅުގައި އިހާނެތި ކޮށް ހިތަމުން އަންނަ ތަން ކަމަށްވެސް ޚުޠުުބާގައި ވަނީ ވިދާޅުވެފަ އެވެ.
އެގޮތުން ކީރިތި ޤުރްއާނަށް އިހާނެތި ކޮށް ހިތުމާއި ނަބިއްޔާއަށް ފުރައްސާރަ ކުރުމާއި، މުސްލިމުންގެ މުޤައްދަސް ތަންތަނަށް އަރައި، އެތަންތަން ފޭރިގަންނަ ތުމާއި، މުސްލިމު ވެރީންގެ އަބުރަށާއި ފުރާނައަށް އަރައިގަތުމާއި، އިސްލާމީ ޤައުމުތަކުގެ އިންތަކުގެ ޙުރުމަތް ކަނޑަމުން ދާކަމަށްވެސް ޚުޠުުބާގައި ވަނީ ވިދާޅުވެފަ އެވެ.
"މުސްލިމް ޢިލްމުވެރިންގެ ޤަދަރު ވައްޓައިލަމުންނެވެ. އިސްލާމީ ޔުނިވަސިޓީތަކާއި، މަތީ ތަޢުލީމުދޭ މަރުކަޒުތަކުގެ މަންހަޖުތައް ބަދަލުކުރުމަށް ފިއްތުންތައް ކުރިމަތި ކުރުވަމުންނެވެ. އިސްލާމް ދީން، މި ވަނީ އެ ދީނުގެ ވަތަނުގައި ބީރަށްޓެހި ކޮށްފައެވެ. ސައްތަ އިން ސައްތަ އިސްލާމީ ޤައުމެއް އޮވެގެން ނުވާނެ ކަމަށް ދަނީ، އަޑު އުފުލަމުންނެވެ. މުސްލިމުންގެ ޙައްޤުތަކަށް ދަނީ އަރައިގަންނަމުންނެވެ."
– ޚުޠުުބާ
އެހެންކަމުން އިސްލާމްދީނުގެ އަދުއްވުންގެ މިފަދަ ޢަމަލުތަކާ ދެކޮޅަށް މުސްލިމުންގެ ވަގުތުންނާއި، މުދަލުންނާއި، އީޖާދުތަކުން، އިސްލާމް ދީނަށްޓަކައި ޤުރްބާންވާން ކެރޭ މީހުންނަށް މިއަދު ބޭނުން ވެފައި ވާކަމަށް ޚުޠުުބާގައި ވަނީ ވިދާޅުވެފަ އެވެ. އަދި އިސްލާމް ދީނުގެ ބުރުސޫރަ ހުތުރުކުރުވާ މީހުންނަށް ނޫނެކޭ ބުނަން ކެރޭވަރުގެ މުސްލިމް ދަރިންނަށް މިއަދު ބޭނުންވެފައި ވާކަމަށްވެސް ޚުޠުުބާގައި ވިދާޅުވި އެވެ.
ޢީދަކީ މިނިވަންކަމުގެ ޢީދެއް ކަމަށާއި ޢީދު ވާންޖެހޭނީ ނަފްސުތައް ޝަހަވަތްތަކުން މިނިވަން ކޮށްދޭ އީދަކަށް ކަމަށް ޚުޠުުބާގައި ވިދާޅުވި އެވެ. އަދި ޙަސަދަވެރިކަމުންނާއި، ރުޅިވެރިކަމުން ހިތްތައް ޠާހިރުކޮށް ޢީދުގެ ދުވަސްތުގައި މާތް ﷲ ގެ އަމުރުފުޅާ އެއްގޮތަށް، އުފާ ކުރުމަށްވެސް ޚުޠުުބާގައި ވަނީ ގޮވާލައްވާފަ އެވެ.
