ބޮލީވުޑްގެ މަޝްހޫރު މިއުޒިކް ކުންފުނި ޓީ-ސީރީޒްގެ ވެރިޔާ ބޫޝަން ކުމާރުގެ މައްޗަށް ޖިންސީ ގޯނާގެ މައްސަލައެއް އުފުލައިފި އެވެ.
ސެކްޝަން އައިޕީސީ 276 ގެ ދަށުން ރޭޕްގެ ތުހުމަތުކޮށް ބޫޝަން ކުމާރާއި ދެކޮޅަށް މި ދައުވާ ރެޖިސްޓާ ކޮށްފައިވަނީ އުމުރުން 30 އަހަރެއްގެ އަންހެނެކެވެ.
މި މައްސަލައާއި ގުޅިގެން ގިނަ މައުލޫމާތުތަކެއް ހާމަކޮށްފައި ނުވި ނަމަވެސް އަންހެންމީހާ މި މައްސަލަ ހުށައަޅާފައިވަނީ ބޫޝަން ކުމާރުގެ ޕްރޮޖެކްޓް ތަކުގައި މަސައްކަތް ކުރުމަށް ވަޒީފާ ދޭނެކަމަށް ބުނެ އެ އަންހެން މީހާ އާއި މެދު އަމަލުކޮށްފައިވާ ގޮތުން ކަމަށް ރިޕޯޓްތަށް ބުނެއެވެ. މި މައްސަލަ ހުށައަޅާފައިވަނީ މުމްބައިގެ ޑީއެން ނަގަރް ޕޮލިސްޓޭޝަން އަށެވެ.
Mumbai | Case registered u/s 376 IPC against Bhushan Kumar, managing director, T-Series, at DN Nagar Police station on allegations of rape with a 30-year-old woman on the pretext of engaging her for a project at the company. Probe underway, no arrests made till now: Police
— ANI (@ANI) July 16, 2021
ފުލުހުންނާއި ހަވާލާދީ އިންޑިއާގެ ނިއުސް 18 އިން ބުނެފައިވަނީ މައްސަލާގައި މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށެވެ. އަދި މައްސަލަ ބަލަމުން އަންނަ ކަމަށާއި ބޫޝަން ކުމާރުގެ ބަޔާން ނެގުމުގެ މަސައްކަތް ކުރަމުންދާކަމަށް ވެސް އެ ނޫހުން ބުނެފައި ވެއެވެ.
މި މައްސަލައާއި ގުޅިގެން ޓީ-ސީރީޒުން ނެރުނު ބަޔާނެއްގައި ބުނެފައިވަނީ މިއީ ކަނޑައެޅިގެން ދޮގު ތަހުމަތު ތަކެއްކަމަށާއި މި މައްސަލައަކީ ހަދާފައިވާ އަސްލެއް ނެތް މައްސަލައެއް ކަމަށެވެ.
ޓީ-ސީރީޒްގެ މެނޭޖިންގ ޑިރެކްޓަރުގެ މަގާމުގައި ހުރި ބޫޝަން ކުމާރު ކުންފުންނާއި ހަވާލުވެފައި ވަނީ އޭނާގެ ބައްޕަ ގުލްޝަން ކުމާރުގެ މަރަށް ފަހު 1997 ގައިއެވެ. އެހެން ނަމަވެސް ބޫޝަން ކުމާރުގެ ފުރަތަމަ ފިލްމްގެ މަސައްކަތް ޓީ-ސީރީޒްގެ ފަރާތުން ކޮށްފައި ވަނީ 2001 ވަނަ އަހަރު އެވެ.
