ޕާކިން އާއި ގުޅުންހުރި ޖޫރިމަނާތައް ކުރެވެންވާނީ ޕާކްކުރެވޭނެ އެކަށީގެންވާ ޖާގަ ދެއްކުމަށް ފަހުގައިކަމަށް މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒު ވިދާޅުވެއްޖެއެވެ.

ގަވާއިދާ ޚިލާފަށް ޕާކުކުރުމުގެ ސަބަބުން އުޅަނދުގައި ޕާކިން ވަޔަލޭޝަން ސްޓިކާ ޖަހާ ކޮންމެ ފަހަރަކު އުޅަނދު ޕާކުކުރި މީހާގެ ލައިސަންސުން ފަސް ކްރެޑިޓް ޕޮއިންޓް އުނިކުރާ ގޮތަށް ހަމަޖައްސާ 100 ޕޮއިންޓްގެ ކްރެޑިޓް ހުސްވުމުން ލައިސަންސް ބާތިލުވާ ގޮތަށް އެއްގަމު އުޅަނދު ދުއްވުމުގެ ލައިސަންސް ދޫކުރުމުގެ އާ ގަވާއިދެއް ވަނީ ގެޒެޓްކޮށްފައެވެ.

މިގަވާއިދާއިއެކު ގިނަ ބައެއްގެ ކަންބޮޑުވުމާއި، ފާޑުކިޔުން ސަރުކާރަށް އަމާޒުވެފައިވާއިރު، މާލެ ސިޓީ ކައުންސިލުގެ މޭޔަރު އަދި ކުރީގެ ހައުސިން މިނިސްޓަރ ޑރ.މުހައްމަދު މުއިއްޒު ވިދާޅުވީ ޕާކިންއާއި ގުޅޭ ކަންކަމުގައި ޖޫރިމަނާއާއި ހަމައަށް ދާންޖެހޭނީ ޕާކް ކުރެވޭނެ ގޮތްތަކެއް ފަހިކޮށް ދިނުމަށް ފަހުގައިކަމަށެވެ. މާލެ ސިޓީ ކައުންސިލުން މާލޭގައި ޕާކް ކުރެވޭނެ މަގު ފަހިކޮށް ދެއްވުމަށް މިހާރު ފަށާފައިވާ މަސައްކަތުގައި ސަރުކާރުން ދޭންޖެހޭ އެއްބާރުލުންދީ މިކަން ފަސޭހަކަމާއިއެކު ކުރެވޭނެ މަގު ތަނަވަސް ކޮށްދެއްވަން ޖެހޭކަމަށް މުއިއްޒު ވިދާޅުވިއެވެ.

ޕާކިން އާއި ގުޅިގެން ޖޫރިމަނާ ކުރެވެންވާނީ އެކަށީގެންވާ ވަރަށް ޕާކު ކުރެވޭނެ ޖާގަ ފަހިކޮށް ދިނުމަށްފަހު ކަމުގައި ދެކެން. މާލެ ސިޓީ ކައުންސިލުން މާލޭގެ ޕާކިންއަށް ފަށާފައިވާ މަސައްކަތުގައި ރައްޔިތުންގެ ޚިޔާލާއި މަޝްވަރާއާއި އެއްކޮށް ނަތީޖާ ނެރުމުގެ ފުރުސަތު ދެވެން ވާނެކަމުގައި ދެކެން.

– މުއިއްޒު ވިދާޅުވިއެވެ.

އަލަށް އަމަލުކުރަން ފަށާފައިވާ ގަވައިދުގައި ވާގޮތުން ކޮންމެ ލައިސަންސް ކާޑަކަށް ވަނީ 100 ކްރެޑިޓް ޕޮއިންޓް ހަމަޖައްސާފަ އެވެ. އަދި ގަވައިދާ ހިލާފަށް ޕާކުކުރުމުގެ ސަބަބުން އުޅަނދުގައި ޕާކިން ވަޔަލޭޝަން ސްޓިކާ ޖަހާ ކޮންމެ ފަހަރަކު އުޅަނދު ޕާކުކުރި މީހާގެ ލައިސަންސުން 5 ޕޮއިންޓް އުނިކުރާ ގޮތަށް ވަނީ ކަނޑައަޅާފަ އެވެ. އަދި މިގޮތަށް ޕޮއިންޓް އުނިކުރަމުންގޮސް ޕޮއިންޓް ހުސްވުމުން ލައިސަންސް ބާތިލް ވާނެއެވެ.

މީގެ ކުރިން ލައިސަންސް ހިފެހެއްޓުމާއި ބާތިލް ކުރުން ފަދަ ފިޔަވަޅުތައް އަޅަނީ ނުރައްކާތެރިކޮށް ދުއްވުން ފަދަ ހާލަތްތަކުގައި އެކަންޏެވެ. ގަވާއިދާ ޚިލާފަށް ޕާކް ކުރުމުން، ކުރަނީ ހަމައެކަނި ޖޫރިމަނާ އެވެ.

ޕާކިން ވަޔަލޭޝަންގެ އިތުރުން ދެން ލައިސަންސުން ޕޮއިންޓް ކެނޑޭނެ އަދަދު ތަކަށް ބަލާއިރު، ނުރައްކާތެރިކޮށް ނުވަތަ ފަރުވާކުޑަކޮށް އުޅަނދު ދުއްވުމުގެ ސަބަބުން މީހެއްގެ ފުރާނައަށް ގެއްލުމެއް ލިބިއްޖެނަމަ އުޅަނދު ދުއްވި މީހާގެ ލައިސަންސުން 75 ޕޮއިންޓް އުނިވާނެ ކަމަށާއި އެފަދަގޮތަކަށް ދުއްވުމުގެ ސަބަބުން މީހެއްގެ ހަށިގަނޑަށް ގެއްލުމެއް ލިބިއްޖެނަމަ އުޅަނދު ދުއްވި މީހާގެ ލައިސަންސުން 50 ޕޮއިންޓް އުނިވާނެ ކަމަށް އައު ގަވައިދުގައި ވެއެވެ.

މީގެ އިތުރުން ވަންވޭއާ އިދިކޮޅަށް ދުއްވުމާއި ޓްރެފިކް ލައިޓާ ޚިލާފަށް ދެ ފަހަރަށް ވުރެ އިތުރަށް ދުއްވައިފި ނަމަ، ކޮންމެ ފަހަރަކު 10 ޕޮއިންޓް އުނި ކުރެވޭނެ ކަމަށް އެ ގަވާއިދުގައިވެ އެވެ. އަދި އެ ނޫން ކަންކަމުގައި ވެސް، ދެ ފަހަރަށް ވުރެ އިތުރަށް އެކަން ތަކުރާރު ކޮށްފި ނަމަ 10 ޕޮއިންޓް އުނި ކުރެވޭނެ ކަމަށް އެ ގަވާއިދުގައިވެ އެވެ. މީގެ އިތުރުންވެސް ލައިސަންސުން ޕޮއިންޓް ކެނޑޭނެ ގޮތްތައް ގަވައިދުގައި ވަނީ ކަނޑައަޅާފައެވެ.

މިގޮތަށް ޕޮއިންޓް އުނިވަމުންގޮސް 100 ޕޮއިންޓް ހުސްވުމުން ލައިސަންސް އޮޓަމެޓިކުން ބާތިލްވާނެ ކަމަށް ގަވައިދުގައި ވެއެވެ. މިގޮތަށް ލައިސަންސް ބާތިލްވެއްޖެ ނަމަ، އެ މީހަކަށް އާ ލައިސަންސެއް ލިބޭނީ 180 ދުވަސް ފަހުން ކަމަށާއި އަދި އާ ލައިސަންސް ލިބޭނީ އަލަށް ލައިސަންސް ނަގާ އުސޫލުން އިމްތިހާންތައް ފުރިހަމަ ކުރުމުން ކަމަށް ވެސް އެ ގަވައިދުގައި ބުނެފައި ވެއެވެ.

މާލެ ސިޓީ ކައުންސިލުން ދަނީ މާލޭގެ ޕާކިން މައްސަލަ ހައްލުކުރުމަށް މާލޭގައި ހުރި ގިނަ ހުސްބިންތަކުގައި ޕާކްކުރެވޭނެ މަގުފަހި ކުރަމުންނެވެ. އެގޮތުން މާލޭގެ އެކި ސަރަޙައްދުތަކުން ވެހިކަލް ޕާކްކުރުމަށް 450 ޖާގަ ކުއްޔަށް ދޭން ނިންމާފައިވާކަމަށް މާލޭ ސިޓީގެ މޭޔަރ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

މާލޭ ސިޓީގެ މޭޔަރ ވިދާޅުވެފައިވަނީ މާލޭގެ ޕާކިންގގެ މައްސަލަ ހައްލުކުރުމަށް ސިޓީ ކައުންސިލުގެ ސްޓްރެޓެޖިކް އެކްޝަން ޕްލޭންގައި ވަރަށް ގިނަ ކަންކަން ހިމެނިފައިވާނެކަމަށާއި، އޭގެ ތެރޭގައި ދާއިމީކޮށް އެކަން ހައްލުކުރެވޭނެގޮތާއި، ވަގުތީގޮތުން އެކަމަށް އެޅޭނެ ފިޔަވަޅުތައް ފާހަގަކޮށްފައިވާނެކަމަށެވެ. އަދި ސިޓީ ކައުންސިލުން މަސައްކަތްކުރަމުން ދަނީ ކަމާގުޅޭ އިދާރާތަކާއި ގުޅިގެން މިކަމަށް ވީ އެންމެ އަވަސް ހައްލެއް ގެނައުމަށްކަމަށްވެސް މޭޔަރ ވިދާޅުވެފައިވެއެވެ.