ޔޫރޯ ފުޓްބޯޅަ މުބާރާތުގެ މޮޅު ކުޅުންތެރިޔާގެ މަގާމު ހޯދި އިޓަލީގެ ގޯލްކީޕަރު ޖިއަންލުއީޖީ ޑޮންނަރުންމާ ފްރާންސްގެ ގަދަބާރު ޕީއެސްޖީ އަށް ސޮއިކޮށްފިއެވެ.
މި ފަހަރުގެ ޔޫރޯގައި އިޓަލީ ޗެމްޕިއަންކަން ހޯދިއިރު، ޑޮންނަރުންމާ ވަނީ މޮޅު ކުޅުމެއް ދައްކައިފައެވެ. ހާއްސަކޮށް ސެމީ ފައިނަލާއި ފައިނަލުގައި ޕެނަލްޓީ ޖަހައިގެން އިޓަލީ މޮޅުވިއިރު، ޑޮންނަރުންމާ ވަނީ ތަފާތު ދައްކާފައެވެ. ޑޮންނަރުންމާ ޕީއެސްޖީ އަށް ސޮއިކުރީ ފަސް އަހަރުގެ އެއްބަަސްވުމެއްގައެވެ. އޭނާ މިހާތަނަށް ކުޅެމުން އައީ އިޓަލީގެ އޭސީ މިލާން އަށެވެ. ޕީއެސްޖީއާ ގުޅުނީ މިލާނުން އެއްބަސްވުން އާ ކުރަން ހުށަހެޅި ނަމަވެސް އެހެން ޗެލެންޖެއް ނެގުމާއި ބޮޑު މުސާރައެއް ހޯދުމަށެވެ.
މިލާން ގޯލުގައި 25 އޮކްޓޫބަރު 2015، ވަނަ ދުވަހު ކުޅުނު މެޗާ އެކު ޑޮންނަރުންމާ ވެފައިވަނީ އިޓަލީގެ ފުޓްބޯޅަ ތާރީހުގައި ލީގުގެ މެޗެއްގައި ކުޅުނު ދެ ވަނަ އަށް އެންމެ ޒުވާން ގޯލްކީޕަރަށެވެ. މި ފަހަރުގެ ޓްރާންސްފާ މާކެޓްގެ ތެރޭގައި ޑޮންނަރުންމާގެ އިތުރުން ލިވަޕޫލްގެ ޖިއޮޖީނިއޯ ވައިނަލްޑަމް އާއި ރެއާލް މެޑްރިޑްގެ ސާޖިއޯ ރާމޯސް ވެސް ވަނީ ހިލޭ ޓްރާންސްފާއެއްގައި ޕީއެސްޖީ އަށް ސޮއިކޮށްފައެވެ.
މީގެ އިތުރުން އިންޓަ މިލާނަށް ކުޅެމުން އަންނަ މޮރޮކޯގެ ފުލްބެކް އަޝްރަފް ހަކީމީ ވަނީ 70 މިލިއަން ޑޮލަރުގެ ފީ އަކަށް ޕީއެސްޖީ އަށް ސޮއިކޮށްފައެވެ.
