ސަރުކާރާއި އިދިކޮޅު ޕާޓީތަކާއި، އިދިކޮޅު ސިޔާސީ ލީޑަރުންނާއި ގުޅިގެން ސަރުކާރު ވައްޓާލުމުގެ ޖާގަ އެމްޑީޕީގެ ރައީސް މުހައްމަދު ނަޝީދަށް ނުދެއްވައި، ރައީސް ނަޝީދު އެމްޑީޕީން ވަކި ކުރުމަށް އެޕާޓީގެ ކުރީގެ ނާއިބް ރައީސް އަލްހާން ފަހުމީ ގޮވާލއްވައިފިއެވެ.

އެމްޑީޕީގެ ރައީސް މުހައްމަދު ނަޝީދަށް ދިން ނުރައްކާތެރި ޓެރަރިސްޓް ހަމަލާއަށްފަހު، ރައީސް ނަޝީދު ވަނީ ރައީސް ޞާލިހުއަށާއި، ސަރުކާރުރަށް އިއްޔެ ވަރަށް ބޮޑަށް ފާޑުވިދާޅުވެފައެވެ. އަދި ރައީސް ޞާލިހާއިއެކު ސިޔާސީ ގޮތުން މަސައްކަތް ކުރައްވަން ބޭނުން ނުވާކަމަށްވެސް ނަޝީދު ވަނީ ވިދާޅުވެފައެވެ. އަލްހާން ވިދާޅުވީ ނަޝީދުގެ ކަންކަން މިހާރު މާބޮޑަށް ގޯސްވެފައިވާކަމަށެވެ. ނަޝީދަށް އިތުރަށް ގޯސްހަދަން ފުރުސަތު ނުދީ ޕާޓީން ވަކި ކުރަންޖެހޭކަމަށް އަލްހާން ވިދާޅުވިއެވެ.

އަންނި ޕާޓީން ވަކިކުރަންޖެހޭ! އިދިކޮޅު ލީޑަރާ ގުޅިގެން ސަރުކާރު ވައްޓާލަން އުޅުމަކީ ކުރެވިގެންވާނެ ކަމެއް ނޫން!

– އަލްހާން ވިދާޅުވިއެވެ.

ރައީސް އިބްރާހިމް މުހައްމަދު ސޯލިހާއެކު ސިޔާސީ ގޮތުން ހުންނެވެން ނެތްކަމަށް ވިދާޅުވެ އެމަނިކުފާނާއި ދެކޮޅަށް ނަޝީދު ނިކުންނެވުމަށް ކުރައްވާ މަސައްކަތާއި ގުޅިގެން އަލްހާން ވިދާޅުވީ ރައީސް ނަޝީދު ކުރިން ބުނަމުން ދިޔައީ ރައީސް ނަޝީދާއި އެކު އޮތް ގުޅުމަކީ ދުވަހަކުވެސް ވަކި ނުވާނެ ގުޅުމެއްކަމަށެވެ. ނަމަވެސް މިއަދު އެކަންވެސް އޮޔާގޮސްފައިވާކަމަށެވެ.

ކުރިން ބުނެއުޅުނީ މިއީ ދުވަހަކުވެސް ވަކިވުމެއް ނުވާ #ހިތާހިތުގެގުޅުމެއް ކަމަށް!

– އަލްހާން ވިދާޅުވިއެވެ.

އެމްޑީޕީގެ ގިނަ އަދަދެއްގެ މެމްބަރުން ތިބޭ އަދި އާންމު ބައެއް މީހުންގެވެސް ތިބޭ ” ޖަޒީރާ” ވަޓްސް އަޕް ގްރޫޕުގައި ރައީސް ނަޝީދު ވަނީ ރާއްޖޭގެ ހަރުކަށި ފިކުރު އޮތް މިންވަރާއި ގުޅޭގޮތުން ވަރަށް ތަފްސީލީ ގޮތެއްގައި ވާހަކަ ދައްކަވާފައެވެ. އަދި މިކަމުގައި އެމަނިކުފާނުގެ ކަންބޮޑުވުން އޮތްމިންވަރު ވަނީ ހިއްސާ ކުރައްވާފައެވެ. ރައީސް ނަޝީދު ވިދާޅުވީ މިހާރު އޮތް ވެރިކަން ހިންގާ ކޯލިޝަނާއިއެކު ކުރިއަށް ދިއުމަށް ނޭދޭކަމަށެވެ. އަދި ރައީސް ޞާލިހުއާއިއެކު ސިޔާސީ އެއްވެސް މަސައްކަތެއް ކުރުމަށް ދެން ނުހުރެވޭނެކަމަށް ރައީސް ނަޝީދު ވިދާޅުވިއެވެ.

އަޅުގަނޑާއި މިހާރު ރައީސުލްޖުމްހޫރިއްޔާއާއި، ފިކުރީ ގޮތުން ޚިޔާލު ތަފާތު. އަޅުގަނޑު މެންގެ ޒާތީ ކަންތައްތަކުގައި އަބަދުވެސް އުޅޭނީ އެކުގައި. އަޅުގަނޑުގެ ދަރިންގެ އިބޫ ދޮންބެ އެއްކަމަކު، އެކަމަކު ދެން ރައީސުލްޖުމްހޫރިއްޔާއާއި އެކީ ސިޔާސީ ގޮތުން ހުރެވޭކަށް ނެތް.

– ރައީސް ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ އިތުރަށް ދެން ކުރަންޖެހޭ އެއްވެސްކަމެއް ނެތްކަމަށެވެ. ވެރިކަންވެސް ކުރެވިއްޖެ ކަމަށާއި، އަދި އެނޫންކަންވެސް ކުރެވިފައިވާކަމަށެވެ. ނަމަވެސް މިހާރު މަސައްކަތް ކުރައްވަނީ ޤައުމު ދަރިންނާއި ހަމައަށް ހެޔޮ ގޮތުގައި ވާސިލް ކުރުމުގެމަސައްކަތް ކުރުމަށް ކަމަށް ރައީސް ނަޝީދު ވިދާޅުވިއެވެ.