ރައްޔިތުންގެ މަޖިލީހަށް މިހާތަނަށް އެއްވެސް ސިއްރެއް ހިފެހެއްޓިފައިނުވާކަމަށާއި، އެއީ ސަލާމަތީ ޚިދުމަތްތަކުން މަޖިލީހަށް މަޢުލޫމާތު ހިއްސާކުރަން ނުޖެހޭ ސަބަބުކަމަށް ހިތަދޫ މެދު ދާއިރާގެ ކުރީގެ މެމްބަރު އިބްރާހީމް މުހައްމަދު ދީދީ (ދީދީ) ވިދާޅުވެއްޖެއެވެ.
ދީދީ މިހެން ވިދާޅުވެފައިމިވަނީ، ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އަވަހާރަކޮށްލުމަށް ދިން ހަމަލާގައި، އެމަނިކުފާނުގެ ސެކިއުރިޓީ ބްރީޗްވިގޮތް ސާފުކުރުމަށް ހެދި އިންކުއަރީ ރިޕޯޓްގައި، ޤައުމީ ސަލާމަތަށް ނުރައްކާނެތީކަމަށްބުނެ ސިއްރުކުރަން ނިންމެވި މަޢުލޫމާތުތައް ހާމަވުމާއި ގުޅިގެންނެވެ.
އެކަމަށް އިޝާރާތްކުރައްވާ ދީދީ ވިދާޅުވީ، މަޖިލީހުގެ ބައެއް މެންބަރުންނަށް އަޑު އިވެނީ އެމެރިކާފަދަ ތަންތަނުގެ ދިފާޢީ އަދި ސެކިއުރިޓީއާއި ބެހޭ ކޮމިޓީ އޮންނަކަންކަމަށެވެ. ސިފައިނާނއި ފުލުހުން މަޖިލީހަށް މަޢުލޫމާތު ނުދެވޭނެ ސަބަބަކީ މިއީކަމަށާއި، މިހާތަނަށް އެއްވެސް ސިއްރެއް މަޖިލީހަށް ހިފެހެއްޓިފައިނުވާކަމަށް ދީދީ ވިދާޅުވިއެވެ.
ދީދީ މިހެން ވިދާޅުވެފައިވާއިރު، މަޖިލީހުން ޢާންމުކުރި އިންކުއަރީ ރިޕޯޓްގައި ޤައުމީ ސަލާމަތާއި ގުޅުންހުރިކަމަށް ބުނާ މަޢޫލޫމާތުގައި ހުރީ ކުލަ ޖައްސާފައެވެ. ނަމަވެސް އެކަން ކޮށްފައިހުރިގޮތުން އެ މަޢުލޫމާތުތައް ހުރީ ބެލޭގޮތަށެވެ. ނަމަވެސް އެކަން އެނގުމާއެކު މަޖިލީހުގެ ވެބްސައިޓުން ވަނީ އެރިޕޯޓް ނަގައި އިޞްލާޙުކޮށްފައެވެ.
