ބަދަލުގެ މައްސަލާގައި ސުވޭސް ކެނަލްއާއެެކު، އެވަރ ގްރީން އާގު ބޯޓުގެ ވެރިފަރާތުން އެއްބަސްވުމަަކަށް އަތުވެއްޖެ

މިއަހަރުގެ މާރޗްމަހު، މިސްރުގެ ސުވޭސް ކެނަލްގައި ތާށިވި، ދުނިޔޭގެ، މުދާ އުފުލާ އެންމެ ބޮޑެތި އާގު ބޯޓުތަކުގެ ތެރޭގައި ހިމެނޭ އެވަރ ގްރީން އާގު ބޯޓުގެ ވެރިފަރާތާއި، އިންޝޫރެންސް ކުންފުންނާ ދެމެދު، ސުވޭސް ކެނަލްއަށް ބަދަލު ދިނުމުގެ ރަސްމީ އެއްބަސްވުން މިހާރު ގާއިމް ކުރެވިފައިވާ ކަމަށާއި، އަދި ސެވޭސް ކެނަލް އޮތޯރިޓީން މި ބޯޓު، މިހަމުގެ 7 ވަނަ ދުވަހު ދޫކޮށްލާނެކަމަށް ބޯޓުގެ ވެރިފަރާތުން ހާމަ ކޮށްފިއެވެ.

ސުވޭސް ކެނަލް އޮތޯރިޓީން ވަނީ، 1 ހަފްތާވަންދެން މި ބޮޑު އާގު ބޯޓު ސުވޭސް ކެނަލްގައި ހުރަހަކަށް ވާގޮތަށް ތާށިވެފައި އޮތުމަށްފަހު މާރޗްމަހުގެ 29ވަނަ ދުވަހު ފުން ކުރެވުނުފަހުން، ކެނަލްގެ ކައިރިގައި އޮތް ކޯރެއްގައި ބޯޓާޢި ބޯޓުގެ ފަޅުވެރިން ހިފަހައްޓާފައެވެ. ބޯޓަށް ދަތުރު ކުރުމުގެ ހުއްދަ ނުދީ ހިފަހައްޓާފަ އޮތީ، ސުވޭސް ކެނަލްއިން ޑިމާންޑް ކުރަމުންއައި ބަދަލު ހޯދުމުގެ މައްސަލައަށް ހައްލެއް ނުލިބިގެންނެވެ.

ޖަޕާނު ކުންފުންޏަކުން ދުއްވަމުން އައި މި އާގު ބޯޓު ސުވޭސްކެނަލްގެ ހުރަހަށް ވާގޮތަށް ތާށިވެ، އެއް ހަފްތާ ވަންދެން މުޅި ދުނިޔޭގެ ކާގޯ ދަތުރުފަތުރަށް ބުރޫ އަރާފައި ވެއެވެ.

"އާގު ބޯޓު ދޫކޮށްލުމަށްޓަކާ ވާންޖެހޭ އެންމެހާ ތައްޔާރީތަކެއް މިހާރު ދަނީ ވަމުން، އަދި ބަދަލު ދިނުމުގައި އެއްބަސް ވުމަކަށް އާދެވުނުކަން ފާހަގަ ކުރުމުގެ ގޮތުން، އިސްމާއިލިއާގައި ހުންނަ ސުވޭސްކެނަލް އޮތޯރިޓީގެ މައި މަރުކަޒުގައި ކުޑަ ރަސްމިއްޔާތެއްވެސް އޮންނާނެ." ބޯޓުގެ ވެރިފަރާތް ކަމުގައިވާ ޖަޕާނުގެ ޝޯއި ކައިސެން އާއި ބޯޓުގެ އިންސޫރަންސް ކުންފުނި ތަމްސީލު ކުރަމުންދާ ސްޓަން މެރިންގެ ފަރާތުން ފަޒް ޕީރު މުހައްމަދު ވިދާޅުވެފައި ވެއެވެ.

ސުވޭސްކެނަލް އޮތޯރިޓިން ބުނެފައިވަނީ، ބަދަލު ދިނުމުގެ އެއްބަސްވުމުގައި މިހަފްތާގެ ބުދަ ދުވަހު ސޮއި ކުރުމަށް ހަމަޖެހިފައިވާ ކަމަށާއި، އަދި މިކަމަށްޓަކާ ރަސްމިއްޔާތެއްވެސް ބޭއްވުމަށް ހަމަޖެހިފައިވާ ކަމަށެވެ. އަދި މި ރަސްމިއްޔާތަށްފަހު، އާގު ބޯޓު ދަތުރު ފަށާމަންޒަރު ރަސްމިޔާތުގެ ބައިވެރިންނަށް ބެއްލެވޭނެކަމަށްވެސް ކެނަލް އޮތޯރިޓީން ބުނެފައި ވެއެވެ.

ސުވޭސް ކެނަލް އޮތޯރިޓީންވެސް އަދި ސަޓްން މެރިންއިންވެސް، ބަދަލު ދިނުމުގެ އެއްބަސްވުމުގެ ތަފްސީލު ހާމަ ކޮށްފައެއް ނުވެއެވެ.

ބޯޓުގެ ވަރިފަރާތް ކަމުގައިވާ ޖަޕާނުގެ ޝޯއި ކައިސެން އާއި ބޯޓުގެ އިންސޫރަންސް ކުންފުނިން ފާއިތުވެދިޔަ މަހު ބުނެފައިވަނީ، ސުވޭސް ކެނަލް އޮތޯރިޓީއާއެކު ބަދަލް ދިނުމާއި ގުޅޭގޮތުން އެއްބަސްވުމަކަށް އާދެވިފައިވާ ކަމަށެވެ.

ސުވޭސްކެނަލް އޮތޯރިޓީން އެންމެ ފުރަތަމަ ވަނީ، ބޯޓު ފުންކުރުމަށް ކުރަންޖެހުނު ޚަރަދާއި، ގެއްލިގެންދިޔަ އާމްދަނީއާއި އަދި ކެނަލްގެ "އިތުބާރާ ކަރާމާތަށް" ލިބިގެން ދިޔަ ގެއްލުމުގެ ބަދަލެއްގެ ގޮތުން 916 މިލިއަން ޑޮލަރު ހޯދުމަށް ޑިމާންޑް ކޮށްފައެވެ. އެހެންނަމަވެސް، ފަހުންވަނީ މިއަދަދު 550 މިލިއަން ޑޮލަރަށް ދަށްކޮށްފައެވެ.

ބޯޓު މިސްރުން ފުރުނަ ނުދީ މިހާދުވަހު ހިފަހައްޓާފައި އޮތީ، ސުވޭސް ކެނަލްއިން ޑިމާންޑް ކުރި މިންވަރުގެ ބަދަލެއް ދިނުމަށް ބޯޓުގެ ވެރިފަރާތުންނާއި އަދި އިންސޫރެންސް ކުންފުނިން ދެކޮޅު ހެދުމާއި ގުޅިގެން، މިސްގެ ކޯޓުގެ އަމުރެއްގެ ދަށުންނެވެ.

މިސްރުގެ ކޯޓުންނާއި އަދި ގާނޫނީ ވަކީލުން ބުނެފައިވާ ގޮތުގައި، ބޯޓުގެ ވެރިފަރާތާއި، އިންޝޫރަންސް ކުންފުންޏާއި އަދި ސުވޭސް ކެނަލް އޮތޯރިޓީން ބަދަލުގެ މައްސަލާގައި ކޯޓުން ބޭރުގައި އެއްބަސްވުމަކަށް އައުމަށް ފުރުސަތު ދިނުމުގެ ގޮތުން، ކޯޓުގައި ތާވަލު ކޮށްފައި އޮތް ބަދަލު ހޯދުމުގެ މައްސަލަ ވަނީ މިމަހުގެ 11 ވަނަ ދުވަހަށް ލަސް ކުރެވިފައެވެ.