ބޮރޫޝިއާ ޑޯޓްމަންޑަށް ކުޅެމުން އައި އިނގިރޭސި ވިންގް ޖޭޑަން ސަންޗޯ މެންޗެސްޓާ ޔުނައިޓެޑަށް ވިއްކާލަން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފިއެވެ.
ޑޯޓްމަންޑުން މިއަދު ސަންޗޯ ޔުނައިޓެޑަށް ވިއްކާލަން ނިންމީ އެންމެ ފުރަތަމަ 72 މިލިއަން ޕައުންޑް (100 މިލިއަން ޑޮލަރު) ދޭ ގޮތަށެވެ. އަދި ޔުނައިޓެޑާ އެކު ސަންޗޯ 2026 ވަނަ އަހަރުގެ ނިޔަލަށް ކޮންޓްރެކްޓްގައި ސޮއިކުރާ ގޮތަށް ހަމަޖެހިފައިވާއިރު، އެ ޓީމުގައި އޭނާ ދައްކާ ކުޅުމަށް ބަލާފައި ޔުނައިޓެޑުން އިތުރު 25 މިލިއަން ޑޮލަރު ދޭ ގޮތަށް އެއްބަސްވުމުގައި ވަކި މާއްދާތަކެއް ހިމަނާނެ ކަމަށް ރިޕޯޓްތައް ބުނެއެވެ.
ސަންޗޯ ޑޯޓްމަންޑް ދޫކޮށް ޔުނައިޓެޑަށް ބަދަލުވާން ނިންމާފައިވާކަމަށް އޭނާ މިހާރު ކުޅެމުން އަންނަ ބޮރޫޝިއާ ޑޯޓްމަންޑުންވެސް ވަނީ ޔަގީން ކޮށްދީފައެވެ.
މިދިޔަ އަހަރު ޔުނައިޓެޑުން ސަންޗޯ ހޯދަން ތިން ބިޑެއް ކުރި ނަމަވެސް ޑޯޓްމަންޑުން ބޭނުންވާ އަގު ދޭން ދެކޮޅު ހަދާތީ އެ ޑީލް ކުރިއަށް ނުދިޔަ އެވެ. މި ފަހަރު ވެސް ޔުނައިޓެޑުން ސަންޗޯ ހޯދަން ކުރި ފުރަތަަމަ ބިޑް ޑޯޓްމަންޑުން ވަނީ އަނބުރާ ފޮނުވާލައިފައެވެ. އިންގްލެންޑް ގައުމީ ޓީމާ އެކު ޔޫރޯ ސްކޮޑާ އެކު ހުރި އުމުރުން 21 އަހަރުގެ ސަންޗޯ ކުރިއަށް އޮތް ދުވަސްތަކުގެ ތެރޭގައި ޔުނައިޓެޑްގެ މެޑިކަލް ޓެސްޓް ނިންމައި އެއްބަސްވުމުގައި ސޮއިކުރުމުގެ ކަންތައްތައް ކުރިއަށް ގެންދާނެ ކަމަށް ރިޕޯޓްތައް ބުނެއެވެ.
ކޮމެންޓު ފޮނުވާ