ކޮޕަ އެމެރިކާ ފުޓްބޯޅަ މުބާރާތުގައި ރޭ އެކުއެޑޯއާ 1-1 އިން އެއްވަރުވެ، 10 މެޗަށް ފަހު ބްރެޒިލްގެ މޮޅުވުމުގެ ރެކޯޑަށް ނިމުން އަތުވެއްޖެއެވެ.
ފުރަތަމަ ހާފުގައި ބްރެޒިލުން ލީޑުނެގީ 37 ވަނަ މިނިޓްގައި ފަހަތަށް ކުޅޭ އެޑާ މިލިޓާއޯ ޖެހި ގޯލުންނެވެ. މިލިޓާއޯ މި ގޯލު ޖެހީ އެވަޓަން ސޮއާރޭސް ނެގި ހިލޭ ޖެހުމަކުން ބޮލުން ގޯލުގެ ތެރެއަށް ބޯޅަ ފޮނުވާލައިގެންނެވެ. މިއީ ރެއާލް މެޑްރިޑަށް ކުޅޭ މިލިޓާއޯ ގައުމީ ޓީމަށް ޖަހައިދިން ފުރަތަމަ ގޯލެވެ. ދެ ވަނަ ހާފްގެ ކުޅުން ފެށިގެން މާ ގިނައިރެއް ނުވެ އެކުއެޑޯ އިން ނަތީޖާ ހަމަހަމަކުރިއެވެ. ގޯލު މެޗުގެ 53 ވަނަ މިނިޓްގައި ކާމިޔާބުކުރީ އެނާ ވެލެންސިއާ ދިން ބޯޅައަކުން އެންހެލް މެނާއެވެ.
މެޗުގެ ކުރިން މުބާރާތުގެ ކުއާޓަފައިނަލުން ބްރެޒިލް ޖާގަ ހޯދައިފަ ވުމުން ރޭގެ މެޗުގައި ނޭމާ އާއި ގްބްރިއަލް ޖެސުސް ވަނީ ނުހިމަނާފައެވެ. އަދި ޓީމުގެ މުހިންމު ކުޅުން ތެރިންއަށް ވަނީ އަރާމް ކުރަން ފުރުސުތު ދީފައެވެ. ކުއާޓާ ފައިނަލުން ބްރެޒިލް ފުރުސަތު ހޯދީ ގްރޫޕް ބީގެ އެއް ވަނަ ޓީމުގެ ގޮތުގައި ހަތަރު މެޗުން 10 ޕޮއިންޓް ހޯދައިގެންނެވެ.
ގްރޫޕްގެ ދެ ވަަނަ އަށް ދިޔައީ ރޭ ވެެނެޒުއޭލާ 1-0 އިން ބަލިކުރި ޕެރޫ. އެ ޓީމަށް ވަނީ ހަތަރު މެޗުން ހަތް ޕޮއިންޓް ލިބިފައެވެ. ދެން މި ގްރޫޕުން ކުއާޓާ ފައިނަލުގެ ދެ ޖާގަ ލިބުނީ ތިން ވަަނައިގައި ނިންމާލި ކޮލަމްބިއާ އާއި ހަތަރެއްގައި ނިންމާލި އެކުއެޑޯ އަށެވެ. ކޮލަމްބިއާ އަށް ހަތަރު ޕޮއިންޓް ލިބުނުއިރު، އެކުއެޑޯގެ އޮތީ ތިން ޕޮއިންޓެވެ. އެންމެ ފުލަށް ގޮސް މި ގްރޫޕުން ކެޓި ވެނެޒުއޭލާގެ އޮތީ ދެ ޕޮއިންޓެވެ.
ފުރަތަމަ ކުޅުނު ތިން މެޗުން ވެސް މޮޅުވެފައި އޮތް ބްރެޒިލް ރޭ އެއްވަރުވިއިރު، އެންމެ ފަހުން އެ ޓީމަށް މޮޅެއް ނުހޯދުނީ އެކުވެރިކަމުގެ މެޗެެއްގައި 2019 ވަނަ އަހަރު ނޮވެމްބަރު މަހު އާޖެންޓީނާ އަތުންނެވެ. މިރޭ ގުރޫޕްގެ ފަހު މެޗުގައި އާޖެންޓީނާ ބޮލީވިޔާ ދެކޮޅަށް ނުކުންނާނެއެވެ.
