އިރާނުގެ ޑިމާންޑްތަކަށް އެމެރިކާއިން ދޫދިނަސް، ބައިޑްންއާއި ބައްދަލެއް ނުކުރާނަން: ރައީސީ

ވިއެނާގައި މިހާރު ކުރިޔަށްދާ، 2015ގެ ނިއުކުލިއަރ އެއްބަސްވުމަށް ރުޖޫއަވުމަށް ކުރެވޭ މަޝްވަރާތައް ކާމިޔާބުވިޔަސް، އެމެރިކާގެ ރައީސް ޖޯ ބައިޑްންއާއި ބައްދަލު ނުކުރައްވާނެ ކަމަށް، އިރާނުގެ އިންތިޚާބީ ރައީސް އިބުރާހިމް ރައީސީ ވިދާޅުވެއްޖެއެވެ.

ހަރުކަށި ސިޔާސަތުތަކަށް ތާއީދު ކުރައްވާ، އަދި އިރާނުގެ ރޫހާނީ ލީޑަރާއި ގާތް ގުޅުމެއް އޮންނަ، ރައީސީ މިހެން ވިދާޅުވެފައިވަނީ، ފާއިތުވެދިޔަ ހަފްތާގެ ހުކުރު ދުވަހު ބޭއްވުނު ރިޔާސީ އިންތިޚާބު ކާމިޔާބު ކުރެއްވުމަށްފަހު ބޭއްވެވި ފުރަތަމަ ނޫސްވެރިންގެ ބައްދަލު ވުމުގައެވެ.

ރައީސީ އިރާނުގެ ރައީސްކަމުގެ މަގާމާ ހަވާލުވެ ވަޑައިގަންނަވާނީ އަންނަ އޮގަސްޓު މަހުގެ ކުރީކޮޅުއެވެ.

އެމެރިކާއިން އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައިފިނަމަ، ދެގައުމުގެ ދެމެދުގައި ހުރި މައްސަލަތައް ހައްލު ކުރުމަށް އެމެރިކާގެ ރައީސް ބައިޑްންއާއި ބައްދަލު ކޮށްފާނެތޯ ނޫސްވެރިޔަކު ކުރި ސުވާލުގެ ޖަވާބުގައި ރައީސީ ދެއްވާފައިވަނީ ވަރަށް ސާދާ ޖަވާބެކެވެ. ރައިސީ ވިދާޅުވީ "ނޫން" ކަމުގައެވެ.

އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި، އެގައުމުން 2015 ވަނަ އަހަރުގެ ދުނިޔޭގެ ބޮޑެތި ބާރުތައްވެސް ހިމެނޭގޮތަށް އިރާނާއެކީ އެކުލަވާލި ނިއުކުލިއަރ އެއްބަސްވުން ދޫކޮށްލި ކޮށްލުން އަބުރާ އިއާދަކުރުމަށް، ވިއެނާގައި އެމެރިކާއާއި އިރާނުން މިހާރު ގެންދަނީ، ނުސީދާ ވާހަކަތައް ކުރިޔަށް ގެންދަމުންނެވެ.

މި ނޫސް ކޮންފަރެންސްގައި، ރައީސީ ވަނީ، އިރާނާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް ނައްތާލުމަށް ގޮވާލައްވާފައެވެ. "އެމެރިކާއިން ޖެހޭނީ އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިރާނުން އެއްބަސް ވާގޮތަށް ނައްތާލަން،" ރައީސީ ވިދާޅުވިއެވެ.

ރައީސީ އިތުރަށް ވިދާޅުވި ގޮތުގައި، އެގައުމުގެ ބެލިސްޓިކް މިސައިލް ޕްރޮގްރާމާއި، އަދި ހަގުރާމަވެރި ސަރަހައްދީ ޖަމާއަތްތަކަށް ވެދެމުންދާ އެހީތެރިކަމަކީ، އެކަންކަމާ މަޝްވަރާ ނުކުރެވޭނެ ކަންކަން ކަމުގައެވެ.

1988 ވަނަ އަހަރު، އިރާނުގެ ގިނަ އަދަދެއްގެ ސިޔާސީ ކުށްވެރިން ގަތުލު ކުރުމުގައި އޭނާގެ ދައުރެއް އޮންނާނެތޯ ރައީސީއާއި ކުރި ސުވާލުގެ ޖަވާބުގައި ވިދާޅުވީ، އޭނާއަކީ، "އިންސާނީ ހައްގުތައް ހިމާޔަތްކުރާ" މީހެއް ކަމުގައެވެ.

"ވަކީލަކު ގައުމުގެ ރައްޔިތުންގެ ހައްގުތަށް ހިމާޔަތްކުރާނަމަ، އަދި ގައުމުގެ ސަލާމަތް ނަގަހައްޓާނަމަ، އެ މީހަކަށް ހިތްވަރު ދޭންވާނެ. އަހަރެން ވަކީލެއްގެ ގޮތުގައި ހުރިހާ ދުވަހަކު، އަހަރެން އޮންނާނީ ފަޚުރުވެރިކަމާއެެކު ގައުމު ރައްކާތެރި ކޮށްދީފަ،" 1988 ވަނަ އަހަރު، އިރާނުގެ ވެރިރަށް ތެހެރާންގެ ޑެޕިއުޓީ ޕްރޮސެކިއުޓަރއެއްގެ މަގާމުގައި ހުންނެވި ރައީސީ ވިދާޅުވިއެވެ.

އިންސާނީ ހައްގުތަކަށް ވަކާލާތުކުރާ ޖަމާއައްތަކުން ބުނާ ގޮތުގައި، ރައީސީއަކީ، 1988 ވަނައަހަރު، އިރާނުގައި މަރާލި ސިޔާސީ އެތަކެއް ކުށްވެރިންނެއް މަރާލުމުގައި އިސްކޮށް ހަރަކާތްތެރިވުމަށް، ޝަރުއީ ދާއިރާއާއި އިންޓެލިޖަންސް އޮފިޝަލުން ހިމެނޭގޮތަށް އިރާނުގެ އޭރުގެ ރޫހާނީ ލީޑަރު އެކުލަވާލި "މަރު ކޮމިޓީ"ގެ މެމްބަރެކެވެ.

އިންސާނީ ހައްގުތަކަށް ގޮވާލާ ޖަމާއަތްތަކުން ތުހުމަތު ކުރާ ގޮތުގައި އެއަހަރު އިރާނުގައި ވަނީ، 5،000 ސިޔާސީ ކުށްވެރިން މަރާލާފައެވެ.

އެމެރިކާއިން ވަނީ 2019ވަނަ އަހަރު، އިންސާނިއްޔަތާ ޚިލާފު ޖަރީމާތައް ހިންގުމުގެ ތުހަމަތުގައި ރައީސީއާއި ދެކޮޅަށް ދަތިކުރުމުގެ ފިޔަވަޅު އަޅާފައެވެ. މި ތުހުމަތުތަކުގެ ތެރޭގައި 1988ވަނަ އަހަރު، މަރާލެވުނު ސިޔާސީ ކުއްވެރިން މަރާލުމުގައި ބައިވެރިވި ކަމުގެ ތުހުމަތުވެސް ހިމެނެއެވެ.

އެމްނެސްޓީ އިންޓަރނޭޝަނަލް އިން މި ހަފްތާގެ ހޮނިހިރު ދުވަހު ވަނީ، އިންސާނިއްޔާތާއި ދެކޮޅަށް ރައީސީ ހިންގާފައިވާ ޖަރީމާތަށް ތަހުގީގު ކުރުމަށް ގޮވާލާފައެވެ.