ޕެޓްރިކް ޝިކް ޖަހައިދިން ލެ ލަނޑުން މޮޅުވެ ޔުއެފާ ޔޫރޯ ފުޓްބޯޅަ މުބާރާތުގައި ސްކޮޓްލެންޑްގެ މައްޗަށް ޗެކް ރިޕަބްލިކް ކުރި ހޯދައިފިއެވެ.
ސްކޮޓްލެންޑްގެ ސްޓޭޑިއަމް ހެމްޕްޑެން ޕާކުގައި ކުޅުނު މި މެޗު ޗެކް ރިޕަބްލިކުން ކާމިޔާބުކުރީ 0-2 ގެ ނަތީޖާ އަކުންނެވެ.
ބާރަ ހާސް ސަޕޯޓަރުންގެ ކުރިމަތީގައި ކުޅުނު މި މެޗު ފަށައިގެން ރަނގަޅު ކުޅުމެއް ދެއްކީވެސް ޗެކް ރިޕަބްލިކުންނެވެ. އެގޮތުން މެޗުގައި ޗެކް ރިޕަބްލިކުން ލީޑު ނެގި ލަނޑު ފުރަތަމަ ހާފް ނިމެން ކައިރިވެފައި ވަނިކޮށް ކާމިޔާބުކޮށްދިނީ، ޕެޓްރިކް ޝިކް އެވެ.
ދެވަނަ ހާފް ފަށައިގެން ސްކޮޓްލެންޑުން ވަނީ ނަތީޖާ ހަމަހަމަ ކުރުމަށް މަސައްކަތް ކޮށްފައެވެ. ނަމަވެސް ދެވަނަ ހާފް ފަށައިގެން މާ ގިނައިރުތަކެއް ނުވަނީސް ޗެކް ރިޕަބްލިކުން ވަނީ އިތުރު ލަނޑެއް ޖަހާ ނަތީޖާގެ ފަރަގު ބޮޑުކޮށްފައެވެ. މި ލަނޑުވެސް ކާމިޔާބުކޮށްދިނީ ފުރަތަމަ ލަނޑު ކާމިޔާބުކޮށްދިން ޕެޓްރިކް ޝިކް އެވެ. މިއީ މިފަހަރުގެ ޔޫރޯ ފުޓްބޯޅަ މުބާރާތުގައި މިހާތަނަށް ފެނުނު އެންމެ ރީތި ލަނޑެއެވެ. ޕެޓްރިކް ޝިކް މި ލަނޑު ޖަހާފައިވަނީ ދަނޑުގެ މެދެއް ހާ ހިސާބުގައި ހުރެ ވާތު ފައިން ޖަހާ ކުރިޔަށް ފޮނުވާލި ބޯޅަ ކީޕަރ ބޯ މަތިން ގޯލުގެ ތެރެއަށް ވައްދާލައިގެންނެވެ.
ސްކޮޓްލެންޑާއި ޗެކް ރިޕަބްލިކް މީގެ ކުރިން ވަނީ ހަތް ފަހަރު ބައްދަލުކޮށްފަ އެވެ. ސްކޮޓްލެންޑުން ހަތަރު މެޗު ކާމިޔާބުކުރިއިރު ޗެކް ރިޕަބްލިކް ކާމިޔާބު ކުރީ ދެ މެޗެވެ. ބާކީ މެޗު ނިމުނީ އެއްވަރުވެގެންނެވެ. އަދި މިއީ މިދިޔަ 23 އަހަރު ތެރޭ ބޮޑު މުބާރާތެއްގައި ސްކޮޓްލެންޑް ކުޅުނު ފުރަތަމަ މެޗެވެ.
ގުރޫޕް ޑީ ޕޮއިންޓް ޓޭބަލަށް ބަލާއިރު ޗެކް ރިޕަބްލިކާއި އިންގްލެންޑް އެ ޓީމުތަކުގެ ފުރަތަމަ މެޗު ކާމިޔާބުކޮށްފައިވާތީ އެ ދެ ޓީމަށް ވެސް ވަނީ ތިން ޕޮއިންޓް ލިބިފައެެވެ. ނަމަވެސް ޖެހި ގޯލުގެ އަދަދުން ގުރޫޕް ޑީ ގެ އެއްވަނަ ލިބިފައިވަނީ ޗެކް ރިޕަބްލިކަށެވެ. ބައިކޮޅަށް ވަދެފައިވާ އެއް ގޯލާއި އެކު ގުރޫޕްގެ ތިންވަނައިގައި އޮތީ ކްރޮއޭޝިއާ އެވެ. ގުރޫޕް ފުލުގައި ސްކޮޓްލެންޑް އޮތީ ބައިކޮޅަށް ވަދެފައިވާ ދެ ގޯލާއި އެކު އެވެ.
ކޮމެންޓު ފޮނުވާ