ލާޒިއޯގެ ކޯޗުގެ މަގާމަށް ޗެލްސީ އާއި ޔުވެންޓަސްއަށް ކުރިން ކޯޗުކޮށްދިން އިޓަލީގެ ކޯޗު މައުރީޒިއޯ ސާރީ ހަމަޖައްސައިފި އެވެ.
ލާޒިއޯގެ ކޯޗުގެ މަގާމު ހުސްވީ އެ ޓީމާ ހަވާލުވެ ހުރި ސިމޯން އިންޒާގީ އެ ކްލަބާ އެކު ހަދާފައިވާ އެއްބަސްވުން ނިމުމަކަށް ގެނެސް އިންޓަ މިލާނާ ހަވާލުވުމުންނެވެ. އިންޒާގީ ވަނީ ފަސް ސީޒަނުގައި ލާޒިއޯ އަށް ކޯޗުކޮށްދީފައެވެ. ސާރީ ލާޒިއޯގެ ކޯޗުކަމާ ހަވާލުވީ ދެ އަހަރުގެ ކޮންޓްރެކްޓެއްގަ އެވެ. އޭނާ އެންމެ ފަހުން ކޯޗުކޮށްދިން ޗެލްސީ އާއި ޔުވެންޓަސްގެ ވަޒީފާ ގެއްލުނީ އެއް ސީޒަނަށް ފަހުއެވެ.
މިދިޔަ އަހަރު ޖުލައި މަހު ޔުވެންޓަސް އިން ވަކިކުރި ފަހުން ސާރީ ހުރީ ޓީމަކާ ހަވާލުނުވެއެވެ. ޔުވެންޓަސް އިން އެންމެ ސީޒަނަކަށް ފަހު ސާރީ ވަކިކުރީ އެ ފަހަރު ޗެމްޕިއަންސް ލީގުގެ ދެ ވަނަ ބުރުން ފްރާންސްގެ ލިޔޯން އަތުން ކެޓުމުންނެވެ. ޔުވެންޓަސް ގޮވައިގެން އެ ފަހަރު އިޓާލިއަން ކަޕާއި އިޓާލިއަން ސުޕަ ކަޕުގެ ފައިނަލުން ބަލިވިއިރު، ލީގު ހޯދީ ވެސް ކުޑަ ފަރަގަކުންނެވެ.
ޗެލްސީ އަށް ކޯޗުކޮށްދިން ސީޒަނުގައި ސާރީ ވަނީ އެ ޓީމަށް 2019 ވަނަ އަހަރުގެ ޔޫރޮޕާ ލީގު ޗެމްޕިއަންކަން ހޯދައިދީފަ އެވެ.
