ބޮރޫޝިއާ ޑޯޓްމަންޑްގެ އިނގިރޭސި ވިންގް ޖޭޑަން ސަންޗޯ ހޯދަން މެންޗެސްޓާ ޔުނައިޓެޑުން ކުރާ މަސައްކަތް އަނެއްކާ ވެސް ފަށާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ޖަރުމަނުގެ މީޑިއާ ރިޕޯޓްތައް ބުނާގޮތުން މި ފަހަރު ޑޯޓްމަންޑުން ސަންޗޯ ވިއްކާލަން ކިޔާ އަގު ވަނީ ކުޑަކޮށްފަ އެވެ. މި ފަހަރު ޑޯޓްމަންޑްގެ ބޭނުންވަނީ 110 މިލިއަން ޑޮލަރަށް ސަންޗޯ ވިއްކާލާށެވެ. އެއީ ފުރަތަމަ 85 މިލިއަން ޑޮލަރު ދޭގޮތަށެވެ. އަދި ބާކީ ބައި ދެ އަހަރަށް ބަހާލައިގެން ދޭ ގޮތަށެވެ. މި ގޮތަށް ޑީލް ކުރިއަށް ގޮސްފިނަމަ ޔުނައިޓެޑުން މި ފަހަރު ސަންޗޯ ގަންނާނީ މީގެ އެއް އަހަރު ކުރިން ޑޯޓްމަންޑް ކީ އަގަށް ވުރެ 25 މިލިއަން ޑޮލަރު އަގުހެޔޮކޮށެވެ.
ސަންޗޯ ގަންނަން ޔުނައިޓެޑުން މިދިޔަ އަހަރު ކުރި ފަހު ބިޑަކީ 117 މިލިއަން ޑޮލަރުގެ ބިޑެކެވެ. ޑޯޓްމަންޑުން ވަނީ އެ ހުށަހެޅުން ވެސް އަނބުރާ ފޮނުވާލައިފަ އެވެ. ޑޯޓްމަންޑުން ޔުނައިޓެޑަށް އަންގާފައިވަނީ 135 މިލިއަން ޑޮލަރު ނޫން އަގަކަށް ސަންޗޯ ނުވިއްކޭނެ ކަމަށެވެ. އަދި އެ ޑީލްގެ އަގުތައް ދައްކަން ޖެހޭނީ ވެސް ފުރަތަމަ 100 މިލިއަން ޑޮލަރު ދޭ ގޮތަށް ކަމަށެވެ. މިދިޔަ އަހަރު ޔުނައިޓެޑުން ސަންޗޯ ހޯދަން ތިން ބިޑެއް ކުރި ނަމަވެސް ޑޯޓްމަންޑުން ބޭނުންވާ އަގު ދޭން ދެކޮޅު ހަދާތީ އެ ޑީލް ކުރިއަށް ނުދިޔަ އެވެ.
ޖަރުމަނުގެ ގަދަބާރު ޑޯޓްމަންޑުން ސަންޗޯ ގަތީ 2017 ވަނަ އަހަރު މެންޗެސްޓާ ސިޓީން 10 މިލިއަން ޑޮލަރު ދައްކައިފަ އެވެ.
ކޮމެންޓު ފޮނުވާ