ހުކުރު ދުވަހު ފަށާ ޔޫރޯ ފުޓްބޯޅަ މުބާރާތުގެ ކުރިން ސްކޮޓްލޭންޑް ކުޅުނު ފަހު މެޗުން މޮޅުވެއްޖެއެވެ.
ސްކޮޓްލޭންޑް މުބާރާތައް ތައްޔާރުވުމުގެ ގޮތުން ކުޅުނު ފަހު މެޗުގައި ލަގްޒަންގާބް އަތުން މޮޅުވީ 1-0 ލަނޑުންނެވެ.
ރަށުން ބޭރުގައި ސްކޮޓްލެންޑް ކުޅުނު މެޗުގެ ހަމައަކަނި ލަނޑު 27 ވަނަ މިނެޓުގައި ކާމިޔާބުކޮށްދިނީ ޗޭ އެޑަމްސްއެވެ. މިއީ އެޑަމްސް ސްކޮޓްލޭންޑްގެ ގައުމީ ޓީމަށް ކާމިޔާބުކޮށްދިން ދެވަނަ ލަނޑެވެ. މި މެޗުގައި އުމުރުން 19 އަހަރުގެ ބިލީ ގިލްމާއު ވަނީ ފަހު ފަނަރަ މިނެޓުގައި ކުޅެން ނުކުމެ ސްކޮޓްލެންޑް ޓީމުގައި ތަފާތު ދައްކާފައެވެ.
މެޗުގެ ދެވަނަ ހާފްގައި ރޭންޖާސްއަށް ކުޅެމުން އަންނަ އުމުރުން 19 އަހަރުގެ ޑިފެންޑަރު ނަތަން ޕެޓާސަން ވަނީ ފުރަތަމަ ފަހަރަށް ސްކޮޓްލެންޑްގެ ސީނިއާ ޓީމަށް ކުޅެފައެވެ. ޔޫރޯ ފުޓްބޯޅަ މުބާރާތުގެ ފުރަތަމަ މެޗުގައި އަންނަ އާދީއްތަ ދުވަހު ސްކޮޓްލޭންޑް ނުކުންނާނީ ހެމްޕްޑެންގައި ޗެކްރިޕަބްލިކްއާ ދެކޮޅަށެވެ.
މިއީ 1998 އަހަރުގެ ވޯލްޑްކަޕް ފުޓްބޯޅަ މުބާރާތުގެ ފަހުން ސްކޮޓްލޭންޑް ބޮޑު މުބާރާތެއްގައި ވާދަކުރާ ފުރަތަމަ ފަހަރުއެވެ.
ކޮމެންޓު ފޮނުވާ