އެކުވެރިކަމުގެ މެޗުތަކުން ބެލްޖިއަމް، އިންގްލެންޑް އަދި ނެދަލޭންޑްސް މޮޅުވެއްޖެ

އަންނަ ހުކުރު ދުވަހު ފަށާ ޔުއެފާ ޔޫރޯ ފުޓްބޯޅަ މުބާރާތައް ތައްޔާރުވުމުގެ ގޮތުން ޔޫރަޕުގެ ޤައުމުތަކުގެ މެދުގައި މިހާރު ކުޅެމުންދާ ރަހުމަތްތެރިކަމުގެ މެޗުތަކުގެ ތެރެއިން މިރޭ ކުޅުނު މެޗުތައް ބެލްޖިއަމް، އިންގްލެންޑް އަދި ނެދަލޭންޑްސް ކާމިޔާބުކޮށްފިއެވެ.

މިއީ ޔޫރޯގެ ކުރިން މި 3 ޤައުމު ކުޅުނު އެންމެ ފަހު މެޗެއެވެ.

އެގޮތުން  ބެލްޖިއަމް އާއި އެންމެ ފަހުގެ ވަރލްޑް ކަޕްގެ ރަނަރަޕް ކްރޮއޭޝިއާ ބައްދަލުކުރި މެޗު ބެލްޖިއަމުން ކާމިޔާބުކުރީ 0-1 ގެ ނަތީޖާއަކުންނެވެ. މި މެޗުގައި ބެލްޖިއަމުން ޖެހި ހަމައެކަނި ލަނޑު ފުރަތަމަ ހާފުގައި އެޓީމަށް ކާމިޔާބުކޮށްދިނީ ރޮމޭލޫ ލުކާކޫއެވެ.

ޔޫރޯގައި ބެލްޖިއަމް ހިމެނެނީ ގްރޫޕް ބީގައެވެ. ބެލްޖިއަމް އާއެކު ދެން މި ގްރޫޕްގައި ހިމެނޭ ޤައުމުތަކަކީ ޑެންމާކް، ފިންލޭންޑް އަދި ރަޝިއާއެވެ.

ރަަހުމަތްތެރިކަމުގެ މެޗުގައި މިރޭ އިންގްލެންޑް ނުކުތީ ރުމޭނިއާ އާ ދެކޮަޅަށެވެ. މި މެޗު އިންގްލެންޑުން ކާމިޔާބުކުރީ 0-1 ގެ ނަތީޖާއަކުންނެވެ. އިންގްލެންޑްގައި ކުޅުނު މި މެޗުގައި އެޓީމުން ޖެހި ހަމައެކަނި ލަނޑު ދެވަނަ ހާފްގައި ލިބުނު ޕެނަލްޓީއަކުން އެޓީމަށް ކާމިޔާބުކޮށްދިނީ މި މެޗުގައި އިންގްލެންޑްގެ ކެޕްޓަން ބޭންޑް އަޅައިގެން ކުޅުނު މާކަސް ރަޝްފޯޑެއެވެ. މެޗުގައި އިންގްލެންޑަށް ވަނީ ލީޑު ފުޅާކުރަންވެސް ރަނުގެ ފުރުޞަތެއް ލިބި ބޭކާރުވެފައެވެ. އެއީ ބަދަލު ކުޅުންތެރިއެއްގެ ގޮތުގައި ކުޅެން އެރި ޖޯޑަން ހެންޑަސަން އަށް ލިބުނު ޕެނަލްޓީއެވެ. ނަމަވެސް އޭނާ ފޮނުވާލި ޕެނަލްޓީ ރުމޭނިއާގެ ކީޕަރު ފްލޯރިން ނީޓާ ވަނީ ދިފާއުކޮށްފައެވެ.

ޔޫރޯގައި އިންގްލެންޑް ހިމެނެނީ ގްރޫޕް ޑީގައެވެ. ދެން ހިމެނޭ ޤައުމުތަކަކީ، ކްރޮއޭޝިއާ ޗެކް ރިޕަބްލިކް އަދި ސްކޮޓްލޭންޑެއެވެ.

އެކުވެރިކަމުގެ މެޗުގައި މިރޭ ނެދަލޭންޑްސް ނުކުރީ ޖޯޖިއާ އާއި ދެކޮޅަށެވެ. މި މެޗު ނެދަލޭންޑްސް އިން ކާމިޔާބުކުރީ 0-3 ގެ ނަތީޖާއަކުންނެވެ.

މި މެޗުގައި ނެދަލޭންޑްސްގެ ލަނޑުތައް އެޓީމަށް ކާމިޔާބުކޮށްދިނީ،  ޕެނަލްޓީ އަކުން މެމްފިސް ޑިޕާއި އާއި ވޫޓް ވޭގޯސްޓް އަދި ރިޔާން ގްރަވެންބާޗް އެވެ.

ޔޫރޯގައި ނެދަލޭންޑްސް އާއެކު ގްރޫޕް ސީ ގައި ހިމެނުނު ޤައުމުތަކަކީ، އޮސްޓްރިއާ، ނޯތް މަސަޑޯނިއާގެ އިތުުރުން ޔޫކްރެއިންއެވެ.