އިޓަލީ މޮޅުވިއިރު، ސްޕެއިން އާއި ޕޯޗުގަލް މެޗު އެއްވަރު

ބައިނަލްއަގުވާމީ އެކުވެރިކަމުގެ މެޗުގައި ރޭ އިޓަލީ ފަސޭހަ މޮޅެއް ހޯދިއިރު، ސްޕެއިން އާއި ޕޯޗުގަލް ބައްދަލުކުރި މެޗު އެއްވަރު ވެގެން ނިމިއްޖެއެވެ.

ކުރިޔަށް އޮތް ޔުއެފާ ޔޫރޯ ފުޓްބޯޅަ މުބާރާތައް ތައްޔާރުވުމުގެ ގޮތުން ކުޅޭ މި މެޗުތަކުގެ ތެރެއިން ރޭ އިޓަލީ މޮޅުވީ، ޗެކް ރިޕަބްލިކް އާއި ވާދަކޮށް 0-4 ގެ ނަތީޖާއަކުންނެވެ. އަދި ސްޕެއިން އާއި ޕޯޗުގަލް ބައްދަލުކުރި މެޗު ނިމުނީ ލަނޑެއް ނުޖެހި 0-0 ގެ ނަތީޖާއަކުންނެވެ.

އިޓަލީ އާއި ޗެކް ރިޕަބްލިކް ބައްދަލުކުރި މެޗުގައި އިޓަލީން ފުރަތަމަ ލަނޑު ޖަހާ ލީޑު ނަގާފައިވަނީ 23 ވަނަ މިނެޓުގައެވެ. މި ލަނޑު އިޓަލީއަށް ކާމިޔާބުކޮށްދިނީ، ޗިރޯ އިމޮބިލޭއެވެ. އަދި މި ލަނޑު ކާމިޔާބުކުރިތާ 3 މިނެޓު ފަހުން އިޓަލީގެ ނިކޯލޯ ބަރެއްލާ ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މެޗުގެ ފުރަތަމަ ހާފް ނިމުނީ 0-2 ގެ ނަތީޖާއަކުންނެވެ.

މެޗުގެ ދެވަނަ ހާފުގައިވެސް އިޓަލީން ގިނަ ހަމަލާތަކެއް އުފެއްދިއިރު، މެޗުގެ 66 ވަނަ މިނެޓުގައި ލޮރެންޒޯ އިންސީނިއޭ ވަނީ އެ ގައުމުގެ ތިންވަނަ ލަނޑު ކާމިޔާބުކޮށްދީފައެވެ. ދެން މި މެޗުގައި އިޓަލީން ކާމިޔާބުކުރި އަނެއް ލަނޑު މެޗުގެ 73 ވަނަ މިނެޓުގައި ޖަހައިދިނީ ޑޮމެނިކޯ ބެރާޑީއެވެ.

ސްޕެއިނާއި ޔޫރަޕުގެ އެންމެ ފަހުގެ ޗެމްޕިއަން ޕޯޗުގަލް ބައްދަލުކުރި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

ސްޕެއިނުގައި ކުޅުނު މެޗުގައި އެ ގައުމުން ވަނީ ފްރާންސްގެ ގައުމީ ފުޓްބޯޅަ ޓީމަށް ކުޅުމުގެ ފުރުސަތު ނުލިބުމުން، ސްޕެއިނުގެ ގައުމީ ޓީމަށް ކުޅެން ނިންމި މެންޗެސްޓާ ސިޓީގެ ޑިފެންޑަރު އައިމެރިކް ލަޕޯޓަށް ފުރަތަމަ އެގާރައިން ފުރުސަތު ދީފައެވެ. މި މެޗުގައި ދެ ގައުމަށްވެސް ރަނގަޅު ފުރުސަތުތަކެއް ލިބިގެންދިޔައިރު، މެޗުގެ ދެވަނަ ހާފުގެ ކުރީކޮޅު ސްޕެއިނުގެ އަލްވާރޯ މޮރާޓާއަށް ވަނީ ރަނގަޅު ދެ ފުރުސަތެއް ލިބި ބޭކާރުވެފައެވެ.

މި މަހުގެ 11 ވަނަ ދުވަހު ފަށާ ޔޫރޯއަށް ތައްޔާރުވުމުގެ ގޮތުން ކުޅުނު އެކުވެރިކަމުގެ ފުރަތަމަ މެޗުން ސްޕެއިނާއި ޕޯޗުގަލް އެއްވަރުވިއިރު، މި ފަހަރުގެ ޔޫރޯގައި ސްޕެއިން ހިމެނެނީ ގްރޫޕް އީ ގައެވެ. އެ ގްރޫޕުގައި ދެން ހިމެނޭ ގައުމުތަކަކީ ޕޮލެންޑް، ސްލޮވާކިއާ އަދި ސްވިޑެންއެވެ. އަދި މަރުގެ ގްރޫޕް ކަމަށްވާ ގްރޫޕް އެފް ގައި ޕޯޗުގަލް ހިމެނޭއިރު، އެ ގްރޫޕުގައި ދެން ހިމެނެނީ ފްރާންސް، ޖަރުމަން އަދި ހަންގޭރީއެވެ.