ޤައުމީ ޓީމުގެ އެންމެ މުހިއްމު އެއް ކުޅުންތެރިޔާ ޢަލީ އަޝްފާގު (ދަގަނޑޭ) ކޯވިޑް-19 އަށް ނެގެޓިވް ވުމުން ޤައުމީ ޓީމާއި އަލުން ގުޅުމުގެ ފުރުޞަތު ލިބިއްޖެއެވެ.
ދަގަނޑޭ ކޯވިޑް-19 އަށް ޕޮޒިޓިވްވީ މީގެ ފަސް ދުވަސް ކުރިން ދުބާއީން ޗައިނާއަށް ޤައުމީ ޓީމު ދިއުމަށް ހެދި ޕީސީއާރު ޓެސްޓްތަކުންނެވެ. ދަގަނޑޭ އާއެކު ޤައުމީ ޓީމުގެ އަލީ ޝާމިސް (ތޮއްޕޭ) ވެސް ޕޮޒިޓިވް ވުމުގެ ސަބަބުން މި 2 ކުޅުންތެރިން ތިބީ އެ ވަގުތުން ފެށިގެން ޓީމާއި ވަކިން އައިސޮލޭޓް ކޮށްފައެވެ.
ޗައިނާއަށް ފުރުމުގެ ކުރިން ރާއްޖޭގެ ޤައުމީ ޓީމާއި ސީރިއާ އަދި ފިލިޕީންސްގެ ގައުމީ ޓީމުގެ ބައެއް ކުޅުންތެރިން ކޯވިޑް-19 އަށް ޕޮޒިޓިވް ވުމުގެ ސަބަބުން ޗައިނާއަށް މި ޓީމުތަކަށް އެތެރެވުމަށް ދަތިތަކެއް ހުރުމާއެކު، ފަހުން މި ކޮލިފައިން މެޗުތައް ދުބާއީއަށް ވަނީ ބަދަލުކޮށްފައެވެ. އެގޮތުން ދުބާއީގައި މިރޭ ކޮލިފައިން މެޗުތައް ފަށާއިރު ފުރަތަމަ މެޗުގައި ބައްދަލުކުރާނީ ދިވެހިރާއްޖެ އާއި ސީރިއާއެވެ.
ރާއްޖެއާއި ސީރިއާ މެޗަށް ފަހު ޤައުމީ ޓީމު ދެން އޮންނަ ފަރިތަކުރުންތަކުގައި އަލީ އަޝްފާގު ބައިވެރިވާނެއެވެ. އަދި ކޮލިފައިންގައި ކުރިޔަށް އޮތް ޗައިނާ މެޗާއި ފިލިޕީންސް މެޗުގައި އަޝްފާގު ފެނުމުގެ ފުރުޞަތު މިހާރު މި ވަނީ ބޮޑުވެފައެވެ.
އަޝްފާގު ކޯވިޑް-19 އަށް ނެގެޓިވްކަން ހާމަކޮށްފައިވަނީ އޭނާގެ ރަސްމީ ފޭސްބުކް ޕޭޖުގައި މިއަދު ކުރި ޕޯސްޓެެއްގައެވެ. މި ޕޯސްޓުގައި އަޝްފާގު ބުނެފައިވަނީ، މިއަދު ކޯވިޑް-19 އަށް ހެދި ޓެސްޓުން އޭނާ ނެގެޓިވް ކަމަށާއި، މާދަމާ އަލުން ޤައުމީ ޓީމާއި ގުޅޭނެ ކަމަށެވެ. އަޝްފާގު ވަނީ މީގެ ކުރިން މާލޭގައި ޤައުމީ ފުޓްބޯޅަ ޓީމު ހޮޓެލް ޖެންގައި ކޭމްޕް ކޮށްފައި ވަނިކޮށް އޭނާގެ އަންހެން ޕޮޒިޓިވްވެގެން ކޭމްޕް ދޫކޮށްލާފައެވެ. ނަމަވެސް ފަހުން ކޮވިޑަށް ޓެސްޓުކޮށް ނެގެޓިވްވުމުން އަޝްފާގު ވަނީ ޓިމާއި ގުޅިފައެވެ.
ވަރލްޑް ކަޕް އަދި އޭއެފްސީ އޭޝިއަން ކަޕް ޖޮއިންޓް ކޮލިފިކޭޝަންގައި ރާއްޖެ ކުޅޭ ފުރަތަމަ މެޗުގައި މިރޭ 9 ޖަހާއިރު ސީރިއާއި ދެކޮޅަށް ނުކުންނާއެވެ. މި މެޗު ޕީއެސްއެމްގެ ޔެސް ޓީވީން ވަގުތުން ދެއްކުމަށް ވަނީ ހަމަޖެހިފައެވެ.
ކޮމެންޓު ފޮނުވާ