ރެއާލްގެ ކޯޗަކަށް އަންޗޮލެޓީ ހަމަޖައްސައިފި

ރެއާލް މެޑްރިޑްގެ ކޯޗަކަށް އިޓަލީގެ ތަޖުރިބާކާރު ކޯޗު ކާލޯ އެންޗަލޮޓީ ހަމަޖައްސައިފިއެވެ.

ރެއާލްގެ ކޯޗުކަމާއި އަންޗޮލެޓީ ހަވާލުވެފައި މިވަނީ އިނގިރޭސި ޕްރިމިއާ ލީގުގައި ވާދަކުރާ އެވަޓަންގެ ކޯޗުކަމުގެ މަގާމު ދޫކޮށްލުމަށް ފަހުއެވެ. މިއީ ރެއާލްގެ ކޯޗު ކަމާއި އަންޗޮލެޓީ ހަވާލުވި ދެވަނަ ފަހަރުކަން ފާހަގަކޮށްލެވެއެވެ.

ރެއާލްގެ ކޯޗެއްގެ ގޮތުގައި 2013 އިން 2015 އަށް މަސައްކަތްކުރި އެންޗަލޮޓީ ،61، އެ ކްލަބާ ދެވަނަ ފަހަރަށް ހަވާލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ.

ރެއާލްގެ ކޯޗަކަށް އަންޗޮލެޓީ ހަމަޖެއްސީ އެ ކުލަބުގެ ކުރީގެ ކޯޗު ޒައިނުއްދީން ޒިދާން އެ މަގާާމުން ވަކިވިތާ ހަފްތާއެއްހާ ދުވަސް ފަހުންނެވެ.

ރެއާލްގެ ކޯޗުކަމުގައި އެންޗެލޮޓީ ވަނީ ރަނގަޅު ކާމިޔާބީތަަކެއް ހޯދާފައެވެ. 2013 އިން 2015 އާއި ދެމެދު ހޯދި ކާމިޔާބީތަކަށް ބަލާއިރު ރެއާލުން 2013/14 ވަނަ ސީޒަނުގެ ޗެމްޕިއަންސް ލީގުގެ ތަށި 10 ވަނަ ފަހަރަށް އުފުލާލީ އޭނާގެ ކޯޗުކަމުގެ ދަށުންނެވެ. އެ އަހަރުގެ ކޮޕަ ޑެލްރޭ އާއ ޔުއެފާ ސުޕަ ކަޕް އަދި ފީފާ ކުލަބް ވޯލްޑްކަޕް ރެއާލުން ހޯދާފައިވެއެވެ.