ޔުއެފާ ޗެމްޕިއަންސް ލީގުގެ ފައިނަލްގައި މެންޗެސްޓާ ސިޓީ ބަލިކޮށް، މުބާރާތުގެ ޗެމްޕިއަންކަން ދެވަނަ ފަހަރަށް ޗެލްސީން ހޯދައިފިއެވެ.
ޕޯޗުގަލުގެ ޕޯޓޯގައި ކުޅުނު ފައިނަލް މެޗު ޗެލްސީ ކާމިޔާބުކުރީ 1-0 ގެ ނަތީޖާއަކުންނެވެ.
މިއީ ޗެމްޕިއަންސް ލީގުގެ ފައިނަލުގައި އިނގިރޭސި ދެ ޓީމަކުން ވާދަކުރި ތިންވަނަ ފަހަރެވެ. ޗެލްސީ އެންމެ ފުރަތަމަ ޗެމްޕިއަންސް ލީގު ކާމިޔާބުކުރީ 2012 ވަނަ އަހަރެއެވެ.
މި މެޗުން ބަލިވުމާ އެކު ސިޓީގެ ތާރީހުގައި ފުރަތަމަ ފަހަރަށް ޗެމްޕިއަންސް ލީގު ހޯދަން ކުރާ އިންތިޒާރު ސިޓީއަށް މިވަނީ ދިގުވެފަ އެވެ. މިދިޔަ އަހަރުތަކުގައި ބޮޑު ހަރަދުކޮށް އެޓީމުން އެންމެ ބޮޑަށް ޓާގެޓް ކުރި ތައްޓަކީ ޗެމްޕިއަންސް ލީގެވެ. މިއީ ޗެމްޕިއަންސް ލީގުގެ ތާރީހުގައި ސިޓީ ފައިނަލަށް ދަތުރުކުރި ފުރަތަމަ ފަހަރެވެ.
މި މެޗުގެ ފުރަތަމަ ހާފުގައި ޗެލްސީއަށް ލަނޑު ޖަހަން ހުސްފުރުސަތުތަކެއް ލިބި ވަނީ ބޭކާރުވެފައެވެ. އެގޮތުން ޗެލްސީގެ ޓީމޯ ވާނާއަށް ވަނީ ލަނޑު ޖަހަން ހުސް ފުރުސަތުތަކެއް ލިބި ބޭކާރުވެފައެވެ. މެޗުގެ ފުރަތަމަ ހާފުގައި ސިޓީގެ ރަހިމް ސްޓާލިންއަށް ވެސް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. މެޗުގެ ފުރަތަމަ ހާފު ނިމެން ދެ މިނެޓަށް ވެފައިވަނިކޮށް ކައި ހާވާޓްސް ވަނީ ޗެލްސީއަށް ލީޑު ނަގައިދީފައެވެ.
މެޗުގެ ދެވަނަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ސިޓީއަށް މައްސަލަތަކެއް ދިމާވެފައިވަނީ އެޓީމުގެ ކެޕްޓަން ކެވިން ޑިބްރައިނާ އަނިޔާގެ ސަބަބުން ބަދަލުކުރަން ޖެހުމާއިއެކުއެވެ. އެހެން ނަމަވެސް ސިޓީއަށް ވަނީ މި ހާފުގައި ލަނޑު ޖަހަން ފުރުސަތުތަކެއް ލިބިފައެވެ. އެގޮތުން ސިޓީގެ ގެބްރިއަލް ޖީސޫސޫސް އަށް ވަނީ ލަނޑު ޖަހަން ފުރުސަތުތަކެއް ލިބިފައެވެ.
މިއީ ޗެލްސީއާ ހަވާލުވުމަށް ފަހު ޗެލްސީގެ ކޯޗު ތޯމަސް ޓުކެލް ޕެޕް ގާޑިއޯލާގެ ސިޓީއާ ވާދަކޮށް މޮޅުވި ތިން ވަނަ ފަހަރެވެ. މީގެ ކުރިން ޓުކެލް ވަނީ އިނގިރޭސި ޕްރިމިއާ ލީގުގައި ސިޓީ ދަނޑުގައި ކުޅުނު މެޗާއި އެފްއޭ ކަޕްގެ ސެމީ ފައިނަލުގައި ވެމްބްލީ ސްޓޭޑިއަމްގައި ކުޅުނު މެޗުން މޮޅުވެފަ އެވެ.
ކޯޗު ގާޑިއޯލާ ވަނީ 2009 ވަނަ އަހަރާއި 2011 ވަނަ އަހަރު ބާސެލޯނާގައި ހުރެ ޗެމްޕިއަންސް ލީގު ކާމިޔާބުކޮށްފަ އެވެ. އެކަމަކު އޭގެފަހުން ބަޔާން މިއުނިކާއި ސިޓީގައި ގާޑިއޯލާ އަށް ޗެމްޕިއަންސް ލީގު ކާމިޔާބު ކުރެވޭގޮތެއްނުވެ އެވެ.
ކޮމެންޓު ފޮނުވާ