ބާސެލޯނާގެ ކޯޗް ރޮނަލްޑް ކޫމަންގެ ކުރިމަގާ ބެހޭގޮތުން މަޝްވަރާކޮށްފި އެވެ.
ބާސާގެ ކޭމްޕް ނޯ ސްޓޭޑިއަމްގައި ބޭއްވި ބައްދަލުވުމަށް، ކޫމަން ދިޔައީ އޭނާގެ މަންދޫބު ރޮބް ޖެންސަންއާ އެކު އެވެ. ކްލަބުގެ ރައީސް ލަޕޯޓާގެ އަރިހުގައި ބާސާގެ ފުޓްބޯލް ޑައިރެކްޓާ މަޓޭއު އަލެމާނީ ވެސް ބައްދަލުވުމަށް ވަޑައިގަތެވެ.
ބާސާގައި ކޫމަންގެ ކުރިމަގާ ބެހޭ ގޮތުން ސުވާލު އުފެދިފައި ވަނިކޮށް، އެ ކްލަބުގެ ރައީސް ޔޮއާން ލަޕޯޓާ ވަނީ ކޫމަންއާ ބައްދަލުކުރައްވާފަ އެވެ. ސްޕެއިންގެ މީޑިއާތަކުން އެ ބައްދަލުވުން ސިފަކުރީ ކޫމަންގެ ކުރިމަގު ކަނޑައެޅުމަށް ބާއްވާ ބާސާގެ ބޮޑު ބައްދަލުވުމުގެ ގޮތުގަ އެވެ.
ކޫމަން އާއި ޖެންސަން، ކޭމްޕް ނޯ އިން އެ ބައްދަލުވުމަށް 30 މިނެޓް ވެސް ނުވަނީސް ނުކުއިތް މަންޒަރު ވަނީ ފެނިފަ އެވެ. އޭގެ 10 މިނެޓް ފަހުން ލަޕޯޓާ އާއި އަލެމާނީ ވެސް ނުކުމެވަޑައިގަތެވެ. ބައްދަލުވުމުގައި ނިންމީ ކޮން ގޮތަކަށް ކަމެއް ސާފެއް ނުވެ އެވެ.
