ވިދްޔާ ބާލަންގެ ކުރިއަށްއޮތް ފިލްމު "ޝޭރްނީ" އަންނަ މަހު އޮންލައިން ޕްލެޓްފޯމް އެމެޒޮން ޕްރައިމް ވީޑިއޯ އިން ޕްރިމިއާކުރަން ނިންމައިފި އެވެ.
އެގޮތުން ހޯމަ ދުވަހު ވަނީ ފިލްމުގައި ވިދްޔާ ފެނިގެންދާނެ ގޮތުގެ ފަސްޓް ލުކާއި އެކު ފިލްމުގެ ޕޯސްޓަރު އާންމުކޮށްފަ އެވެ. ޕޯސްޓަރުން ޖޫން މަހު ފިލްމު އަޅުވާނެކަން އެނގުނު ނަމަވެސް ވަކި ތާރީހެއް އަދި ހާމައެއް ނުކުރެއެވެ.
"ޝޭރްނީ" ގައި ވިދްޔާ ފެނިގެންދާނީ ފޮރެސްޓް އޮފިސަރެއްގެ ރޯލުންނެވެ. މި ފިލްމު ޑައިރެކްޓް ކޮށްފައިވަނީ 90 ވަނަ އެކަޑަމީ އެވޯޑްގެ "ބެސްޓް ފޮރިން ލޭންގުއޭޖް ފިލްމަކަށް" އިންޑިއާއިން ހުށަހެޅި "ނިއުޓަން"ގެ ޑައިރެކްޓަރ އަމިތު މަސުރްކަރެވެ.
ފިލްމުގައި ވިދްޔާގެ އިތުރުން އިލާ އަރުން، ނީރަޖް ކަބީ، ބްރިޖެންދުރަ ކާލާ، މުކުލް ޗައްޑާ، ޝަރަދް ސަކްސޭނާ އަދި އަޝްވިނީ ލަޑޭކަރް ފަދަ ތަރިން މުހިންމު ރޯލުތަކުން ފެނިގެންދާނެއެވެ.
ބޫޝަން ކުމާރުގެ ޓީ ސީރީޒާއި ވިކްރަމް މަލްހޮތުރާގެ އަބުންދަންތިއާ އެންޓަޓައިންމަންޓް ގުޅިގެން ގެނެސްދޭ މިފިލްމުން ކުޅަދާނަ އެކްޓްރެސް ވިދްޔާގެ ވަރަށް ތަފާތު ރޯލެއް ބެލުންތެރިންނަށް ފެނިގެންދާނެއެވެ.
ވިދްޔާ އެެންމެ ފަހުން ބެލުންތެރިންނަށް ފެނިގެންދިޔައީވެސް ހަމަ އެމެޒޮން ޕްރައިމްގެ ފިލްމެއް ކަމަށްވާ "ޝަކުންތަލާ ދޭވީ" އިން މިދިޔަ އަހަރު އެވެ.
ކޮމެންޓު ފޮނުވާ