އިނގިރޭސި ލީގަށް އާސެނަލުން އެކުލަވާލި ސްކޮޑުން ޖާގަ މެސުޓް އޮޒިލަށް ފުރުސަތު ނުދޭން ނިންމައިފިއެވެ.
އާސެނަލުގެ ޕްރިމިއާ ލީގު ސްކޮޑުންވެސް އޮޒިލް ބާކީކުރިއިރު، މި ސީޒަނުގެ ޔުއެފާ ޔޫރޮޕާ ލީގަށް އާސެނަލުން އެކުލަވާލި ސްކޮޑުންވެސް އޭނާއަށް ޖާގައެއް ދީފައެއް ނުވެއެވެ. އުމުރުން 31 އަހަރުގެ އޮޒިލް އާސެނަލުގެ އެއްބަސްވުމުގައި ހުރީ މި ސީޒަނުގެ ނިޔަލަށެވެ.
އާސެނަލުގެ ސްކޮޑުން އޮޒިލް ބާކީކުރި ނަމަވެސް، އޮޒިލް އާސެނަލް ދޫކޮށްލާނީ އެއްބަސްވުން ހަމަވުމުން އަންނަ އަހަރުގެ އަންނަ ސީޒަނުގަކަމަށް ކަމަށް ރިޕޯޓުތައް ބުނެއެވެ. ރެއާލް މެޑްރިޑް ދޫކޮށް 2013 ވަނަ އަހަރު އާސެނަލަށް ބަދަލުވި އޮޒިލް ވަނީ އާސެނަލަށް މިހާތަނަށް ކުޅުނު 254 މެޗުގައި 44 ލަނޑު ކާމިޔާބުކޮށްފައެވެ.
އޮޒިލަށް ދެން އެންމެ އަވަހަށްވެސް އާސެނަލް ޖާޒީގައި ކުޅުމުގެ ފުރުސަތު ދެން ލިބޭނީ އަންނަ އަހަރުގެ ފެބްރުއަރީ މަހުގައެވެ. އެންމެ ފަހުން އޮޒިލް އާސެނަލަށް މެޗެއް ކުޅުނީ މީގެ ހަތް މަސް ކުރިންނެވެ.
