ބޮސްނިއާގެ ސާބުންގެ ކުރީގެ ލީޑަރު، ހުކުމްގެ ބާކީބައި ތަންފީޒު ކުރާނީ އިނގިރޭސިވިލާތުގެ ޖަލެއްގައި

އިންސާނިއްޔަތާ ދެކޮޅަށް ގަތުލު އާންމު ހިންގުމުގެ ކުށް ސާބިތުވެ، އުމުރު ދުވަހުގެ ޖަލުގެ ހުކުމް ތަންފީޒު ކުރަމުންދާ، ބޮސްނިއާގެ ކުރީގެ ސާބް ލީޑަރ ރަޑޮވާން ކަރަޒިކް އޭނާގެ ހުކުމްގެ ބާކީ އޮތް ބައި ތަންފީޒު ކުރާނީ އިނގިރޭސިވިލާތުގެ ޖަލެއްގައިކަމަށް، އިގިރޭސި ސަރުކާރުން ބުނެފިއެވެ.

ބޮސްނިއާގެ މުސްލިމުންނާ ދެކޮޅަށް އިންސާނިއްޔަތާ ޚިލާފު އެތަކެއް ބޮޑެތި ޖަރީމާތަކެއް ހިންގާފައިވާ، 1992 އިން 1995 އަށް ހިގައިދިޔަ ބޮސްނިއާ ހަގުރާމައިގަ އެންމެ ބޮޑު މޭސްތިރިއަކީ، އުމުރުން މިހާރު 75 އަހަރު ވެފައިވާ ރަޑޮވާން ކަރަޒިކްއެވެ.

އެނާގެ މައްޗަށް ކުށް ސާބިތުވެފައިވަނީ، 2016 ވަނަ އަހަރު ޔޫންއެންގެ ކޯޓުގައި ހިންގި ޝަރީއަތުގައެވެ. އެނާގެ މައްޗަށް ސާބިތުވެފައިވަނީ، ގަތުލް އާންމު ހިންގުމާއި، އިންސާނިއްޔަތާއި ޚިލާފް ޖަރީމާތައް ހިންގުމާއި އަދި މީގެ އިތުރުން ހަގުރާމައިގެ ބޮޑެތި ޖަރީމާތައް ހިންގުމުގެ ކުށެވެ. މީގެ ތެރޭގައި، ބޮސްނިއާގެ ސެބްރެނިކާގައި، ބޮސްނިއަން ސާރބް ފައުޖުތަކުން 8،000 މުސްލިމުން ގަތުލް ކުރުމުގެ ޒިންމާވެސް އޭނާ އުފުލަން ޖެހެއެވެ.

ހޭގުގައި ހުންނަ ބައިނަލް އަގުވާމީ ކޯޓުން އޭނާގެ މައްޗަށް އެންމެ ފުރަތަމަ އިއްވާފައިވަނީ 40 އަހަރު ދުވަހުގެ ޖަލު ހުކުމެކެވެ. އެހެންނަމަވެސް، ހޭގުގެ ކޯޓުގެ އިސްތިއުނާފު ފަނޑިޔާރުންވަނީ، މި ހުކުމް އުމުރު ދުވަހުގެ ޖަލު ހުކުމަކަށް ބޮޑު ކޮށްފައެވެ. އިސްތިއުނާފް ފަނޑިޔާރުން ވަކާލާތު ކޮށްފައިވަނީ، އޭނާ ހިންގާފައިވާ ޖަރީމާތަކުގެ ނިސްބަތަށް ބަލާއިރު، އޭނާގެ މައްޗަށް އިއްވާފައިވާ ޖަލުހުކުމަކީ އެކަށީގެންވާ މިންވަރަށްވުރެ ކުޑަ ހުކުމެއް ކަމުގައި ބުނެއެވެ.

މިވަގުތު އޭނާ ހުކުމް ތަންފީޒު ކުރަމުންދަނީ ހޭގުގައި ހުންނަ ކޯޓުގެ ޑިޓެންޝަން ސެންޓަރުގައެވެ. އަދި އޭނާ ބަދަލު ކުރުމަށް ހަމަޖެހިފައިވަނީ، އިނގިރޭސިވިލާތުގެ ޖަލަކަށެވެ. މިއީ އެގައުމުގެ ކޮންތަނެއްގައި ހުންނަ ޖަލެއްކަން ހާމަކޮށްފައެއް ނުވެއެވެ.

ދެވަނަ ބޮޑު ހަނގުރާމައަށްފަހު، ޔޫރަޕްގައި ހިނގި އެންމެ ގެއްލުން ބޮޑު އަދި ލޭއޮހޮރުވުން ބޮޑު ހަގުރާމައަކީ ބޮސްނިއާ ހަގުރާމައެވެ. މި ހަމަނުޖެހުންތަކުގައި 100،000 އަށްވުރެ މީހުން މަރުވެ، އެތައް މިލިއަން ބައެއްގެ ގެދޮރު ގެއްލިފައި ވެއެވެ.

ކަރަޒިކް އަބަދުވެސް ބުނަމުން އަންނަނީ، ބޮސްނިއާ ހަގުރާމާގައި، ބޮސްނިއާގެ ވެރިރަށް ސަރަޖޭވީ ހިސޯރުކޮށްގެން، ބޮސްނިއާގެ ސާބުން ހިންގި ހަރަކާތްތަކަކީ، އެގައުމުގެ ސާރބް ދަރިކޮޅުގެ މީހުންގެ ހިމާޔަތުގައި ހިންގާފައިވާ ހަރަކާތްތަކެއް ކަމުގައެވެ.

ހޭގުގައި އޭނާގެ މައްޗަށް އުފުލުނު ދައުވާތަކަށްފަހު، 2008 ވަނަ އަހަރު އޭނާ ހައްޔަރު ކުރުމާ ހަމައަށް އެތައް އަހަރެއްވަންދެން އޭނާ ވަނީ ފލިައިގެން އުޅެފައެވެ. އެހުރިހާ ދުވަސްތަކެއް ވަންދެން އޭނާ އުޅެމުން ގޮސްފައިވަނީ، މުޅިން އާ ބާވަތްތަކުގެ ތެރަޕީތައް ފޯރުކޮށް ދޭ ހަކީމީ ބޭސްވެރިއެއްގެ ގޮތުގައި، ސިފަ ބަދަލު ކޮށްގެންނެވެ.