ޔުއެފާ ޗެމްޕިއަންސް ލީގުގެ ކުއާޓާ ފައިނަލް ދެ ވަނަ ލެގުގައި މިރޭ ލިވަޕޫލާ 0-0 އިން އެއްވަރުވި، ނަމަވެސް އެގްރިގޭޓް ނަތީޖާއިން ކުރި ހޯދައި ރެއާލް މެޑްރިޑް މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.
ލިވަޕޫލުން ވަނީ ރޭގެ މުޅި މެޗަށް ބަލާއިރު ލަނޑު ޖަހާނެ ރަނގަޅު ފުރުސަތުތަކެއް ތަނަވަސްކޮށްފަ އެވެ. ފުރަތަމަ ފަސް މިނިޓް ތެރޭ ސަޑިއޯ މާނޭ ދިން ބޯޅައަކުން އޭރިއާތެރޭގައި މުޅިން ހުސްކޮށް ހުރެފައި މުހައްމަދު ސަލާހު ޖެހި ބޯޅަ ރެއާލްގެ ކީޕަރު ތިބައު ކޯޓުއާ ފައިން ވަނީ މަތަކޮށްފަ އެވެ.
ފުރަތަމަ ހާފު ނިމުމުގެ ކުރިން ލިވަޕޫލްގެ ސަލާހާއި ޖިއޮޖީނިއޯ ވައިނަލްޑަމް އަށް އޭރިއާތެރެއިން ހުސްކޮށް ލިބުނު ފުރުސަތުތަކުން ފޮނުވާލި ބޯޅަތައް އަމާޒުވީ ހުރަސްދަނޑިމަތިންނެވެ. ދެ ވަނަ ހާފްގައި ލިވަޕޫލްގެ ރޮބާޓޯ ފިރްމީނޯ އާއި ސަލާހު ފޮނުވާލި ބޯޅަތައް ހުއްޓުވީ ކުރިން ޗެލްސީ އަށް ކުޅުނު ތިބައު ކޯޓުއާ އެވެ. މި ހާފްގައި ރެއާލްގެ ވިނީޝިއުސް ޖޫނިއާ އަށް ލަނޑު ޖަހަން ލިބުނު ހުސް ފުރުސަތެއްގައި އޭނާ ފޮނުވާލި ބޯޅަ ލިވަޕޫލްގެ ކީޕަރު އަލިސަން ބެކާ ވަނީ ހުއްޓުވައިފަ އެވެ. އޭގެ ފަހުން ބެންޒެމާ މުޅިން ހުސްކޮށް ހުރެފައި އޭރިއާތެރެއިން ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ.
ރެއާލް ދަނޑުގައި މިދިޔަ ހަފްތާގައި ކުޅުނު ފުރަތަމަ ލެގުން ލިވަޕޫލް ބަލިވީ 3-1 އިންނެވެ. ސެމީ ފައިނަލުގައި ރެއާލް ކުޅޭނީ އިންގްލެންޑްގެ ޗެލްސީއާ އެވެ. ޗެލްސީން ސެމީގެ ފުރުސަތު ހޯދީ ކުއާޓާގައި ޕޯޓޯ ބަލިކުރުމަށް ފަހު އެވެ. އަނެއް ސެމީގައި މެންޗެސްޓާ ސިޓީ ކުޅޭނީ ޕީއެސްޖީއާ އެވެ. ސެމީ ފައިނަލް މެޗުތައް އޮންނާނީ މި މަހު 27-28 އާއި އަންނަ މަހު 4-5 ގަ އެވެ.
މިއީ ޗެމްޕިއަންސް ލީގުގެ ތާރީހުގައި މުބާރާތުގެ އެންމެ ކާމިޔާބު ޓީމު ކަމަށްވާ ރެއާލުން ސެމީ ފައިނަލުން ފުރުސަތު ހޯދި 35 ވަަނަ ފަހަރެވެ. ޗެމްޕިއަންސް ލީގުގެ ނޮކައުޓް ބުރުގައި މިހާތަަނަށް ރެއާލުން ފުރަތަމަ ލެގުގައި އިނގިރޭސި ޓީމެއް އަތުން މޮޅުވެއްޖެނަމަ އަނެއް ބުރުން ވަނީ ފުރުސަތު ހޯދައިފަ އެވެ.
ކޮމެންޓު ފޮނުވާ