ޕޯޓޯ ކަޓުވާލުމަށްފަހު ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ސެމީ ފައިނަލަށް ޗެލްސީ ދަތުރުކޮށްފިއެވެ.
ޗެމްޕިއަންސް ލީގުގެ ކުއާޓާ ފައިނަލުގެ ދެވަނަ ލެގުގައި ރޭ އަމިއްލަ ދަނޑުގައި 1-0 ގެ ނަތީޖާއަކުން ޕޯޓޯ އަތުން ޗެލްސީ ވަނީ ބަލިވެފައެވެ. ނަމަވެސް ރަށުން ބޭރުގައި ކުޅުނު ފުރަތަމަ ލެގުން ޗެލްސީ ވަނީ 2-0 ގެ ނަތީޖާއަކުން މޮޅުވެފައެވެ. އެހެންކަމުން ޗެލްސީއަށް ކުރި ލިބުނީ 2-1 ގެ އެގްރިގޭޓް ނަތީޖާއަކުންނެވެ.
ޕޯޓޯ އާއި ޗެލްސީ ވާދަކުރި މެޗުގައި ފެނުނު ހަމައެކަނި ލަނޑު މެޗުގެ އިތުރު ވަގުތުގައި ކާމިޔާބުކުރީ ޕޯޓޯގެ މެހްދީ ޓަރޭމީ އެވެ. މިއީ އޯވަހެޑަކުން ޓަރޭމީ ކާމިޔާބުކުރި ގޯލެކެވެ.
މި ނަތީޖާއާއެކު ސެމީގެ ޖާގައެއް ޗެލްސީ ހޯދިއިރު، ސެމީގައި އެ ޓީމު ބައްދަލުކުރަން ޖެހޭނީ ލިވަޕޫލް ނުވަތަ ރެއާލް މެޑްރިޑާއެވެ. ކުއާޓާގައި ލިވަލާއި ރެއާލް ބައްދަލުކުރާއިރު، އަމިއްލަ ދަނޑުގައި ކުޅުނު ފުރަތަމަ ލެގުން ރެއާލް ވަނީ 3-1 ގެ ނަތީޖާއަކުން މޮޅުވެފައެވެ.
ކޮމެންޓު ފޮނުވާ