އެންމެ ފަހުގެ ޗެމްޕިއަން ބަޔާން މިއުނިކް ކަޓުވާލުމަށްފަހު ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ސެމީ ފައިނަލަށް ފްރާންސްގެ ޕީއެސްޖީ ދަތުރުކޮށްފިއެވެ.
ޕީއެސްޖީގެ އަމިއްލަ ދަނޑުގައި ރޭ ކުޅުނު ޗެމްޕިއަންސް ލީގުގެ ކުއާޓާ ފައިނަލުގެ ދެވަނަ ލެގު 0-1 އިން ކާމިޔާބުކޮށްފައިވަނީ ބަޔާން މިއުނިކުންނެވެ. ނަމަވެސް ބަޔާން މިއުނިކްގެ ދަނޑުގައި ކުޅުނު ފުރަތަމަ ލެގު 2-3 ގެ ނަތީޖާއަކުން ކާމިޔާބުކުރީ ޕީއެސްޖީއެވެ. މި ނަތީޖާއާއެކު 3-3 އިން އެގްރިގޭޓް ސްކޯރ އެއްވަރުވިނަމަވެސް، އަވޭ ގޯލުގެ ތަފާތުން ކުރި ހޯދައި ޕީއެސްޖީ ވަނީ މުބާރާތުގެ ސެމީ ފައިނަަލުން ޖާގަ ހޯދާފައެވެ.
ރޭގެ މެޗުގައި ގިނަ ވަގުތު ބޯޅަ ކޮންޓްރޯލްކޮށްގެން ކުޅުނީ ޕީއެސްޖީންނެވެ. އެގޮތުން ފުރަތަމަ ހާފުގައި ޕީއެސްޖީގެ ނޭމާ ފޮނުވާލި ހަމަލާތައް ފާހަގަކޮށްލެވެއެވެ. ފުރަތަމަ ހާފުގައި ނޭމާ ފޮނުވާލި 2 ހަމަލާއެއް ގޯލުގެ ދަނޑިއަށްވެސް ވަނީ އަމާޒުވެފައެވެ.
މި މެޗުގައި ފެނިގެން ދިޔަ ހަމައެކަނި ލަނޑު ބަޔާން މިއުނިކުން ކާމިޔާބުކޮށްފައިވަނީ ފުރަތަމަ ހާފް ނިމެން ފަސް މިނެޓަށް ވެފައި ވަނިކޮށެވެ. މި ލަނޑު އެޓީމަށް ކާމިޔާބުކޮށްދިނީ، އެރިކް މެކްސިމް ޗޫޕޯ-މޯޓިންނެވެ.
މިދިޔަ އަހަރުގެ މުބާރާތުގެ ފައިނަލުގައި ވާދަކުރި ޕީއެސްޖީ ސެމީއަށް ދަތުރުކޮށްފައިވާއިރު، ސެމީގައި އެ ޓީމު ބައްދަލުކުރަން ޖެހޭނީ މެންޗެސްޓާ ސިޓީ ނުވަތަ ބޮރޫޝިއާ ޑޯޓްމުންޑާއެވެ. ކުއާޓާގައި ސިޓީ އާއި ޑޯޓްމުންޑް ބައްދަލުކުރާއިރު، އަމިއްލަ ދަނޑުގައި ކުޅުނު ފުރަތަމަ ލެގުން ސިޓީ ވަނީ 2-1 ގެ ނަތީޖާއަކުން މޮޅުވެފައެވެ.
ކޮމެންޓު ފޮނުވާ