ރެއާލް މެޑްރިޑުގެ ކެޕްޓަން ސާޖިއޯ ރާމޯސް ކޮވިޑް-19 އަށް ޕޮޒިޓިވްވެއްޖެއެވެ.
ސްޕެއިންގެ ޤައުމީ ޓީމަށްވެސް ކުޅެމުން އަންނަ ޑިފެންޑަރ ރާމޯސް ކޯވިޑް-19 އަށް ޕޮޒިޓިވްވެފައިވާކަން ރެއާލް މެޑްރިޑުންވެސް ވަނީ ކަށަވަރުކޮށްދީފައެވެ.
ރާމޯސް ކޯވިޑް-19 އަށް ޕޮޒިޓިވްވިކަން އެނގުނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ލިވާޕޫލާ ދެކޮޅަށް ކުޅެން އޮތް މެޗުގެ ކުރިން ރެއާލްގެ ހުރިހާ ކުޅުންތެރިން ކޯވިޑް-19 އަށް ކުރި ޓެސްޓްތަކުގެ ތެރެއިންނެވެ. ޔުއެފާގެ ޕްރޮޓޮކޯލްގެ ދަށުން ޗެމްޕިއަންސް ލީގުގައި ކުޅޭ ކޮންމެ މެޗެއްގެ ކުރިން ދެ ޓީމުގެ ކުޅުންތެރިން ޕީސީއާރު ޓެސްޓް ހަދަން ޖެހެއެވެ.
އުމުރުން 35 އަހަރުގެ ރާމޯސް މި ވަގުތު ހުރީ ފަޔަށް ލިބުނު އަނިޔާއަކާ ގުޅިގެން ކުޅުމާ ދުރުގައެވެ. ރާމޯސްއަށް އަނިޔާވެފައިވަނީ މިދިޔަ މަހު ސްޕެއިންގެ ޤައުމީ ޓީމަށް ކުޅުނު މެޗުތަކުގެ ތެރެއިންނެވެ.
މި އަނިޔާއާ ގުޅިގެން ރާމޯސް ކުޅުމާ ދުރުގައި ހުންނަން ޖެހޭނެ ސީދާ މުއްދަތެއް ހާމަކޮށްފައި ނުވި ނަމަވެސް، އޭނާއަށް ވަނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި ލިވަޕޫލް އަތުން ރެއާލް މޮޅުވި މެޗު ގެއްލިފައެވެ. އަދި ބުދަ ދުވަހުގެރޭ ކުޅޭ ދެވަނަ ލެގުގައިވެސް އޭނާއަށް ނުކުޅެވޭނެއެވެ.
މި ފަހަރުގެ ޗެމްޕިއަންސް ލީގުގެ ކުއާޓާގައި ރެއާލް ވާދަކުރާއިރު، އަމިއްލަ ދަނޑުގައި ކުޅުނު ފުރަތަމަ ލެގުގެ މެޗުން 3-1 ގެ ނަތީޖާއަކުން ލިވަޕޫލް ބަލިކޮށް، ސެމީ ފައިނަލުން ޖާގައެއް ކަށަވަރުކުރުމާ ގާތަށް ރެއާލް ވަނީ ޖެހިލާފައެވެ. އަދި ދެވަނަ ލެގުގެ މެޗު ކުޅުމަށް އަންގާރަ ދުވަހު ރެއާލް ޓީމު ވަނީ އިންގްލެންޑަށް ގޮސްފައެވެ. މި މެޗު ކުޅޭނީ ބުދަ ދުވަހުގެރޭ ލިވަޕޫލުގެ ދަނޑުގައެވެ.
ކޮމެންޓު ފޮނުވާ