ބޮލީވުޑްގެ މަޝްހޫރު ތަރި ޝްރައްދާ ކަޕޫރް ދެ މަސްދުވަސް ނުވަނީސް 3 ވަނަ ފަހަރަށް ރާއްޖެއައިސް ބަރޮސް މޯލްޑިވްސްގައި އަންނަނީ ޗުއްޓީހޭދަކުރަމުންނެވެ. އެގޮތުން އޭނާ އިއްޔެ ވަނީ ބަރޮސް މޯލްޑިވްސްގައި ނަގާފައިވާ ފޮޓޯއެއް އިންސްޓަގްރާމުން ހިއްސާކޮށްފައެވެ. އަދި އިއްޔެގެ ފްލޯޓިންގ ބްރޭކްފާސްޓްގެ ފޮޓޯއެއް އޭނާގެ އިންސްޓަގްރާމް ސްޓޯރީގައި ވަނީ ހިއްސާކޮށްފަ އެވެ.

ނަމަވެސް ސަޕޯޓަރުންނާއި މީޑިއާގެ ސަމާލުކަން އެންމެބޮޑަށް ހުއްޓުނު އެއް ކަމަކީ ޝްރަދާ ރާއްޖެ އައިސް އިންސްޓަގްރާމުގައި ހިއްސާކުރި ފޮޓޯއަށް އޭނާގެ ބޭބެ ޝިދާންތު ކަޕޫރު ކުރި ކޮމެންޓަށެވެ.

"ރަނިންގ ބެކް ޓު ނޭޗަރ" މިހެން ޖަހާފައި ޝްރައްދާ ދޫކޮށްލި ފޮޓޯއަށް ކޮމެންޓް ކުރަމުން އޭނާގެ ބޭބެ ސަމާސާ ރާގަކަށް ބުނެފައި ވަނީ "ދެން ތިތާ ދިރިއުޅެން ފަށަންވީ ނޫންހޭ" އެވެ.

 

View this post on Instagram

 

A post shared by Shraddha ✶ (@shraddhakapoor)

ޝްރައްދާ މިދިޔަ މަހު ދެފަހަރެއްގެ މަތިން ރާއްޖެ އައިސްފައި ވާއިރު ފުރަތަމަ އޭނާ ރާއްޖެއައީ އޭނާގެ ދެބޭންގެ ދެދަރި ކޮއްކޮ އެކްޓަރ ޕްރިޔާންކް ޝަރުމާގެ ކައިވެނި ހަފްލާއަށެވެ. ޕްރިޔާންކް އަކީ އެކްޓަރ ޕަދުމިނީ ކޯލާޕޫރީގެ ދަރިފުޅެވެ. އަދި ޕަދުމިނީ އަކީ ޝްރައްދާގެ މަންމަ ޝިވާންގީ ކަޕޫރްގެ ކޮއްކޮ އެވެ.

މިދަތުރު ނިންމާ އެނބުރި ދިއުމަށްފަހު ހަފްތާއެއްހާ ދުވަސް ފަހުން އަނެއްކާ އެނބުރި ރާއްޖެއައީ ބައްޕަ ޝަކްތީ ކަޕޫރާއި މަންމަ ޝިވާންގީ އާވެސް އެކު ޗުއްޓީހޭދަކޮށްލުމަށެވެ. އެޗުއްޓީ ޝްރައްދާ ހޭދަކުރީ ވޮއްމުލި ރިސޯޓުގަ އެވެ.

އޭނާ އަނެއްކާވެސް ރާއްޖެއަށް ޗުއްޓީއަށް އައިސްފައި ވާއިރު ދާދިފަހުން އޭނާވަނީ އާ ފިލްމަކަށް ސޮއިކޮށްފައެވެ. އެއީ ޝްރައްދާ ޑަބަލް ރޯލުން ފެންނާނެ ފުރަތަމަ ފިލްމު "ޗަލްބާޒް އިން ލަންޑަން" އެވެ.

"އާޝިގީ 2″، "ބާގީ"، "އޭކް ވިލަން"، އަދި "އާޝިޤީ 2″ ފަދަ ކާމިޔާބު ފިލްމުތަކެއް ބެލުންތެރިންނާހަމައަށް ގެނެސްދީފައިވާ ޝްރައްދާ އެންމެފަހުން ބެލުންތެރިންނަށް ފެނިފައި ވަނީ މިދިޔަ އަހަރު "ބާގީ 3″ އިން ނެވެ.