ލިވަޕޫލް މޮޅުވެ ގަދަހަތަރެއްގެ އުންމީދު އާކޮށްފި

އިނގިރޭސި ޕްރިމިއާ ލީގުގައި އާސެނަލް ބަލިކޮށް ގަދަ ހަތަރެއްގެ އުއްމީދު އެންމެ ފަހުގެ ޗެމްޕިއަން ލިވަޕޫލުން އާކޮށްފިއެވެ.

ގަދަ ހަތަރެއްގެ އުއްމީދު ލިވަޕޫލުން އާކުރީ ރަށުން ބޭރުގައި ކުޅުނު މެޗުން އާސެނަލް އަތުން 3-0 ލަނޑުން މޮޅުވެގެންނެވެ. މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މުޅި މެޗު ކޮންޓްރޯލް ކޮށްގެން ކުޅެފައިވަނީ ލިވަޕޫލުންނެވެ. އެގޮތުން ލިވަޕޫލުން މި މެޗުގައި ގިނަ ހަމަލާތަކެއް އުފެއްދިއިރު، އެ ޓީމުން ލީޑު ނަގާފައިވަނީ މެޗުގެ 64 ވަނަ މިނެޓުގައެވެ.

ޓްރެންޓް އަލެކްސަންޑަ-އާނޯލްޑް ނަގައިދިން ހުރަހަކުން މި ލަނޑު ލިވަޕޫލަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޑިއޯގޯ ޖޮޓާއެވެ. އޭގެ ހަތަރު މިނެޓު ފަހުން ލިވަޕޫލަށް ލީޑު ފުޅާކޮށްދިން ލަނޑު ކާމިޔާބުކޮށްދިނީ މުޙައްމަދު ސަލާހެވެ. އަދި މެޗު ނިމެން އަށް މިނެޓަށް ވެފައި ވަނިކޮށް، އާސެނަލުގެ ގަބްރިއެލް މަގަލްހައެސް ހެދި ގޯހެއްގެ ފައިދާ ނަގައި، މެޗުގައި މޮޅު ކުޅުމެއް ދެއްކި ޖޮޓާ ވަނީ ލިވަޕޫލުގެ ތިންވަނަ ލަނޑު ކާމިޔާބުކޮށްދީފައެވެ.

މި މޮޅާއެކު ތާވަލުގެ ފަސްވަނައަށް ލިވަޕޫލް ޖެހިލިއިރު، އެ ޓީމަށް ކުޅުނު 30 މެޗުން ވަނީ 49 ޕޮއިންޓް ލިބިފައެވެ. ތާވަލުގެ ހަވަނައަށް ވެއްޓުނު ވެސްޓް ހޭމް ޔުނައިޓެޑަށް 29 މެޗުން 49 ޕޮއިންޓް ލިބިފައިވާއިރު، ހަތަރުވަނައިގައި އޮތް ޗެލްސީއަށް 30 މެޗުން ލިބިފައިވަނީ 51 ޕޮއިންޓެވެ. މީގެ އިތުރުން ލިވަޕޫލް އަތުން ބަލިވި އާސެނަލް އޮތީ ތާވަލުގެ ނުވަވަނައިގައި 30 މެޗުން 42 ޕޮއިންޓާއެކުއެވެ.