ސީޓީ ލީގު ހޯދުމާ ގާތަށް

އިނގިރޭސި ޕްރިމިއާ ލީގުގައި ލެސްޓާ ސިޓީ ބަލިކޮށް ލީގު ޗެމްޕިއަންކަން ހޯދުމާ ގާތަށް މެންޗެސްޓާ ސިޓީ ޖެހިލައިފިއެވެ.

ލީގު ޗެމްޕިއަންކަން ހޯދުމާ ގާތަށް ސިޓީ ޖެހިލީ ރަށުން ބޭރުގައި ކުޅުނު މެޗުން ލެސްޓާ އަތުން 2-0 ލަނޑުން މޮޅުވެއްގެންނެވެ. ލެސްޓާގެ ދަނޑުގައި ކުޅުނު މެޗުގައި ސިޓީން މޮޅު ކުޅުމެއް ދެއްކިއިރު، އެ ޓީމުން ލީޑު ނަގާފައިވަނީ ދެވަނަ ހާފު ފަށައިގެން 13 ވަނަ މިނެޓުގައެވެ. މި ލަނޑު ސިޓީއަށް ކާމިޔާބުކޮށްދިނީ ބެންޖަމިން މެންޑީއެވެ. އަދި މެޗުގެ 74 ވަނަ މިނެޓުގައި ރަހީމް ސްޓާލިން ދިން ބޯޅައަކުން ގަބްރިއެލް ޖީސޫސް ވަނީ ލަނޑެއް ޖަހައި، ސިޓީގެ ލީޑު ފުޅާކޮށްދީފައެވެ.

މި މޮޅާއެކު ތާވަލުގެ އެއްވަނައިގައި ސިޓީ އޮތީ 17 ޕޮއިންޓުގެ ލީޑަކާއެކުއެވެ. އެގޮތުން ކުޅުނު 31 މެޗުން ސިޓީއަށް 74 ޕޮއިންޓް ލިބިފައިވާއިރު، ދެވަނައިގައި އޮތް މެންޗެސްޓާ ޔުނައިޓެޑަށް 29 މެޗުން ވަނީ 57 ޕޮއިންޓް ލިބިފައެވެ. އަދި ސިޓީ އަތުން ބަލިވި ލެސްޓާ އޮތީ ތާވަލުގެ ތިންވަނައިގައި 30 މެޗުން 56 ޕޮއިންޓާއެކުއެވެ.

ލީގުގައި ބާކީ އޮތް ހަތް މެޗުގެ ތެރެއިން ހަތަރު މެޗުން މޮޅުވެގެން ސިޓީއަށް ލީގު ޗެމްޕިއަންކަން ކަށަވަރުކުރެވޭނެއެވެ.