ދުނިޔޭގެ އެހެން ގިނަ ގައުމުތަކެކޭ އެއްފަދައިން، ސަރުކާރާ ދައުލަތުގެ "ލޭބަރ ފޯސްގެ" މައި ބަދައަކީ ދިވެހި ރާއްޖޭގައިވެސް ސިވިލް ސާވިސްގެ މުވައްޒަފުންނެވެ. ސަބަބަކީ ދިވެހި ރާއްޖޭގެ ސިވިލް ސރަވިސްގައި ވަޒީފާ އަދާކުރާ މުވައްޒިފުންގެ އަދަދު 30 ހާހަށްވުރެ މަތީގައި އުޅޭއިރު، މިއީ ސަރުކާރާ ދައުލަތުގައި ވަޒީފާ އަދާކުރަމުންދާ ޖުމްލަ ލޭބަރ ފޯރސްގެ ބޮޑު އިންސައްތައަކަށް ވާތީއެވެ. އަދި މުސާރަތައް އެވްރޮޖެ ގޮތެއްގައި ކުޑަ ނަމަވެސް، މުޅި ދައުލަތް ހިންގުމުގައި، އެންމެ ބުރަކޮށް މަސައްކަތްކުރާ ފަރާތްތަކަކީ ސިވިލް ސާވިސްގެ މުވައްޒަފުން ކަމުގައިވާތީއެވެ.

ހަމަ މިއާއެކު، ދައުލަތެއް ހިންގުމުގައި ސިވިލްސާވިސްގެ މުވައްޒަފުންގެ މުހިންމުވާ އެއް ސަބަބަކީ، މި މުވައްޒަފުން، ރޭވިގެން އެކުލުންތެރިކަމާއެކު، އެކަތިގަޑެއްގެ ގޮތުގައި ސަރުކާރާ ނުރުހުންވެ، ވަޒީފާ އަދާކުރުން ހުއްޓާލާ، ނުވަތަ ސިވިލްސާވިސް ލޭބަރ ފޯރސްގެ ބޮޑުބައެއް މަދަނީ ބަސް ނޭހުމަކަށް ގޮސްފި ހާލަތެއްގައި މުޅި ސަރުކާރު ހުއްޓުމަކަށް އައިސް ރައްޔިތުންނަށް ފޯރިކޮށްދޭން ޖެހޭ އެތަކެއް ޚިދުމަތަކަށް ބުރޫ އަރައިގެން އަންނާނެތީ ވެސްމެއެވެ.

އަދި މިއީ، ހައްގުތަކުން މަހުރޫމުކޮށް، އިނާޔަތާއި ހިމާޔަތާ ރައްކާތެރިކަމުން މަހުރޫމް ވެގެންދިއުމުން، ދުނިޔޭގެ ބައެއް ގައުމުތަކުގައި މަދުން ނަމަވެސް ބޭނުން ކޮށްފައި ހުރި ބާރުތަކެއް ކަންވެސް ފާހަގަ ކޮށްލަން ޖެހެއެވެ.

މިސާލެއްގެ ގޮތުން މިއަދު ބަރުމާ ފުދެއެވެ. އެގައުމުގެ އަސްކަރީ ވެރިކަމާ ދެކޮޅަށް މިޔަންމާގެ މުވައްޒަފުން މިއަދު ބޭނުން ކުރަމުންދާ އެންމެ ވަރުގަދަ އެއް ހަތިޔާރަކީ މަދަނީ ބަސް ނޭހުން ނުވަތަ "ސިވިލް ޑިސްއޮބިޑިއެންސް" އެވެ. މުވައްޒަފުން މަގުތަކަށް ނިކުމެ، އެގައުމުގެ އަސްކަރީ ވެރިކަމާ ދެކޮޅަށް މެދުނުކެޑި، އާންމު ރައްޔިތުން ކުރަމުންދާ މުޒާހިރާތަކުގެ ނަތީޖާއެއްގެ ގޮތުން، އަސްކަރީ ވެރިން މަގާމުތަކުން ދުރު ނުކުރެވުނީމަ، މި މަދަނީ ބަސްނޭހުމުގެ ނަތީޖާއެއް ނެތްކަމުގައި ބައެއް ފަރާތްތަކުން ހީކޮށްފާނެއެވެ.

އެހެންނަމަވެސް، ކަމުގެ ހަގީގަތް މުޅިން ތަފާތެވެ. ސަބަބީ، މުޅި ސިވިލްސާވިސްގެ މުވައްޒަފުން މަސައްކަތައް ނުކޮށް ހުށްޓާލުމުން ސަރުކާރުގެ "އޮޕްރޭޝަން"ތައް ހުއްޓުމަކަށް އަންނާނެތީއެވެ. އަދި ހަމައެފަދައިން، ސިވިލް ސާވިސްފަދަ ބޮޑު ލޭބާ ފޯރސްއެއް މަގުތަކަށް ނިކުމެ މުޒާހިރާކޮށް އިހުތިޖާޖު ކުރަން ފެށުމުން، ހަމަނުޖެހުން އުފެދި، މި އެއްވުންތަކުގެ އަސްލު މަންޒަރު ގައުމުން ބޭރުގެ ޖަމްއިއްޔާ ޖަމާއަތްތަކާ ހަމައަށް ދަތުރުކޮށް، މިއީ އެފަދަ ގައުމަކަށް ތަހައްމަލް ކުރަން އުދަގޫ ހާލަތަކަށް ވެގެން ދާނެތީއެވެ.

މިއަރުގެ ފެބްރުއަރީ މަހުގެ 1 ވަނަދުވަހު މިޔަންމާރގެ އަސްކަރީ ސަރުކާރުން ގެނައި ބައާވާތައްފަހު، އަސްކަރިޔާއަށް ކުރިމަތިލާން ޖެހިފައިވާ އެންމެ ބޮޑު ގޮންޖެހުމަކީ އެގައުމުގެ މަސައްކަތުގެ އާބާދީގެ ފަރާތުން ކުރިިމަތިވަމުންދާ ގޮންޖެހުންތަކެވެ.

އެހެންކަމުން، މި ބީދައިން ވިސްނާލާއިރު، ސިވިލްސާވިސްގެ މުވައްޒަފުންނަކީ ބާރުގަދަ ބައެކެވެ. އެއީ ނިކަމެތި ބައެއް ނޫނެވެ.

އަދި، ސިވިލްސާވިސްގެ ގާނޫނުން އެ މުވައްޒަފުންނަށް ހައްގުތަކަކާއި ބާރުތަކެއް ލިބިދީފައިވާއިރު، މި ހައްގުތަކާއި ބާރުތަކުގެ މައްޗަށް، އެ މުވައްޒަވުންނަށްވެސް، ގާނޫނު އަސާސީން ލިބިދީފައިވާ އަސާސީ ހައްގުތަކާއި ބާރުތައްވެސް ހަމަ މިބީދައިން ލިބި ދީފައި އެބަހުއްޓެވެ. އެއީ ދިވެއްސަކަށް ވީތީ ލިބިދީފައިވާ ހައްގުތަކާއި، ހިމާޔަތާއި އިނާޔަތާއި ރައްކާތެރިކަމެވެ. އަދި އެއީ އެ މުވައްޒަފުންގެ ކިބައިން ނިގުޅައި ގަނެވޭނޭ ކަންކަމެއްވެސް ނުމެ ނޫންމެއެވެ.

ހޯރަފުށީ ދާއިރާގެ މެމްބަރު ދެއްކެވި ވާހަކަފުޅު

މިހަފްތާގައި، ރައްޔިތުންގެ މަޖިލީހުގައި، ހޯރަފުށީ ދާއިރާގެ އިއްޒަތްތެރި މެމްބަރު މުހައްމަދު ސަލީމު، ސިވިލް ސާވިސް މުވައްޒިފުންގެ އަސާސީ ހައްގުތަކާ ގުޅޭގޮތުން ދެއްކެވި ވާހަކަފުޅުގެ ސަބަބުން، އެވާހަތަކަށް އެތައް ބައެއްގެ ނުރުހުން އަމާޒު ވެގެން ދިޔައެވެ.

ސަބަބަކީ، ސިވިލް ސާވިސް މުވައްޒަފުންނަކީ، ވަކި ޕްރޮފެޝަންއެއްކަމުގައި ވިދާޅުވެ، އެ ދާއިރާ ރެގިއުލޭޓް ކުރަންޖޭކަމަށް ވިދާޅުވެ ދެއްކެވި ވާހަކަފުޅުން، ސިވިލްސާވިސް މުވައްޒަފުންގެ ދޫން ބަންދުވެ، ހަތަރެސް ފައިގައި ބިޑި އެޅުވިގެން ދާންޖެހޭކަމަށް، އެވާހަކަތަކުން ވަރަށް ބޮޑަށް ސިފަވެގެން ދާތީއެވެ.

"އޭނައަކީ ފޭސްލެސް މީހެއްގެ ގޮތުގައި ތަޖުރިބާކާރުން ބުނަނީ، އޭނައަކީ އަޑެއްނެތް މީހެއް، އޭނައަކީ ވަޒީފާގެ އެއްބަސްވުމުގައި ސޮއި ކުރާ ހިސާބުން ކައްވަޅަށް ދާންދެން އަގަމަޑުން ލައިގެން ހުންނަން ޖެހޭ މީހެއް"

ސަލީމްގެ މިވާހަކަތަަކަށް ބަލާއިރު، ދެކަމެއް ފާހަގަ ކޮށްލެވެއެވެ.

ތެދުފުޅެކެވެ. ސިވިލްސާވިސްއަކީ ޕްރޮފެޝަންއެވެ. މުވައްޒަފުން ވަޒީފާ އަދާކުރާ ކޮންމެ ދާއިރާއަކީވެސް ވަކި ޕްރޮފެޝަންއެކެވެ.

އަދި މިއިން ކޮންމެ ޕްރޮފެޝަންއަކަށް ބަލާލި ކަމުގައިވި ނަމަވެސް، ދިވެހި ރާއްޖޭގައި، ދައުލަތުގެ ވަޒީފާތައް ގިންތި ކުރުމުގައި މުސާރައިގެ ގޮތުން ބެލިކަމުގައިވި ނަމަވެސް، ރެގިއުލޭޓް ކުރެވޭ މިންގަޑުތަކުން ބެލިކަމުގައި ވިނަމަވެސް، މި ޕްރޮފެޝަތަކުގެ މެދުގައި އޮތީ، އިޖުތިމާއީ ހަމަހަމަކަން ގެއްލިފައި އެވެ.

މިސަބަބުތައް މިގޮތަށް ހުންނަން ޖެހުނު މައިގަޑު ސަބަބަކީ، އެތައް ޒަމާނެއް ކުރިން އުފެދިފައިހުރި އެތަކެއް ވަޒީފާތަކެއް، އޭގެފަހުން އައި ގާނޫނުތަކާއި ގަވާއިދު ތަކުން ރެގިއުލޭޓް ކުރަން ޖެހުމެވެ. ގާނޫނުތަކާއި ގަވާއިދުތައް އައިސްފައިހުރީ، ވަޒީފާތަކަށް އަމާޒު ކުރުމުގެ ބަދަލުގައި، ވަކިވަކި ފަރުދުންނަށް، ނުވަތަ ވަކިވަކި މުވައްސަސާތަކަށް އަމާޒުވެގެން ކަމުގައި ވާތީއެވެ. އެކިއެކި ތަފާތު ސިޔާސީ ވިސްނުމާއި، ފިކުރުތަކުގެ ޒަރީއާއިން، މިގާނޫނުތައް އެއްހަމަކޮށް، މުސާރަތައް ގިންތިކޮށް، ވަޒީފާތައް އެއްހަމަ ކުރުން ފަހުންވެގެން ދިޔައީ މުސްތަހީލު ކަމަކަށެވެ.

އެހެންކަމުން، ޕްރޮފެޝަންއަކަށްވެގެން، "އަގަމަޑުން ލައިގެން" ތިބެން ޖެހޭނީ ހަމައެކަނި ސިވިލް ސާވިސްގެ މުވައްޒަފުން އެކަނި ނޫންކަމުގައި ދަންނަވަން ޖެހެއެވެ. ޝަރުއީ ދާއިރާއަކީވެސް، ޕްރޮފެޝަންއެކެވެ. ފަތުރުވެރިކަމުގެ ދާއިރާއަކީ ޕްރޮފެޝަންއެކެވެ. ރައްޔިތުންގެ މަޖިލީހުގެ މެމްބަރުން އެމަޖިލީހުގައި ތިއްބަވާހާ ހިދަކު އެއީވެސް ޕްރޮފެޝަންއެވެ. މިއިން ކޮންމެ ޕްރޮފެޝަންއެއްގައި ތިބޭ މުވައްޒަފުންނަށްވެސް، އެ ޕްރޮފެޝަންއެއްގެ ހައިސިއްޔަތުން، ދައްކަންޖެހޭ ވާހަކަ މެނުވީ ނުދެއްކޭނެއެވެ. ދައްކައިގެން ނުވާނެއެވެ.

ބޭނުން ކޮންމެ ވާހަކައެއް، އިސްލާމްދީނުގެ އަސަސަކާ ޚިލާފު ނުވާ މިންގަޑުގައި ރައްޔިތުންގެ މަޖިލިހުގެ ތެރޭގައި ދެއްކިދާނެކަމަށް ގާނޫނު އަސާސީގައި ލިޔެފައި އޮންނަ އޮތުމަކީ، އެ ތަޅުމުގައި އަވަގުރާނަ ގޮވަން މެމްބަރުންނަށް ދޫކޮށްފައި އޮންނަ ހުއްދައެއް ނޫނެވެ.

ޖުޑިޝަރީގައި މަސައްކަތް ކުރާ މުވައްޒަފަކަށް، އެ މުވައްސަސާގެ އަބުރާއި ކަރާމާތާއި، އަދި ދަމަހައްޓަންޖެހޭ އުސޫލުތައް މުގުރާލުމަށްފަހު، ބޭނުންހާ ވާހަކައެއް ނުދެއްކޭނެއެވެ.

މިއުސޫލުން ބަލާއިރު، އެއީ ވަކި ޕްރޮފެޝަންއަކަށް ވެގެން، "ކައްވަޅަށް ދަންދެން އަގަމުޑުން ލައިގެން ތިބެންޖެހޭ" ހަމައެކަނި ބަޔަކީ ސިވިލް ސާވިސްގެ މުވައްޒަފުންކަމަށް ވާނަމަ، ވިސްނިފައި މިއޮތް މަހުފޫމުގައި މައްސަލަތަކެއް އެބަހުއްޓެވެ.

ދެވަނަ ކަމަކީ، ސިވިލް ސާވިސްގެ މުވައްޒަފަކީ "އަޑެއް ނެތް" މީހަކަށް ވާންޖެހޭ ސަބަބުތަކެވެ.

ގަބޫލުކުރަން ޖެހޭ ހަގީގަތަކީ، ސިވިލް ސާވިސްގެ މުވައްޒަފެއް ކަމުގައިވި ނަމަވެސް، އަދި އެހެން ޕްރޮފެޝަންގެ މުވައްޒަފެއް ކަމުގައި ވިނަމަވެސް، މިއިން ކޮންމެ މުވައްޒަފަކީވެސް، ވަޒީފާ އަދާކުރަން ފެށުމުގެ ކުރިން ދިވެހި ރައްޔިތެއް ކަމެވެ. އަދި، އެއިން ކޮންމެ ރައްޔިތަކަށްވެސް، ދިވެހި މަންމައަކާއި ދިވެހި ބައްޕައަކަށް އުފަންވެ، ދިވެހި ފަސްގަޑަށް އުފަންވީތީ ލިބިދޭ ހައްގުތަކެއްގެ ވާހަކަތައް ފެހި ގާނޫނު އަސާސީގައި ލިޔެވި ބަޔާން ކުރެވިފައިވާކަމެވެ.

މިގޮތުން އަސާސީ ހައްގުތަކުގެ ގޮތުގައި، ގާނޫނު އަސާސީގައި ވަކި ބާބެއް ޚާއްސަ ކުރެވިފައި އެބައޮތެވެ. މިބާބުގައި ވާގޮތުން، ދިރިހުރުމުގެ ހައްގާއި، ޚިޔާލު ފާޅުކުރުމުގެ ހައްގާއި، ނޫސްވެރިކަމާއި، ދުލާއި ގަލަމުގެ މިނިވަންކަމާއި، ވޯޓު ދިނުމާއި، ސިޔާސީ ޕާޓީތަކުގައި ބައިވެރިވުމުގެ ހައްގާއި، އެއްވެ އުޅުމުގެ މިނިވަންކަމުގެ އިތުރުން، ހަޅުތާލު ކުރުމުގެ ހައްގުތައްފަދަ އެތަކެއް ހައްގުތަކެއް، ދިވެހި ރައްޔިތަކަށް ވީތީވެ މިގާނޫނު އަސާސީން ދިވެހި ކޮންމެ ރައްޔިތަކަށްވެސް ލިބި ދީފައި އެބަހުއްޓެވެ.

އަދި މިއީ، އެއްވެސް ދިވެހި ފަރުދަކަށްވެސް، މުވައްސަސާއަކަށްވިޔަސް، މިގާނޫނު އަސާސީއަށް އިސްލާހު ގެނައުމަކާ ނުލާ ދިވެހި އެއްވެސް ރައްޔިތެއްގެ ކިބައިން ނިގުޅައިގަނެވިދާނެ ހައްގުތަކެއް ނޫނެވެ. އެއީ ސިވިލްސާވިސްގެ މުވައްޒަފަކަށް ވިޔަސް ނުވިޔަސް އެހަގީގަތް އޮތީ ހަމަ އެގޮތުގައެވެ.

އެހެންނަމަވެސް، ފާހަގަ ކޮށްލަންޖެހޭ ނުކުތާއެއް އެބައޮތެވެ. މިއަސާސީ ހައްގުތައް ދިވެހި ރައްޔިތުންނަށް، މިބީދައިން ގާނޫނު އަސާސީން ލިބިދީފައި އޮތްއިރު، މިހައްގުތަކަށް އުނިއިތުރު ގެނެވިދާނެ ހަމައެއް އެގާނޫނު އަސާސީގައި އަޅާދީފައި އޮތްކަމެވެ. އެއީ، ދިވެހި ރާއްޖޭގެ ރައްޔިތުންގެ މަޖިލިހުން ހަދާ ގާނޫނަކުން މިހައްގުތައް ހަނިކުރެވިދާނެކަމަށް މިގާނޫނު އަސާސީގައި ބުނެފައި އޮންނަ އޮތުމެވެ.

ހަމައެއާއިއެކު، ހައްގުތައް ހަނިކުރެވިދާނެކަމަށް، ގާނޫނު އަސާސީގައި ބުނެފައި އޮންނަ އޮތުމާއި ވިދިގެން، މިއިން އަސާސީ ހައްގެއް ހަނި ކުރެވިދާނެ ހަމައެއްކަމަށް ގާނޫނު އަސާސީގައި ބުނެފައިއޮންނަނީ، ދުނިޔޭގެ މިނިވަން ޑިމޮކްރަސީތަކުގައި އެހައްގުތަށް ހަނިކުރެވިފައި އޮންނަ މިންގަޑުތަކަށް ބަލައިގެން، އެވަގުތަކަށް ބޭނުންވާ މިންވަރަކުންނެވެ.

ހަމަ މިއާއިއެކު، ހަނދާން ކޮށްލަންޖެހޭ އެންމެ މުހިންމު އެއް ނުކުތާއަކީ، ގާނޫނު އަސާސީން ކަށަވަރު ކޮށްދޭ މިއަސާސީ ހައްގުތައް ހަނި ކުރެވިދާނެކަމަށް ބަޔާން ކޮށްފައިވާއިރު، މިއިން އެއްވެސް ހައްގަކީ، ދިވެހި އެއްވެސް ރައްޔިތެއްގެ ކިބައިން މުތުލަގަށް ނިގުޅައިގަނެވިދާނެ ހައްގެއް ނޫންކަން ގާނޫނު އަސާސީން ސާފުވެފައި އޮތްކަމެވެ.

އަދި ހަމަ އެއާއެކު، މިއިން އަސާސީ ހައްގަކެއް ހަނި ކުރަންޖެހިއްޖެ ހާލަތެއްގައި، ހަނި ކުރުމުގައި، ވަކި ޕްރޮފެޝަންއެއް، ވަކި ދާއިރާއެއް އިސްތިސްނާ، ނުވަތަ އިސްފަސް ނުކުރެވޭނެކަންވެސް، ގާނޫނު އަސާސީން އެގެން އޮންނަ ކަމެވެ.

އެހެންކަމުން، ބޭނުން އެއްޗެއް ނުލިޔެވުމާއި، ބޭނުން ވާހަކައެއް ނުދެއްކެވުމާއި، ވަޒީފާގެ އެއްބަސްވުމުގައި ސޮއިކުރާ ހިސާބުން އަގަ މަޑުން ލައިގެން ހުންނަޖެހޭ މީހެއްގެގޮތުގައި، ސިވިލް ސާވިސްގެ މުވައްޒަފުން އެކަނި ސިފަ ކުރެވިގެން ދިޔަ ދިއުމަކީ، އެންމެ އަސާސީ މިންގަޑުން ބެލިކަމުގައި ވިނަމަވެސް، ގާނޫނު އަސާސީގެ ހައްގުތަކާ ބެހޭ ބާބުން ލިބިދީފައި އޮންނަ، މިގާނޫނު އަސާސީއާއި ގާނޫނުތަކުގެ ކުރިމަތީގައި ގާއިމް ވާންޖެހޭ ހަމަމަކަމުގެ މިންގަޑުން ބޭރުން، ސިފަ ކުރެވިފައިވާ ސިފަކުރުމެއްކަމުގައި ގިނަބަޔަކު ފާހަގަ ކުރެއެވެ.

އަދި ބޭނުން ވާހައެއް ނުދެއްކޭނެ، ބޭނުން އެއްޗެއް ނުލިޔެވޭނެ، ކަށްވަޅަށް ދަންދެން އަގަމަޑުން ލައިގެން ތިބެން ޖެހޭ ބައެއްގެ ގޮތުގައި، ހޯރަފުށީ ދާއިރާގެ މެމްބަރު ސިވިސް ސާވިސްގެ މުވައްޒަފުން ސިފަކުރެއްވިއިރު، ސިވިލް ސާވިސްގެ ގާނޫނުން، ހަމަ އެ މުވައްޒަފުންނަށް، މަސައްކަތު ނޫން ގަޑިތަކުގައި ސިޔާސީ ހަރާކާތްތަކުގައި އުޅުމުގެ ފުރުސަތު ފަހި ކޮށްދީފައި އޮތްކަމާއި، މިއަދުވެސް، ގާނޫނީ އޮނިގަޑުގެ ތެރެއިން، އެތައް ހާސް ސިވިލް ސާވިސް މުވައްޒަފުންނެއް ސިޔާސީ ޕާޓީތަކުގެ ދަފްތަރުގައި ރަޖިސްޓްރީ ވެފައިވާކަން މިއީވެސް މިފުރުސަތުގައި ފާހަގަ ކޮށްލުން އައުލާވެގެންވާ ނުކުތާއެކެވެ.

އަޑެއްނެތް ފޭސްލެސް ޕްރޮފެޝަންއެއް

ސިވިސް ސާވިސްގެ މުވައްޒަފުންނަށް އަމާޒުކޮށް، މަޖިލީހުގެ ފްލޯގައި، ހޯރަފުށީ ދާއިރާގެ މެމްބަރު ވިދާޅުވެފައިވަނީ، ތަޖުރިބާކާރުން ވިދާޅުވާ ގޮތުގައި، ސިވިލް ސާވިސްގެ މުވައްޒަފުންނަކީ "ފޭސް ލެސް" ބައެއްކަމުގަވެ.

އެހެންނަމަވެސް، ސިވިލް ސާވިސްގެ މުވައްޒަފުންނަކީ "ވުޖޫދުގައި ނެތް ފަދަ" ބައެއްގެ ގޮތުގައި ސިފަކުރައްވަނީ ކޮން ތަޖުރިބާ ކާރެއްކަމުގައި މި މެމްބަރު ވިދާޅުވެފައެއް ނުވެއެވެ. އަދި، އެމީހުންނަކީ، އަމިއްލަ ދުލުގައި އޮންނަ ބަސްވެސް ބުނުމުގެ އިޚްތިޔާރެއް ލިބިގެންނުވާ، "އަޑެއްނެތް" ބައެއްގެ ގޮތުގައި މިމުވަޒަފުން މިމެމްބަރަށް ސިފަވެގެން ގޮސްފައިވާ ހަގީގީ ސަބަބެއްވެސް ހާމަ ކުރައްވާފައެއް ނުވެއެވެ.

އެހެންނަމަވެސް، ކިތަންމެ އާދައިގެ މުސާރައެއްގައި، އަދި ކިތަންމެ އާދައިގެ މަގާމެއްގައި، ހުރެގެން ނަމަވެސް، ލެއާއި ދާ އޮހޮރައިގެން، ގައުމަށް ޚިދުމަތް ކުރަމުންދާ އެއްވެސް މުވައްޒަފާކާ މެދު މިބީދައިން ސިފަވެގެން ގޮސްފައި އޮތުމަކީ މައްސަލައެކެވެ. އަދި އަމުދުން، ރައްޔިތުން ތަމްސީލުކުރާ މެމްބަރެއްގެ ހިތްޕުޅުގައި، އެތަކެއް ހާސް ދިވެހި ރައްޔިތުންނެއް ވަޒީފާ އަދާކުރަމުންދާ ޕްރޮފެޝަންއެއް މިބީދައިން ސިފެވެގެން ގޮސްފައި އޮތުމަކީ، އެމެމްބަރަކު، މިކަން އިތުރަށް ސާފުކޮށްދިނުން ވަކީން ބޮޑަށް އައުލާވެގެންދާ އެއްސަބަބެވެ.

ކަންމެއަކަސް، ޚިޔާލަކީ އަބަދުވެސް ތަފާތު، އަދި އިންސާނާގެ ބުއްދިއަކީ، އެކި މިންގަޑުން ވިސްނާ ފިކުރު ކުރާ އެއްޗަކަށްވި ނަމަވެސް، ބައެއް ކަންކަމަކީ ބަދަލު ކުރެވެން ނުހުންނަ ހަގީގަތްތަކެވެ.

ސިވިލް ސާވިސްގެ މުވަޒަފުންނަކީ، އެޕްރޮފެޝަންގެ މުވައްޒަފުންނަށް ވުމުގެ ކުރީން ދިވެހި ރައްޔިތުންކަން މިއީ ބަދަލުކުރެވެން ނެތް ހަގީގަތެކެވެ. އަދި ދިވެހި ރައްޔިތަކަށް ވީތީ ގާނޫނު އަސާސީން ލިބިދީފައި އޮތް އަސާސީ ހައްގެއް ސިވިލް ސާވިސްގެ މުވައްޒަފަކަށް ވީތީ ނިގުޅައި ނުގަނެވޭނެކަންވެސް މިއީވެސް ބަދަލު ކުރެވެން ނެތް ހަގީގަތެކެވެ.