ސްޕެނިޝް ލީގުގައި ރޭ ފަހަތުން އަރައި އެތުލެޓިކް ބިލްބާއޯ އަތުން 2-1 އިން މޮޅުވެ އެތުލެޓިކޯ މެޑްރިޑުން ލީގުގެ އެއް ވަނައިގައި ހަ ޕޮއިންޓަށް ލީޑުފުޅާކޮށްފި އެވެ.
އެތުލެޓިކޯ ދަނޑުގައި ކުޅުނު ރޭގެ މެޗުގެ 21 ވަނަ މިނިޓްގައި އިނާކީ ވިލިއަމްސް ތަނަވަސްކޮށްދިން ފުރުސަތަކުން ބިލްބާއޯ އަށް ލީޑުނަގައިދިނީ އިކާ މުނިއައީން އެވެ. ފުރަތަމަ ހާފުގެ އިތުރު ވަގުތުގައި މާކޯސް ލޮރެންޓޭ ވަނީ އެތުލެޓިކޯ އަށް އެއްވަރުކޮށްދީފައެވެ. އޭނާ މި ގޯލު ޖެހީ ތޯމަސް ލެމާ ނަގައިިދިން ހުރަހަކުން ބޮލުންނެވެ. އެތުލެޓިކޯ މޮޅުވި ގޯލު ޖެހީ ޕެނަލްޓީ އަކުން ލުއިސް ސުއަރޭޒްއެވެ. މިއީ އޭރިއާތެރެއިން ސުއަރޭޒަށް އެތުލެޓިކޯގެ އުނާއީ ނޫނޭޒް ކުރި ފައުލަކަށް ރެފްރީ ދިން ޕެނަލްޓީ އެކެވެ. މި ޕެނަލްޓީ ކާމިޔާބުކޮށް ސުއަރޭޒް ވަނީ މި ފަހަރު ލީގުގައި އޭނާގެ 18 ވަނަ ގޯލު ޖަހައިފަ އެވެ.
އެތުލެޓިކޯ އެއް ވަނައިގައި އޮތީ 62 ޕޮއިންޓާ އެކު އެވެ. ދެ ވަނައިގައި އޮތް ބާސެލޯނާ އަށް 56 ޕޮއިންޓް ލިބިފައިވާއިރު، ތިން ވަނައިގައި އެންމެ ފަހުގެ ޗެމްޕިއަން ރެއާލް މެޑްރިޑް އޮތީ 54 ޕޮއިންޓް ހޯދައިގެންނެެވެ. އެތުލެޓިކޯ އިން އެންމެ ފަހުން ސްޕެނިޝް ލީގު ކާމިޔާބުކުރީ 2014 ވަނަ އަހަރު އެވެ.
ކޮމެންޓު ފޮނުވާ