ޕީއެސްޖީ އިން ޗެމްޕިއަންސް ލީގުގައި އިނގިރޭސިވިލާތުގެ މެންޗަސްޓަރ ޔުނައިޓެޑާ ދެކޮޅަށް ނުކުންނައިރު އަނިޔާގެ ގިނަ މައްސަލަތަކެއްގެ އިތުރުން ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް އެޓީމުގެ ކޯޗް ތޯމަސް ޓުޗެލް ބުނެފިއެވެ.
ޕީއެސްޖީގެ ކޯޗު ތޯމަސް ޓުޗެލް ބުނީ މެޗުގައި ފަހަރެއްގައި ހަމައެކަނި އެގާރަ ކުޅުންތެރިން ބޭނުންކުރަން ޖެހިދާނެކަމަށާއި މިވަގުތު އަނިޔާގެ ކުލަބުގެ އަށް ކުޅުންތެރިޔަކު އެބަތިބިކަމަށެވެ. ޓުޗެލް ބުނީ މިރޭގެ ލީގުގައި ކުޅޭ މެޗުގައި ވެސް ނޭމާ އާއި އެމްބާޕާއެއް ވަރަށް ބޮޑަށް ބަރޯސާވާން ޖެހިފަވާކަމަށާއި އެ ދެކުޅުންތެރިން ޓީމާ ގުޅުނީ ގައުމީ ޓީމާއެކު 90 މިނިޓު ކުޅުމައްފަހުކަމަށެވެ.
ވަރަށް ގިނަ ކުޅުންތެރިންނާ ނުލާ ތައްޔާރުވާން މިޖެހެނީ، މިއީ ހަގީގަތުގަވެސް ވަރަށް ބޯޑު ގޮންޖެހުމެއް، މަސައްކަތް ކުރާނަން ނެމްސް އަތުން މިރޭ މޮޅުވޭތޯ. އެއީ މިވަގުތައް ޔުނައިޓެޑު މެޗަށް ތައްޔާރުވުމަށް ކުރެވޭނެ ކަމަކީ.
– ޓުޗެލް
ނޭމާ އަދި އެމްބާޕޭގެ ފަރާތުން ވަރަށް ފިޒިކަލް، ރަނގަޅު ކުޅުމެއް ފެނިގެން ގޮސްދާނެކަމަށާއި އެހެންކަމުން އެ ކުޅުންތެރިންނަށް ރެސްޓުކުރަންވެސް ވަގުތު ބޭނުންވެދާނެ ކަމަށް ޓުޗެލް ބުނިއެވެ. މިހަފްތާގެ ކުރީކޮޅު ކޯވިޑް-19ށް ފައްސިވި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އާއި ކޮންޓެކްޓްވެފައި ހުރުމުން ޑެނީލޯ ޕެރެއިރާގެ އިތުރުން މާކޯ ވެރާޓީ އަށްވެސް މިމެޗުގައި ކުޅުމުގެ ފުރުސަތު ކުޑަކަމަށް ޓުޗެލްވަނީ ބުނެފައެވެ.
މާކީނިއޯސް، ހޫލިއަން ޑްރެކްސްލާ، ކޮލިން ޑަގްބާ ލައްވާ ކުޅުވުމާ މެދު އަދި ގޮތެއް ނުނިންމާ ކަމަށްވެސް ކޯޗު ވަނީ ބުނެފައެވެ.
ތިލޯ ކެރާ، ހުއާން ބާނާޓް އަދި މައުރޯ އިކާޑީއަށް އަނިޔާގެ މައްސަލަތަކެއްގެ ސަބަބުން މެޗުގައި ނުކުޅެވޭނެ ކަމަށްވެސް އޭނާވަނީ ބުނެފައެވެ.
އޭނާ ބުނީ މުހިންމު ކުޅުންތެރިންނާ ނުލާ މިރޭ ލީގުގައި ނެމްސް މައްޗަށް ކުރި ހޯދޭތޯ މަސައްކަތް ކުރާނެކަމަށެވެ.
