ފާއިތުވެދިޔަ 15 އަހަރު ތެރޭގައި ފަލަސްތީނުގައި ބޭއްވުމަށް ހަޖެހިފައިވާ ފުރަތަމަ އާންމު އިންތިޚާބު ބޭއްވުމުގެ ކުރިން، މިހާރުގެ ރައީސް މަހުމޫދު އައްބާސަށް އޭނާ ނިސްބަތްވާ ޕާޓީ، ފަތަހަ ޖަމާއަތުގެ ތެރޭގައި ގޮންޖެހުންތަކާ ކުރިމަތިލާން ޖެހިއްޖެއެވެ.
ފަތަހަ ޕާޓީތެރެއިން، އައްބާސްއާއި ދެކޮޅަށް ބައެއް އިސްބޭފުޅުން ތެދުވެވަޑައިގެންނެވުމާއި ގުޅިގެން، އަންނަ ޖުލައިމަހު ބޭއްވުމަށް ހަމަޖެހިފައިވާ އާންމު އިންތިޚާބު، އައްބާސް ކެންސަލް ކުރައްވަފާނެ ކަމަށްވެސް ބައެއް ފަރާތަކުން މިހާރު ދަނީ ބުނަމުންނެވެ.
އިންތިޚާބުގެ ކުރިން، އައްބާސްއަށް ކުރިމަތި ލައްވަން ޖެހިވަޑައިގެންފައިވަނީ، ފަލަސްތީނުގައި ތާއީދު ބޮޑު، އިސްރާއީލުން އުމުރަށް ޖަލަށް ލާފައިވާ، ލީޑަރ މަރުވާން ބަރަޤޫތީއަށް ތާއީދުކުރާ ފަރާތްތަކުގެ ފަރާތުން ކުރިމަތި ވެވަޑައިގަންނަވާ ގޮންޖެހުންތަކެވެ.
އެހެންނަމަވެސް، މަހުމޫދު އައްބާސްގެ އޮފީހުން ވަނީ، އިންތިޚާބު ނުބޭއްވުމުގެ ވިސްނުމެއް ފަލަސްތީނުގެ ރައީސް ނުގެންގުޅުއްވާ ކަމަށް ވިދާޅުވެފައެވެ.
މިހާރު އުމުރުފުޅުން 61 އަހަރުގެ މަރުވާން ބަރުޤޫތީއަކީ، 2000 ވަނަ އަހަރުން 2005 ވަނަ އަހަރަށް، ހިފާފައިވާ ހުޅަގު އައްސޭރިއާއި އަދި ގާޒާ ސްޓްރިޕްގައި އިސްރާއީލާ ދެކޮޅަށް ކުރިޔަށްދިޔަ އިންތިފާޟާގެ ހަރާކާތްތަކުގެ އެންމެ އިސް އެއްފަރާތެވެ. ފަލަސްތީނުގެ ހަގުރާމަވެރިން، އިސްރާއީލާ ދެކޮޅަށް ދީފައިވާ، އެތަކެއް ހަމަލާތަކުގެ ޒިންމާ އޭނާ އުފުލަން ޖެހޭކަމަށް ސާބިތުވުމާއި ގުޅިގެން، 2004 ވަނައަހަރު އިސްރާއީލުގެ ކޯޓުންވަނީ އޭނާގެ މައްޗަށް އުމުރު ދުވަހުގެ ޖަލު ހުކުމެއް އިއްވާފައެވެ. އެހެންނަމަވެސް، މި ތުހުމަތުތަކަށް ބަރުގޫތީ އަބަދުވެސް ދެކޮޅު ހައްދަވާފައި ވެއެވެ.
މިހާރު އުމުރުފުޅުން 85 އަހަރުގެ، މަހުމޫދު އައްބާސް، ހުޅަގު އައްސޭރީގައި ގާއިމް ކުރެވިފައިވާ ޕަލެސްތީނިއަން އޮތޯރިޓީ (PA)ގެ ވެރިކަން އެތައް އަހަރެއްވަންދެން ކުރައްވަމުން ގެންދަވަނީ ޚާއްސަ ގަރާރެއްގެ ދަށުންނެވެ.
މިއަހަރުގެ ޖެނުއަރީމަހު އޭނާވަނީ، ރިޔާސީ އިންތިޚާބާއި އަދި ގާނޫނު ހަދާ މަޖިލިހުގެ އިންތިޚާބުވެސް އިއުލާން ކުރައްވާފައެވެ. ބެލެވޭ ގޮތުގައި މިއިންތިޚާބުތައް އޭނާ އިއުލާން ކުރައްވާފައިވަނީ، އޭނާގެ ވެރިކަމުގެ ގާނޫނީ އަދި ޑިމޮކްރަޓިކް ސައްޙަކަމާމެދު، އެތެރެއާއި ބޭރުން ކުރިމަތިވަމުންދާ ފާޑުކިއުތަކުގެ ސަބަބުންނެވެ.
މިގޮތުން އައްބާސަށް އަމާޒުވަމުންދާ ފާޑިއުންތައް އެންމެ ފަހުން ތަކުރާރު ކުރައްވާފައިވަނީ، ދިގު ޒަމާންތަކެއް ވަންދެން، ފަތަހަ ޖަމާއަތުގެ އެންމެ އިސް، ސެންޓްރަލް ކޮމިޓީގެ މެމްބަރެއްގެ ގޮތުގައި އިންނަވާ ނަސީރު އަލް-ޤުދުވާ އެވެ. އޭނާވަނީ، އަންނަ މޭމަހު ބޭއްވުމަށް ހަމަޖެހިފައިވާ ގާނޫނު ހަދާ މަޖިލިހުގެ އިންތިޚާބުގައި، ފަތަހަ ޖަމާއަތާ ވަކިން ވާދަކުރައްވާނެ ކެނޑިޑޭޓުންގެ ލިސްޓެއް އެކުލަވާ ލައްވާފައެވެ.
"ފަލަސްތީނުގެ އެތެރޭގެ މިހާރުގެ ހާލަތާމެދު ގިނަ ބަޔަކު ވަނީ ނާއުއްމީދު ވެފަ.. އެތެރޭގެ ކަންކަމުގެ މިސްރާބު ހުރި ގޮތާމެދު، މިސާލަކަށް ގާނޫނާއި ގަވާއިދު ތަންފީޒު ނުކުރެވުން، ލީޑަރޝިޕްގެ ފެންވަރު ދަށްވުން، ހަމަހަމަކަމާ އިންސާފު ނެތުން ފަދަ ކަންކަން،" ފަތަހަ ޖަމާއަތުގެ ބާނީ އަދި ޕަލެސްޓީނިއަން ލެބަރޭޝަން އޯގަނައިޒޭޝަންގެ ލީޑަރ ޔާސިރު އަރަފާތަށް ބޮޑުބޭބެ ވިދާޅުވާ، ޤުދުވާ ރޮއިޓާރސް ނޫހާއި ވާހަކަ ދައްކަވަމުން ވިދާޅުވެފައި ވެއެވެ.
19 މެމްބަރުންގެ މައްޗަށް އެކުލެވޭ، ފަލަސްތީނުގެ ސެންޓްރަލް ކޮމިޓީގައި ހިމެނި ވަޑައިގަންނަވާ މެމްބަރަކު، ސިޔާސަތުތަކާ ގުޅޭގޮތުން އައްބާސަށް ފާޑު ވިދާޅުވުމަކީ، މަދުން ނޫނީ ނުވާކަމެކެވެ.
ޤުދުވާ، 67، ވިދާޅުވެފައިވަނީ، އޭނާ އުއްމީދު ކުރައްވަނީ، ކުރިޔަށް އޮތް އިންތިޚާބުގައި އެކަތިގަޑެއްގެ ގޮތުގައި ވާދަކުރެއްވުމަށް އޭނާ އެކުލަވާލައްވާފައިވާ ލިސްޓަކީ، އިސްރާއީލުން އުމުރަށް ޖަލަށް ލާފައިވާ މަރުވާން ބަރުޤޫތީ ތަމްސީލު ކުރައްވާނެ ލިސްޓަކަށް ވެގެން ދިއުމަށެވެ. އައްބާސަށްފަހު، ފަތަހަ ޖަމާއަތުގެ ލީޑަރަކަށް ވެވަޑައިގަންނަވާނެކަމަށް ގިނަބަޔަކު އުއްމީދު ކުރާ ބޭފުޅަކީ މަރުވާން ބަރުޤޫތީއެވެ.
މިހާތަނަށް، މިލިސްޓުގައި ހިމެނިވަޑައިގަންނަވާނޭ ކަމެއް ނުވަތަ ކުރިޔަށް އޮތް ރިޔާސީ އިންތިޚާބުގައި ވާދަ ކުރައްވާނެ ކަމެއްވެސް، މަރުވާން ބަރުޤޫތީގެ ފަރާތުން ހާމަ ކުރައްވާފައެއް ނުވެއެވެ. އަދި މީޑިއާތަކަށް އިންޓަރވިއު ދިނުމަށް ބަރުޤޫތީވެސް އަދި އޭނާގެ ގާނޫނީ ވަކީލުވެސް ވަނީ ދެކޮޅު ހައްދަވާފައެވެ.
ޚިޔާލު ހޯދުމުގެ ވޯޓުތަކުން ދައްކާ ގޮތުގައި، އިސްރާއީލުގެ ޖަލުގައި އޮންނަވައިގެންވެސް، އޭނާ ކުރިޔަށް އޮތް ރިޔާސީ އިންތިޚާބުގައި ވާދަ ކުރައްވައިފި ނަމަ، މަހުމޫދު އައްބާސްއާއި އަދި 2007 ވަނަ އަހަރުން ފެށިގެން ގާޒާ ސްޓްރިޕްގައި ވެރިކަން ކުރަމުންދާ ހަމާސްގެ ލީޑަރުންނާ ދެކޮޅަށްވެސް، އިންތިޚާބު އޭނާ ފަސޭހަމަކާއެކު ކާމިޔާބު ކުރައްވާނެއެވެ.
